އިންޑިއާގެ މިހާރުގެ ކޯޗު އިންގްލެންޑްގެ ސްޓެފަން ކޮންސްޓަންޓިން އަކީ ދެކުނު އޭޝިއާގެ ފުޓްބޯޅަ އަށް އާ މޫނެއް ނޫނެވެ. އޭނާ ވަނީ މީގެ 20 އަހަރު ކުރިން ވެސް މި ސަރަހައްދުގެ ފުޓްބޯޅައިގައި ވެސް މަސައްކަތް ކޮށްފަ އެވެ. އެގޮތުން 1999 އިން 2001 އަށް ނޭޕާލަށް އަދި 2002 އިން 2005 އަށް އިންޑިއާގެ ކޯޗުކަން ކުރި އެވެ. އޭރު އާދައިގެ ކޯޗެއްގެ ގޮތުގައި ހުރި ނަމަވެސް މިހާރު އޭނާ އިންޑިއާގައި ކުރަމުން އަންނަނީ މުހިއްމު މަސައްކަތެކެވެ. ބަންގްލަދޭޝްގައި އޮތް މި އަހަރުގެ ސާފް ސުޒުކީ ކަޕަށް 23 އަހަރުން ދަށުގެ ޓީމެއް ގެނެސް ރާއްޖެ އަތުން ފައިނަލުން ބަލިވި ނަމަވެސް އޭނާ ޖުމްލަކޮށް ކުރަމުން އަންނަ މަސައްކަތަށް ތައުރީފް ހައްގެވެ. އޭނާ މިވަނީ އިންޑިއާގެ ކުޅުމުގެ ސްޓައިލް ބަދަލުކޮށް އެއް ފެންވަރެއްގައި ހިފަހައްޓައިފަ އެވެ.
"އަހަންނަށް އޭރު ވެސް މި ސަރަހައްދުގައި ފުޓްބޯޅަ ބަދަލުކުރެވޭނެ ކަމުގެ އުއްމީދު އޮތް. ދެ ވަނަ ފަހަރަށް އިންޑިއާ ކޯޗުކަމަށް އައި އެއް ސަބަބަކީ އެ އުއްމީދު އޮތުމުން،" 2015 ވަނަ އަހަރު އަލުން އިންޑިއާ ކޯޗުކަމަށް އަލުން އައި ސަބަބާ ބެހޭގޮތުން "މިހާރު"ން ކުރި ސުވާލަކަށް ކޮންސްޓަންޓިން ޖަވާބު ދިނެވެ.
އިންޑިއާގެ ކޯޗުކަމާއި 2015 ވަނަ އަހަރުގެ ޖެނުއަރީ މަހު ކޮންސްޓަންޓިން ހަވާލުވީ އޯލް އިންޑިއާ ފުޓްބޯލް ފެޑެރޭޝަން (އޭއެފްއެފް)އާ ގިނަ މަޝްވަރާތަކެއް ބޭއްވުމަށް ފަހު އެވެ. އަދި އޭނާ ބޭނުންވާ ގޮތަށް ކަންތައްތައް ކޮށްދޭނެ ކަމުގެ ޔަގީންކަން ވެސް ހޯދި އެވެ.
"އަހަރެން އަލުން މި ޓީމަށް އައިއިރު ފީފާ ރޭންކިންގައި މި ޓީމު އޮތީ 173 ވަނައިގައި. މިހާރު މި ޓީމު 96 ގައި. މީގެ ހުރިހާ ކްރެޑިޓެއް އަހަރެން ދޭނީ އޭއެފްއެފް އަށް. ފެޑެރޭޝަނުން އަހަންނަށް ފުރިހަމަ މިނިވަންކަން ދީގެން މި ހިސާބަށް އާދެވުނީ. ފުޓްބޯޅަ ތަރައްގީ ކުރަން އަހަރެން އެދުނު ކޮންމެ ވަސީލަތެއް ފުރިހަަމަ ކޮށްދިން،" ސާފުގެ ސެމީ ފައިނަލް މެޗަށް ފަހު "މިހާރަ"ށް ދިން އިންޓަވިއުއެއްގައި ކޮންސްޓަންޓިން ބުންޏެވެ.
