ސާފް ސުޒުކީ ކަޕްގެ ފައިނަލުގައި އިންޑިއާގެ 23 އަހަރުން ދަށުގެ ޓީމު އަތުން 2-1 އިން މޮޅުވެ ރާއްޖޭން ހޯދި ކާމިޔާބަށް އިހުތިރާމް އަދާކުރަން ޖެހޭ ކަމަށް އިންޑިއާގެ ކޯޗު އިންގްލެންޑްގެ ސްޓެފަން ކޮންސްޓަންޓިން ބުނެފި އެވެ.
މިއީ މި މުބާރާތުގައި 2009 ވަނަ އަހަރުގެ ގްރޫޕް ސްޓޭޖުގައި އިންޑިއާ އަތުން 2-0 އިން މޮޅުވި ފަހުން އެ ޓީމު އަތުން ރާއްޖެ އަށް ހޯދުނު ފުރަތަމަ މޮޅެވެ. އެ މެޗަށް ފަހު ރާއްޖެ ވަނީ އިންޑިއާއާ ދެކޮޅަށް ކުޅުނު ފަސް މެޗުން ބަލިވެފަ އެވެ. އޭގެ ތެރޭގައި މި ފަހަރުގެ މުބާރާތުގެ ގްރޫޕް ސްޓޭޖުގައި 2-0 އިން ބަލިވި މެޗު ވެސް ހިމެނެ އެވެ.
ފައިނަލް މެޗަށް ފަހު އޮތް ނޫސްވެރިންގެ ބައްދަލުވުމުގައި އިންޑިއާގެ ކޯޗު ކޮންސްޓަންޓިން ބުނީ އިންޑިއާ އިން ނުކުތީ ރާއްޖެ އަކީ ދަށް ޓީމެއްގެ ގޮތުގައި ދެކިގެން ނޫން ކަމަށެވެ.
"އަހަރެމެން ރާއްޖެ އަންޑައެސްޓިމޭޓެއް ނުކުރަން. ރާއްޖެ އަށް އިހުތިރާމްކުރަން އަދި އެ މީހުންނަށް މަރުހަބާ ވެސް ކިޔަން. އަހަރެން ބުނާނީ މި މެޗުގައި ބަލިވީ އަހަރެމެން އަމިއްލަ އަށް ކުޅެން ޖެހޭ ފެންވަރަށް ނުކުޅެވޭތީއޭ. އަހަރެމެންގެ ފެންވަރުގައި ނުކުޅެވުނު. ރާއްޖޭން ވަރަށް ރަނގަޅަށް ކުޅުނު،" ކޮންސްޓަންޓިން ބުންޏެވެ.
ރޭގެ ފައިނަލުގައި ރާއްޖެ އަށް ފުރަތަމަ ލަނޑު ޖަހައިދިނީ އިބްރާހިމް މަހުދީ (ފޭދޫ އިއްބެ) އެވެ. ދެ ވަނަ ލަނޑު ދެ ވަނަ ހާފުގައި ކާމިޔާބުކުރީ އަލީ ފާސިރު (ސެންޓޭ) އެވެ. އިންޑިއާގެ ހަމައެކަނި ލަނޑު އިތުރު ވަގުތުގެ ތެރޭގައި ކާމިޔާބުކުރީ ސުމީތު ޕާސީ އެވެ.
"އަހަރެމެންނަށް ޕާކިސްތާނު މެޗުގައި ކުޅެވުނު ވަރަށް ނުކުޅެވޭ. އެއީ އެންމެ ބޮޑު މައްސަަލަ. އެކަމަކު ގަބޫލުކުރަން ޖެހޭ ޒުވާން ކުޅުންތެރިން ލައިގެން އެއް ފެންވަރެއްގައި ހިފެހެއްޓުމުގެ ތަޖުރިބާ މި ކުޅުންތެރިންގެ ނުހުންނާނެކަން. އެކަމަކު މި މެޗުގައި 15 މިނިޓް ކުރިން އަހަރެމެންނަށް ލަނޑެއް ޖެހުނު ނަމަ ނަތީޖާ އަނބުރާލެވޭނެ ކަމުގެ އުއްމީދެއް އޮތް،" ކޮންސްޓަންޓިން ބުންޏެވެ.
ޕާކިސްތާނާ ދެކޮޅަށް ކުޅުނު މެޗުގައި އިންޑިއާގެ އުއްމީދީ ތަރި ލަލިއަންޒުއާލާ ޗަންޓޭ އަށް ރަތް ކާޑު ދެއްކުމުން އޭނާ ފައިނަލަށް ހުރީ ސަސްޕެންޑްވެފަ އެވެ. ކޮންސްޓަންޓިން ވަނީ އޭނާ ނެތްތަން ދެއްކި ކަމަށް ބުނެފަ އެވެ.
"ލަލިއަންޒުއާލާ ހުރި ނަމަވެސް އަހަރެމެން އޭނަ ފަށާނީ ބެންޗުން. އެއީ ޕާކިސްތާން އަތުން ސެމީގައި ހޯދި މޮޅަށް ފަހު އަހަރެން ޓީމު ބަދަލެއް ނުކުރާނަން. އެކަމަކު ޔަގީނުން ވެސް ލަލިއަންޒުއާލާ ބެންޗުން އަރައި ވެސް ތަފާތެއް ދައްކާނެ. އެ ވިސްނުމުގައި ބުނަންޏާ އޭނާ ނެތުމަކީ ގެއްލުމެއް،" ކޮންސްޓަންޓިން ބުންޏެވެ.
އިންޑިއާ އިން މި ފަަހަރުގެ މުބާރާަތަށް 23 އަހަރުން ދަށުގެ ޓީމެއް ގެނައީ ޒުވާން ކުޅުންތެރިން ވާދަކުރާނެ މުބާރާތެއް ނުލިބޭތީ އެވެ. އަދި މި ފަހަރުގެ އޭޝިއަން ގޭމްސް އަށް އިންޑިއާގެ ޒުވާން ޓީމު ނުފޮނުވަން އިންޑިއާގެ އޮލިމްޕިކް ކޮމިޓީން ނިންމުމުންނެވެ.
"ޒުވާން ކުޅުންތެރިންތަަކަަކަށް ރަނގަޅު ތަޖުރިބާއެއް ހޯދައި މިދިނީ. މުބާރާތް ނިންމާލަން މި ޖެހުނީ އަހަރެމެން ބޭނުންވި ގޮތަކަށް ނޫން. އެކަަމަކު ކުރިއަށް އޮތް ހައެއްކަ އަހަރަށް އިންޑިއާގައި ކުޅޭނެ ޒުވާން ކުޅުންތެރިންތަކަކަށް އަގުހުރި ފުރުސަތެއް މި ހޯދައިދެވުނީ،" ކޮންސްޓަންޓިން ބުންޏެވެ.
އޭނާ ބުނީ އިންޑިއާ އަތުން ރާއްޖޭން މި މެޗުގައި ހޯދި މޮޅާ އެކު މަރުހަބާ ކިޔަން އިންޑިއާ އިން ފަސް ޖެހެން ޖެހޭ ސަބަބެއް ނެތް ކަމަށާއި ކުޅިވަރުގައި އޮންނަނީ މޮޅުވުމާއި ބަލިކަން ގަބޫލުކުރަން ޖެހޭ ކަމަށެވެ.