އިންތިހާބުގެ މައްސަލަ ކޯޓަށް ވައްދާނެ ކަމުގެ އިޝާރާތެއް ޕީޕީއެމުން ދީފި

ނިމިދިޔަ ރިޔާސީ އިންތިހާބުގައި ޝައްކާއި ވަހުމް އުފެދޭ ބޮޑެތި މައްސަލަތައް ހުރި ކަމަށް ވިދާޅުވެ އިންތިހާބުގެ މައްސަލަ ކޯޓަށް ވައްދާނެ ކަމުގެ އިޝާރާތެއް ވެރިކަން ހިންގާ ޕީޕީއެމްގެ ވިލިމާލޭ ދާއިރާގެ މެންބަރު އަހުމަދު ނިހާން ހުސެއިން މަނިކު ދެއްވައިފި އެވެ.

މިއަދު ޕީޕީއެމް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ނިހާން ވިދާޅުވީ މީގެ ކުރިން 2013 ގައި ބޭއްވި ރިޔާސީ އިންތިހާބުގައި މައްސަލަ އުފެދުމުން އެކަމަށް ވެސް ކޯޓުން ފަރުވާ ހޯދާފައިވާ ކަމަށެވެ.

"އެއް ޕާޓީއަށް ވުރެ ގިނަ ޕާޓީ ބައިވެރިވާ ދެ އިންތިހާބެއް ރާއްޖޭގައި ބޭއްވި ނިމިއްޖެ. ދެ ވަނަ އިންތިހާބުގެ ތެރޭގައި ވެސް ޝައްކާއި ވަހުމްތައް އުފެދިގެން ދިޔަ މިންވަރުން އޭގެ ފަރުވާ ހޯދުމަށްޓަކައި ރާއްޖޭގެ ޝަރުއީ ނިޒާމުގެ އެންމެ މަތީ ގެތަކާ ހަމައަށް ދަތުރުކޮށް އެ ހައްލު ހޯދައިގެން ދިވެހި ރައްޔިތުން ވަނީ ދަތުރު ފަށައި ކާމިޔާބުކަމާއެކީ ކުރިއަށް ގޮސްފައި،" އޭނާ ވިދާޅުވި އެވެ.

"މިއަދު، މީގެ 24 ގަޑިއިރު ކުރިއަށް، ހަމަ ގައިމު ވެސް 23 ސެޕްޓެމްބަރުގެ ފަހުން އިންތިހާއަށް ބޮޑެތި ޝައްކުތައް އުފެދޭ ވަރުގެ ވާހަކަތައް ފެންމަތިވެއްޖެ."

ވޯޓާމެދު ރައްޔިތުންނަށް ޝައްކު އުފެދޭ ކަމެއް ދިމާވެއްޖެ ނަމަ އެކަމެއް އޮޅުންފިލުވައިދިނުމަކީ ޕީޕީއެމްގެ ޒިންމާއެއް ކަމަށް ވެސް ނިހާން ވިދާޅުވި އެވެ. އަދި އެފަދަ މައްސަލަތަކުގައި ހައްލު ހޯދުމަށް "ދާން އޮތް ދިމާލަކަށް ދާންޖެހޭނެ" ކަމުގައި ވެސް ނިހާން ވިދާޅުވި އެވެ.

"ހަމަ ގައިމު ވެސް ސިޔާސީ ޕާޓީއެއްގެ ގޮތުން ޕީޕީއެމް މީގެ ޒިންމާ ނަގަންޖެހޭނެ ރައްޔިތުންނަށް އެކަން އޮޅުންފިލުވައިދިނުމުގެ. ރައްޔިތުން ކުރަމުންދާ ޝަކުވާއެއް ނުވަތަ ހާއްސަކޮށް ޕީޕީއެމަށް ތާއީދު ކުރައްވާ މަސައްކަތުގައި ބައިވެރިވެވަޑައިގެންނެވި ރައްޔިތުން ޕީޕީއެމްގެ އޮފީހާ ހަމައަށް، ޕީޕީއެމްގެ ވެރިންނާ ހަމައަށް އަދި ޕީޕީއެމްގެ އަތޮޅުތަކުގެ ގޮފިތަކާ ހަމައަށް ގެނެސްދެއްވަމުން ގެންދަވާ މައްސަލަތަކުގަ ހުރި ސީރިއަސްކަން ރައްޔިތުންނަށްޓަކައި ވެސް އަޅުގަނޑުމެން އަޑުއަހާ އެކަމަށް ފަރުވާ ހޯދުމަށްޓަކައި ދާން އޮތް ދިމާލަކަށް ދާންޖެހޭނެ،" އޭނާ ވިދާޅުވި އެވެ.

