މެޑްރިޑް (އޭޕްރިލް 4) – ޔުރޮޕާ ލީގުގެ ސެމީ ފައިނަލުގައި ރޭ އެތުލެޓިކޯ މެޑްރިޑް އަތުން އާސެނަލް ބަލިވި މެޗުގައި އެ ޓީމުގެ ފްރާންސް ޑިފެންޑަރު ލޯރެން ކޮސިއެލްނީ އަށް ލިބުނު އަނިޔާއާ އެކު މި އަހަރުގެ ވޯލްޑް ކަޕުގައި އޭނާ ނުކުޅެވިދާނެ ކަމުގެ ބިރާ ކުރިމަތިވެއްޖެ އެވެ.
ފައިތިލަ އާއި ކުޑަކަޅުވާ ގުޅުވައިދޭ އަކިލެސް ޓެންޑަން އަށް ލިބުނު އަނިޔާއަކާ ގުޅިގެން މެޗުގެ 12 ވަނަ މިނެޓުގައި އޭނާ ވަނީ ބަދަލުކޮށްފަ އެވެ. އުމުރުން 32 އަހަރުގެ ކުޅުންތެރިޔާ މުޅި ސީޒަނުގައި ކަހަލަ ގޮތަކަށް އުޅުނީ އެފަދަ އަނިޔާއެއްގަ އެވެ.
"ފެންނަ ފެނުމަށް ވަރަށް ރަނގަޅެއް ނޫން. އަބަދުވެސް އުއްމީދުކުރެވިދާނެ ސްކޭންތަކުން ތަފާތު ނަތީޖާއެއް ދައްކާނެ ކަމަށް. އެކަމަކު ފުރަތަމަ ފެނުނު ނިޝާންތައް އެހާ ރަނގަޅެއް ނޫން،" އާސެނަލްގެ ކޯޗު އާސެން ވެންގާ ބުންޏެވެ.
އަކިލެސް ޓެންޑަން އިރައިގެން ގޮސްފައިވާ ނަމަ އޭނާ އަށް ވޯލްޑް ކަޕުގައި ކުޅުމުގެ ފުރުސަތެއް ނޯންނާނެ އެވެ. އެކަމަކު އެކަން އެނގޭނީ ސްކޭންތަކަށް ފަހު އެވެ.
ފްރާންސް ގައުމީ ޓީމަށް 2011 ވަނަ އަހަރުން ފެށިގެން 51 މެޗު ކުޅެދީފައިވާ ކޮސިއެލްނީ އަކީ ޑިޑިއޭ ޑިޝޯމްޕްސްގެ ކޯޗުކަމުގައި ގަވާއިދުން ޓީމަށް އަރާ ކުޅުންތެރިޔެކެވެ. އޭނާ ނެތިއްޖެ ނަމަ ފްރާންސް ޑިފެންސް ބަލަހައްޓާނީ ރެއާލް މެޑްރިޑުގެ ރަފައެލް ވަރާން އާއި ބާސެލޯނާގެ ސެމުއެލް އުމްޓީޓީ ކަމަށް ބެލެވެ އެވެ.