އިންޑިއާ ފުޓްބޯޅަ ތަރައްގީ ކުރުމަށް ކޮންސްޓަންޓިން އެހީ ހޯދީ އެންމެ ޒަމާނީ ވަސީލަތްތަކުންނެވެ. އެ ގޮތުން ޔޫރަޕްގެ ތަޖުރިބާކާރު ސްޕޯޓްސް ސައިންސް ކޯޗެއް ހޯދި އެވެ. އަދި ކުޅުންތެރިންގެ ޓްރެއިނިންތައް ކުރިއަށްގެންދަން އެންމެ ފަހުގެ ޖީޕީއެސް ސިސްޓަމެއް ވެސް ހޯދި އެވެ.
"އަހަރެން މަސައްކަތްކުރާނެ މާހައުލެއް ގާއިމްކުރިން. އެއީ އަހަރެންގެ ޕްލޭނުގެ ފެށުން. ފުރަތަމަ ކަމަކަށް އަހަރެންގެ ސްޕޯޓްސް ސައިންސް ކޯޗު ޑެނީ ޑީގަން އޭނަގެ ރޯލު މީގައި ވަރަށް ފުރިހަމަ. ދެން އަހަރެން ފެޑެރޭޝަނުގައި އެދުނިން އެންމެ ފަހުގެ ޖީޕީއެސް ޕްލޭޔަ ޓްރެކިން ސިސްޓަމެއް ހޯދަން. އެކަން ފެޑެރޭޝަނުން ކުރީ 20،000 ޑޮލަރަށް ވުރެން ބޮޑު ހޭދައެއް ކޮށްފައި،" ކޮންސްޓަންޓިން ބުންޏެވެ.
"(އެ ޖީޕީއެސް ސިސްޓަމުން) އަހަރެމެންގެ ކުޅުންތެރިންގެ ހުރިހާ މައުލޫމާތެއް އަހަރެމެން އެއްކުރަން. ޓްރެއިނިން ތެރޭގައި. ޓްރެއިނިން ކޭމްޕްތެރޭގައި އެ މީހުން ކުރާ ހުރިހާ ކަމެއް ދިރާސާކުރަން. ވީޑިއޯ އެނަލައިސިސް ރިޕޯޓްތައް ދިރާސާކުރަން. މި ހުރިހާ ކަމެއް އަހަރެމެންނަށް އެހީތެރިވޭ،"
ކޮންސްޓަންޓިންގެ ނަޒަރުގައި އެންމެ ފުރިހަމަ މަސައްކަތެއް ކޮށްދޭ އަނެއް ފަރާތަކީ ފިޒިއޯ ޖީޖީ ޖޯޖް އެވެ. ކުޅުންތެރިން ފިޓްކޮށް ބެހެއްޓުމުގައި ހުރިހާ ކްރެޑިޓެއް ހައްގުވާ ފަރާތަކީ އޭނާ އެވެ.
"އަހަރެން ދެކެން ބައެއް ފަހަރު ދަންވަރު ވެސް ކުޅުންތެރިން ފިޓްކޮށް ބަހައްޓަން ބޭނުންވާ މައުލޫމާތު ހޯދުމާއި އޭގެ އެކި މަސައްކަތުގައި އޭނާ (ޖޯޖް) އުޅޭތަން. އޭނާ އަކީ މިހާތަަނަށް އަހަރެން ދުށް އެންމެ ހީވާގި ފިޒިއޯ،" ކުރިން ސޫދާން ގައުމީ ޓީމަށް ވެސް ކޯޗުކޮށްދިން ކޮންސްޓަންޓިން ބުންޏެވެ.
އިންޑިއާ ފުޓްބޯޅަ މިހާރު ހޯދަމުން އަންނަ ތަރައްގީގެ ފެށުމަކީ އެ ގައުމުގެ ދެ ފުޓްބޯޅަ ލީގެވެ. އައި ލީގާއި މަޝްހޫރު ގިނަ ކުޅުންތެރިންތަކެއް ކުޅެމުން އަންނަ ސުޕަ ލީގެވެ. ކޮންސްޓަންޓިން ދެކޭ ގޮތުގައި އެއީ ވަރަށް މުހިއްމު ދެ ލީގެވެ.
