ކުރީގެ ސަރުކާރުން 70 މިލިއަން ރުފިޔާއަށް ހިންގި މަޝްރޫއުތައް މި ސަރުކާރުން ހިންގަނީ 30 މިލިއަން ރުފިޔާ އަށް ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.
ރޭ ބޭއްވި ރައްޔިތުންގެ މަޖިލީހުގެ ޖަލްސާގައި މިނިސްޓަރު ވިދާޅުވީ، މި ސަރުކާރުން ޕްރޮޖެކްޓްތައް ހަވާލުކުރަނީ އޯޕަންކޮށް ޓެންޑަރިން ޕްރޮސެސްއެއްގެ ތެރެއިން ކަމަށް ވުމުން، މީގެ ކުރިން އަގުބޮޑުކޮށް ހިންގި ޕްރޮޖެކްޓްތައް ވަރަށް ބޮޑަށް އަގު ކުޑަކޮށްފައިވާ ކަމަށެވެ.
"ފެނާއި ނަރުދަމާގެ މަސައްކަތް 70 މިލިއަން ރުފިޔާ އަށް ކުރެވުނު މަސައްކަތް މިހާރު އަޅުގަނޑުމެންނަށް 30 މިލިއަން ރުފިޔާ އަށް ކުރެވޭ،" އޭނާ ވިދާޅުވި އެވެ.
އަމީރު ވިދާޅުވީ، ބަޖެޓުގައި ޕަބްލިކް ސެކްޓާ އިންވެސްޓްމެންޓް ޕްރޮގްރާމް (ޕީއެސްއައިޕީ) މަޝްރޫއުތަކުގެ ގޮތުގައި ހިމަނާފައިވާ ހުރިހާ ކަމެއްގެ ޓެންޑަރިން މަސައްކަތްތައް ފެށޭނެ ކަމުގެ ޔަގީންކަން އެބަ އޮތް ކަމަށެވެ.
ސަރުކާރުން ހުށަހަޅާފައިވާ 1.7 ބިލިއަން ރުފިޔާގެ ސަޕްލިމެންޓްރީ ބަޖެޓް ކޮމިޓީން ފާސްކޮށް މަޖިލީސް ތަޅުމަށް ފޮނުވާފައިވާ އިރު މިއަދު ބަޖެޓާ ގުޅޭ ގޮތުން މަޖިލީހުން ގޮތެއް ނިންމާނެ ކަމަށް ބެލެވެ އެވެ.
ސަޕްލިމެންޓްރީ ބަޖެޓާ އެކު ބަޖެޓުގެ ޖުމްލަ އަދަދު 31.9 ބިލިއަން ރުފިޔާއަށް އަރާނެ އެވެ. އަހަރުގެ މިހާ ހިސާބަށް އައި އިރު ބަޖެޓުގެ 50 ޕަސެންޓް ބޭނުންކޮށްފައިވާ ކަމަށް އަމީރު ވިދާޅުވެފައިވެ އެވެ.