ނޫސްވެރިޔާ އަހްމަދު ރިލްވާން މަރުވެއްޖެ ކަމަށް ރައީސް އަބްދުﷲ ޔާމީން މިއަދު ވިދާޅުވި ސަބަބު ފުލުހުން ތަހުގީގު ކުރުމަށް އޭނާގެ އާއިލާ އިން ގޮވާލައިފި އެވެ.
މީގެ ހަތަރު އަހަރު ކުރިން ހުޅުމާލެ އިން ވަގަށް ނެގި ރިލްވާނާ ގުޅޭ ގޮތުން ކުރީގެ ނައިބު ރައީސް އަހްމަދު އަދީބު މިއަދު ނެރުއްވި ބަޔާނަކަށް ރައްދު ދެއްވައި ގދ. މަޑަވެލީގައި ވާހަކަފުޅު ދައްކަވަމުން ރައީސް ޔާމީން ވިދާޅުވީ "ރިލްވާން ނިޔާވެއްޖެ ކަމަށާއި އެއީ، ހިތާމަހުރި ކަމެއް" ކަމަށެވެ. އެކަމަކު ގދ. ފަރެސްމާތޮޑާގައި، އެ ވާހަކަފުޅު ތަރުޖަމާކޮށްދެއްވަމުން ރައީސް ވިދާޅުވީ، ރިލްވާން ނިޔާވެއްޖެ ކަމަށް ވިދާޅުވެވުނީ އަދީބު ހެއްދެވި ދޮގަކާ ހެދި ކަމަށެވެ. އެ މަނިކުފާނުގެ ނިޔަތަކީ ރިލްވާންގެ މަރު ސާބިތު ކުރެއްވުން ނޫން ކަމަށް ވިދާޅުވި އެވެ.
ރައީސް ފަހުން ވިދާޅުވީ، އިރާދަ ކުރެއްވިޔާ ރިލްވާން ފެންނާނެ ކަމަށާއި ފުލުހުން އެ މައްސަލަ ތަހުގީގު ކުރަމުން އަންނަ ކަމަށެވެ.
ރިލްވާންގެ އާއިލާ އިން ވާހަކަ ދެއްކި އޭނާގެ ދައްތަ ފާތުމަތު ޝެހެނާޒް ބުނި ގޮތުގައި ރިލްވާނަށް ވީ ގޮތެއް މިހާތަނަށް ފުލުހުންނާއި ދައުލަތުގެ އެއްވެސް މުއައްސަސާއަކުން ސާފުކޮށް ނުދީ ވަނިކޮށް ރައީސް ދެއްކެވި ވާހަކަފުޅުން ސުވާލު އުފެދޭ ކަމަށެވެ. ރިލްވާން ވީގޮތް ހޯދަން ހިންގި ތަހުގީގުން ވެސް އެއްވެސް ވާހަކައެއް ފުލުހުންނަށް ބުނެނުދެވިގެން އުޅެނިކޮށް، ރައީސް ދެއްކެވި ވާހަކަފުޅުތަކަކީ ތަހުގީގު ކުރަން ޖެހޭ ވާހަކަތަކެއް ކަމަށް ޝެހެނާޒް ވިދާޅުވި އެވެ.
"އެއީ، ރައީސުލްޖުމްހޫރިއްޔާ އަށް އޮޅިގެން ވިދާޅުވެވޭ ކަހަލަ ވާހަކަފުޅެއް ނޫން. ވަރަށް ޔަގީންކަމާ އެކު ވިދާޅުވީ ރިލްވާން ނިޔާވެއްޖެޔޭ. ރައީސް ޔާމީނާއި އަދީބާ އޮތް ހަސަދަވެރިކަމުގެ ތެރެއަށް ރިލްވާން ވައްދައިގެން ވާހަކަ ދައްކަވަން ޖެހޭ ސަބަބެއް ނެތް. އެކަން އާއިލާ އިން ކުށްވެރިކުރަން،" ޝެހެނާޒް ވިދާޅުވި އެވެ.
"ރިލްވާން މަރުވެފައިވާ ނަމަ، މަރުވި ގޮތާއި ތަނަކާއި މަރާލި މީހުން އަދި ސަބަބު ވެސް ރައީސް ޔާމީން ވިދާޅުވެ ދެއްވަން ޖެހޭ. މަރުވެއްޖެ ކަަމށް ވިދާޅުވުމަށް ފަހު، އެކަން އެހެން ގޮތަށް ތަރުޖަމާކޮށްގެން ދައްކާ ވާހަކަތައް އަޅުގަނޑުމެން ގަބޫލެއް ނުކުރާނަން."
ޝެހެނާޒް ބުނި ގޮތުގައި ރިލްވާނާ ގުޅޭ ގޮތުން ރައީސް ދެއްކެވި ވާހަކަފުޅުތަކުގެ މައްސަލަ އާއިލާ އިން ދޫކޮށެއް ނުލާނެ އެވެ. ރިލްވާން ގެއްލުވާލުމުގައި މި ސަރުކާރުގެ އިސް ބޭފުޅުންގެ އަތެއްވާ ކަމަށް ތުހުމަތު ކުރެވޭއިރު، އެ މައްސަލައިގެ ތަހުގީގުގައި ފުލުހުން އިހުމާލުވި ކަން ސާބިތުވެފައިވާ ކަމަށް ވެސް އޭނާ ބުންޏެވެ.
އޮގަސްޓް، 2014 ގައި ވީނުވީ ނޭނގި ގެއްލިފައިވާ ރިލްވާން ގަދަކަމުން ފޮރުވި ކަމަށް ބުނެ ދައުލަތުން ޓެރަރިޒަމްގެ ދައުވާކުރީ ހ. ހިލްޓަން އާލިފް ރައޫފާއި ގދ. ވާދޫ ކަރަންކާގޭ މުހައްމަދު ނޫރައްދީންގެ މައްޗަށެވެ. ދައުލަތުން ތުހުމަތު ކުރަނީ ރިލްވާން ގަދަކަމުން ފޮރުވީ އާލިފް ގެންގުޅުނު ރަތް ކުލައިގެ ކާރަށް ރިލްވާން ގަދަކަމުން އަރުވައިގެން ގެންގޮސްގެން ކަމަށެވެ. އެ ދައުވާ އެ ދެ މީހުންގެ މައްޗަށް ސާބިތެއް ނުވި އެވެ.
އެ ދައުވާ ސާބިތު ނުވީ ތަހުގީގުގައި ފުލުހުން ގަސްތުގައި އިހުމާލުވުމުގެ ސަބަބުން ކަން ހުކުމުން ސާފުވާ ކަމަށް ބުނެ އާއިލާ އިން ދަނީ ކަންބޮޑުވުންފާޅުކުރަމުންނެވެ.
ރިލްވާން ވަގަށް ނެގުމުގެ ފަހަތުގައި ވަނީ ކޮން ކަންތައްތަކެއް ކަމެއް ސާފު ނުވިއަސް އޭނާ ގެއްލުވައިލީ ފާރަލުމަށް ފަހު ކަމަށް ފުލުހުން ވަނީ ބުނެފަ އެވެ. އޭނާ ގެއްލުވައިލުމުގައި ގޭންގްތަކާ ގުޅުން އޮތް ކަމަށް ބުނެ ބަޔަކު ހައްޔަރު ވެސް ކުރި އެވެ. އެކަމަކު އެއްވެސް ހެއްކެއް ނެތް ކަމަށް ބުނެ، އެ އެންމެން ވެސް ވަނީ ދޫކޮށްލައިފަ އެވެ.