"އަހަރެމެންނަށް ކުޅުންތެރިން މި ލިބެނީ ހަތް ދުވަހަށް. ދެ ހަފްތާ އަށް ނޫނީ ހަމައެކަނި ފީފާ ދުވަސްތަކުގައި. އެ މުއްދަތަށް ކުޅުންތެރިން އަންނައިރު ގަވައިދުން އެ ކުޅުންތެރިން މެޗުތައް ކުޅެފައި ތިބުން މުހިއްމު. ވާދަވެރި ރަނގަޅު މެޗުތަކެއް ކުޅެގެން ކުޅުންތެރިން ކުރިއަރާނީ. އައި ލީގާއި ސުޕަ ލީގުގެ ވަރުގަދަވުމަކީ އިންޑިއާ ފުޓްބޯޅަ އެހެން ލެވެލަކަށް ދިއުމުގެ ފެށުން. އަހަރެމެން މި އޮތީ ރަނގަޅު ޓްރެކުގައި،" ކޮންސްޓަންޓިން ބުންޏެވެ.
އިންޑިއާގެ ކުޅުންތެރިން ފުޓްބޯޅައިގައި ކާމިޔާބުވުމުގައި އެންމެ ފުރަތަމަ ކުރި ކަމަކީ ވިސްނުން ބަދަލުކުރުން ކަމަށާއި އެކަމަށްޓަކައި އެ ކުޅުންތެރިންނަށް ޝުކުރު އަދާކުރަން ޖެހޭ ކަމަށް ކޮންސްޓަންޓިން ވަނީ ބުނެފަ އެވެ.
"މި ކުޅުންތެރިންނަށް ޝުކުރު އަދާކުރަން ޖެހޭ. އެއީ އެ މީހުން ވަރަށް ހިތްވަރުގަދަ. ފުރަތަމަ ކަމަކަށް ވިސްނުން ބަދަލުކުރީ. އެއީ ނުވާނެ ކަމެއް ނޯންނާނެކަމަށް ވިސްނުން. އަހަރެން އެ ކުޅުންތެރިންނަށް ކިތަންމެ ގިނަ ޓްރެއިނިންތަކެއް ކުރިއަށް ގެންދިޔަސް ޝަކުވާއެއް ނުކުރޭ،" ކޮންސްޓަންޓިން ބުންޏެވެ.
ބައިނަލްއަގްވާމީ ލެވެލްގައި އަބަދުވެސް ވިސްނަން ޖެހޭނީ މޮޅެތި ޓީމުތަކާ ކުޅެގެން ކާމިޔާބު ހޯދުމަށް ކަމަށާއި އިންޑިއާގެ ފުޓްބޯޅަ ޓީމުތައް ކުޅެންވީ ކުރިއަރާފައިވާ ގައުމުތަކާ ދެކޮޅަށް ކަމަށް ކޮންސްޓަންޓިން ގަބޫލުކުރެ އެވެ. ސީނިއާ ޓީމު އޭޝިއަން ކަޕަށް ދާތީ އޭނާ ސާފް ސުޒުކީ ކަޕަށް 23 އަހަރުން ދަށުގެ ޓީމު ގެނައީ ވެސް ޒުވާން ކުޅުންތެރިންނަށް ޕްރެޝަރުގައި ވަރުގަދަ މެޗުތަކެއް ކުޅުމުގެ ފުރުސަތު ދިނުމުގެ ގޮތުންނެވެ.
"އީރާން، ދެކުނު ކޮރެއާ ދެން އޮތް އޭޝިއާގެ ޓީމުތަކުން ވެސް ކުޅެނީ މަޝްހޫރު ޓީމުތަކާ ދެކޮޅަށް. އަހަރެމެންގެ ކުޅުންތެރިން ވެސް ކުޅެންވީ ބޮޑެތި ޓީމުތަކާ ދެކޮޅަށް. އޭރުން ކުރިއަރާނީ. އޭޝިއަން ކަޕުގައި އަހަރެމެންނަށް މި ހުޅުވެނީ ދޮރެއް. އެ ހިސާބުން ނިމުނީއެއް ނޫން. ދެން ކުރިއަށްދާންވީ،" އިތުބާރާ އެކު ކޮންސްޓަންޓިން ބުންޏެވެ.