ނިމިދިޔަ ރިޔާސީ އިންތިހާބުގެ އެއްވެސް މައްސަލައެއް ޕީޕީއެމްގެ ފަރާތުން ކޯޓަށް ހުށަހަޅުއްވާނެތޯ "މިހާރު" އިން ސުވާލު ކުރުމުން ނިހާން އެކަމަށް ސީދާ ޖަވާބެއް ނުދެއްވަ އެވެ. ނަމަވެސް މައްސަލައެއް އުޅޭ ކަމުގެ އެކަށީގެންވާ ހެކި ހޯދިއްޖެ ނަމަ ޕީޕީއެމުން ކޯޓަށް ދާނެ ކަމަށް އޭނާ ވިދާޅުވި އެވެ.

"އެފަދަ މައްސަލައެއް، އެ ފެންވަރަށް އެ މިންވަރަށް، އަޅުގަނޑުމެންނަށް ސާބިތުކަމާއެކު ކަމާ ބެހޭ ފަރާތްތަކުން، ދައުވާތަކުން ނިމިއްޖެ ކަމަށްވާ ނަމަ ނުދާންވީ އެއްވެސް ސަބަބެއް ވިދާޅުވެލައްވާ ދިވެހި އެއްވެސް ރައްޔިތަކު،" ނިހާން ވިދާޅުވި އެވެ.

ޕީޕީއެމުން ރޭ ބޭއްވި މުޒާހާރާގައި ރައީސް ޔާމީން ވާހަކަފުޅު ދައްކަވަނީ: އިންތިހާބުގެ ނަތީޖާ ގަބޫލު ނުކުރައްވާ ކަމަށް ރޭ ވަނީ ރައީސް ވިދާޅުވެފައި -- ފޮޓޯ / މިހާރު

ޕީޕީއެމުން ރޭ ބޭއްވި މުޒާހަރާއެއްގައި ރައީސް އަބްދުﷲ ޔާމީން ވަނީ ރިޔާސީ އިންތިހާބުގެ ނަތީޖާ ގަބޫލު ނުކުރައްވާ ކަމަށް ވިދާޅުވެފަ އެވެ. އަދި އިލެކްޝަންސް ކޮމިޝަނާއި އެ ކޮމިޝަނުގެ ރައީސް އަހުމަދު ޝަރީފަށް ބަޔަކު ނުފޫޒު ފޯރުވާފައިވާ ކަމަށް ވެސް ރައީސް ވަނީ ވިދާޅުވެފަ އެވެ.

"ހަގީގަތުގައި ވެސް ހިތާހިތާ ސުވާލު ކުރަން ޖެހޭ މިއީ ހަމަ އަސްލު ވެސް އަޅުގަނޑުމެންނަށް ލިބުނު ވޯޓު ހެއްޔޭ. މި ތަނުގައި މި އިވޭ ޝުއޫރަކީ މިއީ. ހަމަ ހަގީގަތުގައި ވެސް އަޅުގަނޑަށް ގަބޫލު ކުރެވޭ މި އަށް ވުރެ ގިނައިން އަޅުގަނޑަށް ވޯޓު ލިބޭނީ،" ރައީސް ވިދާޅުވި އެވެ.

އިލެކްޝަންސް ކޮމިޝަނަށް އަދި އޭނާ އަށް އެއްވެސް ބައެއްގެ ނުފޫޒު ފޯރާފައިނުވާކަން ކޮމިޝަނުގެ ރައީސް ޝަރީފް ވަނީ ތަކުރާރުކޮށް ވިދާޅުވެފަ އެވެ. އަދި އިންތިހާބުގެ ނަތީޖާ ހުރިހާ ފަރާތްތަކަކުން ބަލައިގަތުމަށް ވެސް އޭނާ ވަނީ ގޮވާލައްވައިފަ އެވެ.