ލަންޑަން (ޑިސެމްބަރު 11) - މޮރޮކޯ ގައުމީ ޓީމަށް ކުޅެން އެ ގައުމުގެ ފުޓްބޯޅަ ފެޑެރޭޝަނުން ދިން ހުށަހެޅުމަށް އާސެނަލްގެ މިޑްފީލްޑަރު މަޓެއޯ ގެންޑޫޒީ ނޫނެކޭ ބުނެފި އެވެ.
މި ސީޒަނުގައި އާސެނަލަށް ބަދަލުވެ، ގެންޑޫޒީ އަންނަނީ އެ ޓީމަށް މޮޅު ކުޅުމެއް ދައްކަމުންނެވެ. ސީޒަނުގެ ފުރަތަމަ މެޗުތަކުގައި ގެންޑޫޒީ ފުރަތަމަ އެގާރައިން ގަވައިދުން ފެނުނު ނަމަވެސް ފަހަކަށް އައިސް އޭނާ އަންނަނީ ބަދަލު ކުޅުންތެރިއެއްގެ ގޮތުގައި ވެސް ކުޅެމުންނެވެ.
ފްރާންސްގެ އެކި އުމުރުފުރައިގެ ގައުމީ ޓީމުތަކަށް ކުޅުނު ގެންޑޫޒީގެ ނިސްބަތްވަނީ މޮރޮކޯގެ އާއިލާ އަކަށެވެ. އެހެންވެ އެ ގައުމުގެ ފުޓްބޯޅަ ޓީމުގެ ކޯޗު ހާވް ރެނާޑް ވަނީ މޮރޮކޯ ފުޓްބޯޅަ ފެޑެރޭޝަން މެދުވެރިކޮށް ގެންޑޫޒީ ލައްވައި އެ ގައުމަށް ކުޅުވަން މަސައްކަތްކޮށްފަ އެވެ. އެކަމަކު ގެންޑޫޒީ ނިންމީ ފްރާންސަށް ކުޅޭށެވެ.
"އަހަރެން ހުރިހާ އިރެއްގައި ކުޅުނީ ފްރާންސަށް. އެކި އުމުރުފުރާ ގައުމީ ޓީމުތަކުގައި ފްރާންސް ޖޯޒީ ލައިގެން ކުޅެފިން. ދެން އަމާޒަކީ ފްރާންސް ސީނިއާ ޓީމަށް ކުޅުން،" ގެންޑޫޒީ ބުންޏެވެ.
ޕީއެސްޖީ އެކެޑަމީން ކެރިއަރު ފެށި ގެންޑޫޒީ އެ ޓީމު ދޫކޮށްލީ 2014 ވަނަ އަހަރު އެވެ. ދެން އޭނާ ބަދަލުވީ ލޮރިއެންޓް އަށެވެ. ލޮރިއެންޓަށް ކުޅެދިން ފުރަތަމަ ސީޒަނުގައި އެ ޓީމު ވަނީ ފްރާންސްގެ ދެ ވަނަ ޑިވިޝަނަށް ރެލިގޭޓްވެފަ އެވެ. މިދިޔަ ސީޒަނުގައި ފްރާންސް ދެ ވަނަ ޑިވިޝަނުގައި ލޮރިއެންޓް ހަތް ވަނައިގައި ނިންމާލި ނަމަވެސް އެ ޓީމުގައި ގެންޑޫޒީ ދެއްކި މޮޅު ކުޅުމުން އާސެނަލް ކޯޗުކަމާ ހަވާލުވެ، އުނާއި އެމެރީ ވަނީ އެ ޓީމަށް ގެންޑޫޒީ ގެނެސްފަ އެވެ.
"ޕީއެސްޖީ އެކެޑަމީގައި ހުރިއިރު އަހަރެން އުމުރުން 15 އަހަރުގައި ނިންމީ އެ ޓީމުގައި ހުރެގެން ކުރިއަށްދާން އުނދަގޫވާނެއޭ. އެއީ އެ ޓީމުގައި ނެތް މާ ބޮޑަށް ޒުވާން ކުޅުންތެރިން ތަރައްގީ ކުރުމުގެ ވިސްނުމެއް. މި ފަހަރު އަލުން ޕީއެސްޖީ އަށް ދާން ވެސް ފުރުސަތު ލިބުނު. އެކަމަކު އާސެނަލަށް އައީ މިއީ އެންމެ ރަނގަޅު ނިންމުމަށް ވާނެ ކަމުގެ ޔަގީންކަން އޮތުމުން،" އުމުރުން 19 އަހަރުގެ ގެންޑޫޒީ ބުންޏެވެ.
ފްރާންސް ގައުމީ ޓީމަށް މިހާރު ކުޅެމުން އަންނަ ގިނަ ކުޅުންތެރިންނަކީ ވެސް އެފްރިކާގެ ގައުމުތަކަށް އުފަން ކުޅުންތެރިންނެވެ. ޒުވާން އުމުުރުގައި ފްރާންސަށް އައިސް ގިނަ ކުޅުންތެރިންތަކެއް އަންނަނީ އުމުރުފުރާ ލެވެލުން ފެށިގެން ފްރާންސް ގައުމީ ޓީމަށް ކުޅެމުންނެވެ.