އައްޑޫ އިންޓަނޭޝަނަލް އެއާޕޯޓް އޮތީ ބޮޑު ރިސްކެއްގައި ކަމަށާއި، އެތަނުގެ ފެންވަރު ބެލުމަށް ކުރި އޮޑިޓްތަކުން ވެސް ފެއިލްވެފައިވާ ކަމަށް އެތަން ހިންގާ ކުންފުނިން މިއަދު ބުނެފި އެވެ.
މިއަދު މެންދުރު ފަހު މަޖިލީހުގެ އެސްއޯއީ ކޮމިޓީގައި، އައްޑޫ އިންޓަނޭޝަނަލް އެއާޕޯޓް ކޮމްޕެނީގެ ޑިރެކްޓަރު އިބްރާހިމް ނޫރައްދީން ވިދާޅުވީ، އައްޑޫ އެއާޕޯޓަކީ 1984 ތަރައްގީކޮށްފައިވާ މުސްކުޅި އެއާޕޯޓެއް ކަމަށެވެ. އޭރު އެއާޕޯޓް ތަރައްގީކުރީ އޮސްޓްރޭލިއަން އެއިޑްގެ ދަށުންނެވެ.
"އޭރު ހެދިގޮތަށް އެ އޮންނަނީ. އިކުއިޕްމެންޓްތަކެއް ބަދަލެއް ނުކުރޭ. ޓަވަރުގަ މިހާރު ވެސް އެ ހުރީ އޭރު ބެހެއްޓި އިކުއިޕްމެންޓްތައް. އެގޮތަށް އޮޕަރޭޓް ކުރުމަކީ ވެސް ބޮޑު ރިސްކެއް،" އޭނާ ވިދާޅުވި އެވެ.
އިބްރާހިމް ނޫރައްދީން ވިދާޅުވީ، 1984 ގައި އައްޑޫ އެއާޕޯޓު ހެދި އިރު ޕްލޭން ކޮށްފައިވަނީ ދެ ފިޔަވައްސަކަށް ތަރައްގީކުރަން ކަމަށެވެ. ނަމަވެސް ދެ ވަނަ ފޭސްގައި އޭރު ކަނޑައެޅި ދިގުމިނަށް އެއާޕޯޓް ބޮޑުކުރެވުނީ ދާދި ފަހުން ކަމަށް އޭނާ ވިދާޅުވި އެވެ.
އޭރު ޕްލޭންގައި ބޮޑެތި މަތިންދާބޯޓުތަކަށް އައިސް ޖެއްސޭ ގޮތަށް ހަދަން އޮތް ނަމަވެސް އެ ކަންކަން ވެސް ހުރީ ނުކުރެވި އެވެ.
މިހާ ހިސާބަށް އައި އިރު ވެސް އައްޑޫ އެއާޕޯޓް ތަރައްގީކުރުމަށް މާ ބޮޑު އަޒުމެއް ސަރުކާރުގެ ނެތް ކަމަށާއި އައްޑޫ އެއާޕޯޓުގެ ހާލަތު އެހާ ދަށަށް ދިޔައީ އެހެންވެ ކަމަށް އޭނާ ވިދާޅުވި އެވެ.
އައްޑޫ އެއާޕޯޓު ކޮމްޕެނީގެ 70 ޕަސެންޓް ސަރުކާރަށް ނިސްބަތްވާ އިރު އެއާޕޯޓުގެ 30 ޕަސެންޓް ހިއްސާ 60 މިލިއަން ރުފިޔާއަށް ގަނެފައިވަނީ 2012 ވަނަ އަހަރު އެވެ. އޭގެ ފަހުން ހަތް އަހަރު ވެގެން ދިޔައިރު ވެސް އެއާޕޯޓުގެ ތަރައްގީއަށް މާ ބޮޑު މަސައްކަތްތަކެއް ކުރެވިފަ އެއް ނުވެ އެވެ. އެ އެއާޕޯޓް ތަރައްގީ ކުރުމަށް 44 މިލިއަން ޑޮލަރު ހަރަދު ކުރުމަށް އޭރު ޕްލޭންކޮށްފައިވެ އެވެ.
