އޮސްކާ އެވޯޑް ހޯދާފައިވާ ހޮލީވުޑްގެ މަޝްހޫރު ބަތަލާ ޖެނިފާ ލޮރެންސް ކައިވެނިކޮށްފި އެވެ.
މިދިޔަ ފެބްރުއަރީ މަހުގެ ކުރީކޮޅު ލޯބިވެރިޔާ ކުކް މެރޮނީއާ އެންގޭޖްވި ބަތަލާގެ ކައިވެނީގެ ހަފުލާ އޮތީ ރޯޑް އައިލެންޑްގެ ނިއުޕޯޓްގަ އެވެ. މީޑިއާތަކުން ރިޕޯޓްކޮށްފައިވާ އެތަނުގެ ވަރަށް ލަގްޒޫރިއަސް މެންޝަނެއްގައި ބޭއްވި ކައިވެނީގެ ހަފުލާގައި ބައިވެރިވީ 150 އެއްހާ މީހުންނެވެ. އޭގެ ތެރޭގައި ހިމެނެނީ އާއިލާގެ މީހުންނާއި ގާތް ބައެއް ރައްޓެހިންނެވެ.
ލޮރެސާއި މެރޮނީގެ ކައިވެނީގެ ހަފުލާގައި ބައިވެރިވި މަޝްހޫރު މީހުންގެ ތެރޭގައި އެމާ ސްޓޯން، ކެމެރެން ޑަޔަޒް، އެމީ ޝޫމާ، ލަވަކިޔުންތެރިޔާ އެޑެލް، ޑައިރެކްޓު ޑޭވިޑް އޯ. ރަސަލް، ކްރިސް ޖެނާ އަދި ސިއެނާ މިލާ ހިމެނެ އެވެ.
އެންގޭޖްމަންޓް އިއުލާންކުރިތާ ގާތްގަނޑަކަށް 10 މަސް ފަހުން ލޮރެންސް، 29، އާއި މެރޮނީ، 34، ކައިވެނިކުރި އިރު މި ދެ މީހުން އެންމެ ފުރަތަމަ ބައްދަލުވީ ލޮރެންސްގެ ރައްޓެއްސެއް ކަމަށްވާ ލައުރާ ސިމްޕްސަން މެދުވެރިކޮށް މިދިޔަ އަހަރުގެ ތެރޭގައި ކަމަށްވެ އެވެ. މެރޮނީއަކީ ނިއު ޔޯކްގެ ގްލެޑްސްޓޯން ގެލެރީގެ ޑިރެކްޓަރެވެ.
މެރޮނީއާ ރައްޓެހިވުމުގެ ކުރިން ލޮރެންސް ވަނީ ދުވަސްތަކެއް ވަންދެން ޑައިރެކްޓަރު ޑެރެން އެފްރޮނޯސްކީއާ ވެސް ލޯބީގެ ގުޅުމެއް ބާއްވައިފަ އެވެ. އެފްރޮނޯސްކީގެ ފިލްމު "މަދާ" ގައި ބަތަލާގެ ރޯލް ކުޅުނު ލޮރެންސާއި އެފްރޮނޯސްކީ ވަކިވީ 2017 ގަ އެވެ.
އެފްރޮނޯސްކީގެ އިތުރުން ލޮރެންސް އެކްޓަރު ނިކޮލަސް ހޯލްޓްއާ ވެސް ކުރިން ލޯބީގެ ގުޅުމެއް ބޭއްވި އެވެ.
"ހަންގާ ގޭމްސް" ފަދަ ފިލްމުތައް ކުޅުނު ލޮރެންސް އެންމެ ފަހުން ސްކްރީނުން ފެނިފައި ވަނީ ޖޫން މަހު ރިލީޒްކުރި "ޑާކް ފީނިކްސް" އިންނެވެ.