ބޮލީވުޑްގެ ޚަބަރުތައް ކުރުކޮށް

މި އަހަރު ބޮކްސް އޮފީހުގައި 100 ކްރޯޑު ރުޕީސް އަށް ވުރެ ބޮޑު އާމްދަނީއެއް ހޯދި ފިލްމު "ސޯނޫ ކޭ ޓިޓޫ ކީ ސްވީޓީ" އަހަރުގެ އެންމެ ހައިރާން ކުރުވަނިވި ބޮޑުު ހިޓެވެ. ސަބަބަކީ މާ މަޝްހޫރުން ނޫން ތަރިންތަކެއް ލީޑް ރޯލް ކުޅުނު ފިލްމު ބެލުމްތެރިންގެ ހިތްތައް ފަތަހަކޮށް، އާދަޔާހިލާފު ބޮޑު އާމްދަނީއެއް ހޯދުމެވެ.

އަނެއްކޮޅުން މި ފިލްމުގެ ބޮޑު ކާމިބީއާ އެކު ޒުވާން އެކްޓަރު ކާތިކް އާރިޔަންގެ މަގުބޫލުކަން ވަނީ ފަޓާހެއްހެން އަރައިގެން ގޮސްފަ އެވެ. އެހެންވެ އޭނާގެ ސޮއި ހޯދަން މިހާރު ކިޔޫގައި ތިބި ޑައިރެކްޓަރުންނާއި ޕްރޮޑިއުސަރުންގެ އަދަދު ގިނަ އެވެ.

ހަމައެއާ އެކު ބެލުންތެރިން އަންނަނީ ކާތިކުގެ އިތުރު ފިލްމަކަށް އިންތިޒާރު ކުރަމުންނެވެ. އޭނާގެ ޖާދޫ އަލުން އަނެއްކާ ވެސް ބޮޑު ސްކްރީނުގައި ތަޖުރިބާކޮށްލަން ބޭނުން ވަނީ އެވެ. އުފާވެރި ހަބަރަކީ އޭނާގެ ދެ ފިލްމެއް ޔަގީނުން ވެސް އަންނަ އަހަރު ރިލީޒް ވާން އޮތުމެވެ. އެއީ "ލުއްކާ ޗުއްޕީ" އާއި ކަންނާޑާ ފިލްމު "ކިރިކް ޕާޓީ" ގެ ހިންދީ ރިމެކް އެވެ.

ކާތިކް އާއި ކިރިތީ ސެނަން ލީޑް ރޯލުން ފެނިގެންދާ ރޮމޭންޓިކް ކޮމެޑީ "ލުއްކާ ޗުއްޕީ" ގެ ފަސްޓްލުކް މިހާރު ވަނީ ދައްކާލައިފަ އެވެ.

ފިލްމުގެ ފަސްޓްލުކް ދައްކައިލީ ބުރާސްފަތި ދުވަހު ފާހަގަ ކުރި ކާތިކް 30 ވަނަ އުފަން ދުވަހާ ދިމާކޮށެވެ.

"ހިންދީ މީޑިއަމް" އާއި "ސްޓްރީ" ފަދަ ކާމިޔާބު ފިލްމުތައް ގެނެސް ދިން ދިނޭޝް ވިޖަން ޕްރޮޑިއުސްކޮށްފައިވާ "ލުއްކާ ޗުއްޕީ" ޑައިރެކްޓްކޮށްފައި ވަނީ ލަކްޝްމަން އުޓޭކަރު އެވެ. ފިލްމުގެ އިތުރު ކާސްޓުންގެ ތެރޭގައި އަޕަރްޝަކުތީ ކުރާނާ، ޕަންކަޖު ތުރިޕަތީ އަދި ވިނޭ ޕަތަކު ހިމެނެ އެވެ.

ކާތިކް އާއި ކިރިތީ މީޑިއާގައ މަސައްކަތް ކުރާ ދެ މީހުންގެ ގޮތުގައި ފެނިގެންދާ "ލުއްކާ ޗުއްޕީ" ސިނަމާތަކަށް ގެންނަން ނިންމާފައި ވަނީ މާޗް، 29، 2019 ގަ އެވެ.

އަންނަ އަހަރު ގެނެސް ދޭން ނިންމާފައިވާ "ކިރިކް ޕާޓީ" ގެ ހިންދީ ރިމެކުން ކާތިކުއާ އާ އެކު ބަތަލާގެ ރޯލުން ފެނިގެން ދާނީ ޖެކްލިން ފެނާންޑޭޒެވެ.

ރިޕޯޓްތައް ބުނާ ގޮތުން މަޝްހޫރު ޑައިރެކްޓަރު އިމްތިއާޒް އަލި އަންނަ އަހަރު ގެނެސް ދޭން ނިންމާފައިވާ ފިލްމުން ވެސް ކާތިކް ފެނިގެން ދާނެ އެވެ. އެ ފިލްމުގެ ބަތަލާއަކީ ސާރާ އަލީ ހާން ކަމަށްވެ އެވެ.

އަންނަ މަހުގެ 28 ގައި ރިލީޒް ކުރާ ރަންވީރު ސިންގްގެ އާ ފިލްމު "ސިމްބާ" ގެ ޝޫޓިން ނިންމާލައިފި އެވެ.