އިންޑިއާގެ ފުޓްބޯޅަ ކުރިއަރައިގެންދާ ދުވެލި ކިތަންމެ ބާރު ކަމުގައި ވިޔަސް ބޮޑެތި ހުވަފެންތައް ދެކެން އަދި އަވަސް ކަމަށް ކޮންސްޓަންޓިން ގަބޫލުކުރެ އެވެ. އެންމެ ރަނގަޅު ގޮތަކީ ހަރުފަތަކަށް ފަހު ހަރުފަތެއް މައްޗަށް ދިއުން ކަމަށް ވެސް އޭނާ ދެކެ އެވެ.
"އަހަރެން ނުބުނާނަން މި ޓީމަށް ގަތަރުގައި 2022 ވަނަ އަހަރު އޮތް ވޯލްޑް ކަޕަށް ދެވޭނެ ކަމަށް. އެއީ އަދި ކިރިޔާ ފެންވަރު ރަނގަޅުކޮށްގެން މަސައްކަތް މި ފެށީ. އަހަރެމެންގެ 16 އަހަރުން ދަށުގެ ޓީމާއި 19 އަހަރުން ދަށުގެ ޓީމު މިހާރު އެ އޮތީ ރަނގަޅު ޓްރެކުގައި. ވަރުގަދަ މެޗުތަކެއް އެބަކުޅޭ. އެ މީހުން ތަރައްގީ ވެގެން ފުޓްބޯޅައިގެ ބޮޑު މައިދާންތަކަށް ގޮސްގެން އަދި ބޮޑެތި ހުވަފެންތަކަށް ތައްޔާރުކުރެވޭނީ. އެހެންވެ ފުރަތަމަ ވިސްނަންވީ ދެން އޮތް ލެވެލްތަކަށްދާން ދުރަށް ވިސްނާނީ ފަހުން،" މުސްތަގުބަލާ ބެހޭގޮތުން ކޮންސްޓަންޓިން ބުންޏެވެ.
އޭނާ ބުނީ އިންޑިއާ ޓީމުގައި ހިމެނޭ ހުރިހާ ކުޅުންތެރިންގެ މައުލޫމާތުތައް ބަރާބަރަށް ރައްކާކުރާ ކަމަށާއި އެއީ މުސްތަގުބަަލަށް ބަލާއިރު މުހިއްމުކަން ބޮޑު ކަމެއް ކަމަށެވެ.
"އަހަރެން އިންޑިއާއާ ހަވާލުވި ފަހުން 38 އާ ކުޅުންތެރިން މި ޓީމުގައި ކުޅުވައިފިން. އެއީ އެކި އުމުރުފުރާގެ ކުޅުންތެރިން. މި ހުރިހާ ކުޅުންތެރިންނާއި މި ޓީމުގެ ޓްރަޔަލްތަކުގައި ބައިވެރިވާ އެހެން ކުޅުންތެރިންގެ މައުލޫމާތުތައް އަހަރަމެން ރައްކާކުރަން. އެ ކުޅުންތެރިން ކްލަބްގައި އުޅޭގޮތް މޮނިޓާ ވެސް ކުރަން. މިއީ ފުޓްބޯޅަ ތަރައްގީ ވެފައި އޮތް ގައުމުތަކުގައި އެކަން ކުރާގޮތް،" ކޮންސްޓަންޓިން ބުންޏެވެ.
އިންޑިއާގެ ގިނަ ބަޔަކު އަދިވެސް ފުޓްބޯޅައާ މެދު އެހާ އުއްމީދީ ނަޒަރަކުން ނުދެކޭ ކަމަށާއި އެއީ ކްރިކެޓާއި ހޮކީ ފަދަ ކުޅިވަރުތަކަށް އޮތް ލޯބި ބޮޑުކަމުން ކަމަށް ކޮންސްޓަންޓިން ދެކެ އެވެ. އެކަމަކު އެ ހުރިހާ ކަމެއް ބަދަލުވާނީ އުއްމީދާ އެކު މަސައްކަތްކޮށްގެން ކަމަށާއި ކައިރި މުސްތަގުބަލެއްގައި އެ ގައުމަށް ފުޓްބޯޅައިގައި ރަނގަޅު ހިސާބެއްގައި ފައިތިލަ ސާބިތުކުރެވޭނެ ކަމަށް ކޮންސްޓަންޓިން ގަބޫލުކުރެ އެވެ.