މޯލްޑިވް ގޭސްގެ ކުރީގެ މެނޭޖިން ޑައިރެކްޓަރު އަބްދުﷲ މައުމޫން (ގޭސް މާނު) ރާއްޖެއިން ފުރައިގެން ދިޔައީ އޭނާ ފުރުން މަނާކުރުމުގެ އަމުރަކަށް އެންޓި ކޮރަޕްޝަން ކޮމިޝަން (އޭސީސީ)ން ކޯޓުގައި އެދުމުން އެ އަމުރު ނުދިނުމުން ކަން އެނގިއްޖެ އެވެ.
ރައްޔިތުންގެ މަޖިލީހުގެ ސްޓޭޓް އެންޓަޕްރައިޒް ކޮމިޓީ (އެސްއޯއީ ކޮމެޓީ) އަށް އޭސީސީގެ މެމްބަރުން އިއްޔެ ހާޒިރުކޮށް ސުވާލު ކުރިއިރު، މެމްބަރަކު ކުރެއްވި ސުވާލަކަށް ޖަވާބު ދެއްވަމުން އޭސީސީގެ ނައިބު ރައީސް މުއައްވިޒް ރަޝީދު ވިދާޅުވީ ބަލަމުންދާ މައްސަލަތަކުގައި ކޯޓު އަމުރު ލިބުން ލަސްވުމާއި ކޯޓު އަމުރު ނުލިބުމުގެ މައްސަލަ ކޮމިޝަނަށް ދިމާވާ ކަމަށެވެ. އެގޮތުން ކުންފުންޏެއްގެ އެމްޑީ އަށް ގިނަ ތުހުމަތުތަކެއް ކުރެވޭ މައްސަލައެއްގައި އެމްޑީ ފުރުން މަނާކޮށްދިނުމުގެ އަމުރަކަށް އެދި ތިން ހަފުތާ ވީއިރު ގޮތް ނުނިންމާ ބާއްވާފައި ކޯޓުން ނިންމީ އަމުރު ނުދޭން ކަމަށް އޭނާ ވިދާޅުވި އެވެ.
"އެ އަމުރު އަޅުގަނޑުމެންނަށް ނުލިބި ތިން ހަފުތާ ވުމަށް ފަހު އެ އަމުރު ދެވެން ނެތް ކަމަށް ކޯޓުން އަންގާފައި ވަނިކޮށް ޖެހިގެން އައި ހަފްތާގައި އެ ބޭފުޅާ ރާއްޖޭން ބޭރަށް ފުރާ ވަޑައިގެންނެވީ،" މުއައްވިޒް ވިދާޅުވި އެވެ.
އެއީ ވިދާޅުވީ ކޮން ކުންފުންޏެއްގެ އެމްޑީއެއްގެ ވާހަކައެއްތޯ މެމްބަރަކު ސުވާލު އެއްސެވުމުން މުއައްވިޒް ވިދާޅުވީ ބަލަމުންދާ މައްސަލައަކަށް ވާތީ އެ އެމްޑީގެ ނަން ހާމަ ކުރެއްވުމަށް އުޒުރުވެރިވެވަޑައިގަންނަވާ ކަމަށެވެ. އެކަމަކު އެނގިފައިވާ ގޮތުގައި މުއައްވިޒް އެ ވިދާޅުވީ މާނުގެ ވާހަކަ އެވެ.
މުއައްވިޒް ވިދާޅުވި ގޮތުގައި ހުއްޓުވަން އުޅެނިކޮށް ފުރައިގެން ދިޔަ އެމްޑީ އޭގެ ފަހުން ރާއްޖެ އަށް އެނބުރި ނާންނަ ކަމަށާއި އެކަން ޕްރޮސެކިއުޓާ ޖެނެރަލް އައިޝަތު ބިޝާމްގެ ސަމާލުކަމަށް ނެގެސްފައިވާނެ ކަމަށެވެ. ބައެއް ފަރާތްތައް ތަހުގީގަށް ހާޒިރުވާން އިންކާރުކޮށްފައިވާ ކަމަށް ވެސް އޭނާ ވިދާޅުވި އެވެ.
"މިހާރު ވެސް އަޅުގަނޑުމެން ވާނީ ކޯޓު އަމުރަކަށް އެދިފައި ކުންފުންޏެއްގެ ބޯޑު މެމްބަރު ތަހުގީގަށް ހާޒިރުވާން އިންކާރުކުރުމުން ކޯޓު އަމުރެއް މެދުވެރިކޮށް ފުލުހުންގެ ހައްޔަރުގައި ބަހައްޓައިގެން ހާޒިރުކޮށްދޭން،" އޭނާ ވިދާޅުވި އެވެ.