ކަރަން ޖޯހަރު ޕްރޮޑިއުސްކޮށް، ރޯހިތު ޝެޓީ ޑައިރެކްޓްކޮށްފައިވާ މި މަސާލާ ފިލްމުގެ ޝޫޓިން ފެށީ މިދިޔަ ރޯދަ މަހުގެ ތެރޭގަ އެވެ. "ސިމްބާ" ގެ ޝޫޓިން ނިންމައިލުމަށް ފަހު، ރަންވީރު، ރޯހިތާއި ފިލްމުގެ ޓީމަށް ޝުކުރު އަދާކޮށްފައިވާ ވީޑިއޯއެއްވެސް ފިލްމުގެ ޓީމުން ވަނީ ސޯޝަލް މީޑިއާގައި ހިއްސާކޮށްފަ އެވެ.

އޭގައި ރަންވީރު ބުނީ ރޯހިތަކީ ވަރަށް ވަރުގަދަ ޑައިރެކްޓަރެއް ކަމަށާއި "ސިމްބާ" އަކީ ބެލުންތެރިން ވަރަށް ގަޔާވާނެ ފިލްމަކަށް ވާނެ ކަމަށެވެ. މި ފިލްމުގައި ރަންވީރު ފެނިގެން ދާނީ ލާނެއް އެކަމަކު ސީރިއަސް ފުލުހެއްގެ ރޯލުންނެވެ. ފިލްމުގެ ބަތަލާއަކީ ސާރާ އަލީ ހާނެވެ.

ބަތަލާ ދީޕިކާ ޕަދްކޯންއާ ކައިވެނި ކުރުމަށް ފގު، ރަންވީރު ސްކްރީނުން ފެނިގެންދާ ފުރަތަމަ ފިލްމު "ސިމްބާ" ގެ ޓްރެއިލާ އަންނަ މަހުގެ 3 ގައި ދައްކައިލާނެ އެވެ.

"ބާހްބަލީ" ފަދަ ވަރުގަދަ އަދި މޮޅެތި ފިލްމުތައް ހަދާފައިވާ އިންޑިއާގެ ސައުތު ފިލްމު އިންޑަސްޓްރީގެ ހުނަރުވެރި ޑައިރެކްޓަރު އެސްއެސް ރާޖަމޯލީގެ ދަރިފުޅު އެސްއެސް ކަރުތިކެޔާ ފިލްމު ޕްރޮޑިއުސް ކުރަން ނިންމައި، އޭނާގެ ފުރަތަމަ ފިލްމު އިއުލާންކޮށްފި އެވެ.

ފިލްމަށް ދީފައިވާ ނަމަކީ "އާކާޝްވާނީ" އެވެ. މީގެ ޑައިރެކްޝަން ހަވާލުކޮށްފައި ވަނީ ރާޖަމޯލީގެ އެސިސްޓަންޓެއްގެ ގޮތުގައި ކުރިން މަސައްކަތްކޮށްފައިވާ އަޝްވިން ގަންގަރާޖު އެވެ.

އަންނަ ޖެނުއަރީގައި ފިލްމުގެ ޝޫޓިން ފަށަން ތާވަލުކޮށްފައިވާ އިރު، މި ފިލްމުން ފެނިގެން ދާނީ ސައުތުގެ ތަރިންނެވެ.

ޕްރިޔަންކާ ޗޯޕްޅާގެ ފިލްމު ކުންފުނި ޕާޕަލް ޕެބެލް ޕިކްޗާޒް (ޕީޕީޕީ) އިން ސިއްކިމް ބަހުން އުފައްދާފައިވާ ފިލްމު "ޕަހޫނާ: ދަ ލިޓްލް ވިޒިޓާސް" ގެ ޓްރެއިލާ ދައްކާލައިފި އެވެ.

ޖޯން އަބްރަހަމްއާ އެކު 2010 ގެ "ޖޫތާ ހީ ސަހީ" ގައި ބަތަލާގެ ރޯލް ކުޅުނު ޕާކީ އޭ ޓައިރެވާލާ ޑައިރެކްޓްކޮށްފައިވާ މި ފިލްމު ސިނަމާތަކަށް ގެންނަން ނިންމާފައި ވަނީ އަންނަ މަހުގެ 7 ގަ އެވެ.

ޕާކީއަކީ އިމްރާން ހާން ބޮލީވުޑަށް ތައާރަފު ކުރި ފިލްމު ޖާނޭ ތޫ...ޔާ ޖާނޭ ނާ (2010) ގެ ޑައިރެކްޓަރު އައްބާސް ޓައިރެވާލާގެ އަންހެނުންނެވެ.

ޕާކީ ސްކްރީންޕްލޭ ވެސް ލިޔުނު "ޕަހޫނާ" ގައި ކިޔައި ދޭނީ މައިންބަފައިންނާ ވަކިވާ ތިން ކުއްޖެއްގެ މެދުގައި އުފެދޭ ބަދަހި ގުޅުމާ އެކު އިންޑިއާ އަށް އެތެރެވާން ކުރާ މަސައްކަތެވެ.

މި އަހަރުގެ ޓޮރޮންޓޯ އިންޓަނެޝަނަލް ފިލްމު ފެސްޓިވަލް (ޓީއައިއެފްއެފް) ގައި ޕްރިމިއާކޮށްހެން "ޕަހޫނާ" އަށް ވަނީ ބެސްޓް ފިލްމު ޖޫރީގެ އެވޯޑް ވެސް ލިބިފަ އެވެ. އަދި މި އަހަރު ޖަރުމަނުގައި ބޭއްވި އިންޓަނެޝަނަލް ޗިލްޑްރެން ފިލްމު ފެސްޓިވަލާއި އެ ނޫން އެހެން ބައެއް ފެސްޓިވަލްތަކުގައި ވެސް "ޕަހޫނާ" ވަނީ ޕްރިމިއާކޮށްފަ އެވެ.