މި ޒަމާނަކީ ފިރިހެނުންނާ އެއްވަރަށް ނުވަތަ އެއަށް ވުރެ ބުރަކޮށް އަންހެނުން މަސައްކަތްކޮށްގެން އާމްދަނީ ހޯދާ ޒަމާނެކެވެ. އެހެންވެ ކުރިއާ ހިލާފަށް އެހެން މީހުންނަށް ބަރޯސާވެގެން ދިރިއުޅޭ އަންހެނުންގެ އަދަދު މިހާރު އަންނަނީ މަދުވަމުންނެވެ.
އާ ދިރާސާއެއްގައި ބުނާގޮތުން ކައިވެނިކޮށްގެން އުޅޭ ނަމަ، ފިރިމީހާ އަށް ވުރެ ބޮޑު އާމްދަނީއެއް އަނބިމީހާ އަށް ލިބޭ ނަމަ އެއީ ފިރިމީހާ އަށް ނަފްސާނީ ގޮތުން މައްސަލަތަކެއް ކުރިމަތިވެ އެވެ. އެކަމަކު މިއީ ވިސްނުމުގެ މައްސަލައަކުން ދިމާވާ ކަމެއްކަން ވެސް މި ދިރާސާ އިން ހާމަވެ އެވެ.
އިނގިރޭސިވިލާތުގެ ބާތު ޔުނިވަސިޓީން ހަދާފައިވާ ދިރާސާގައި ބުނިގޮތުގައި އާމްދަނީގެ މައްސަލާގައި ފިރިމީހާ އަށް އުނދަގޫތައް އެންމެ ބޮޑުވާ ހިސާބަކީ ގޭގެ ހަރަދުގެ 40 ޕަސެންޓަށް ވުރެ ބޮޑު ނިސްބަތެއް އަނބިމީހާ އަށް ބަރޯސާވާ ނަމަ އެވެ. އަދި މިއާ އެކު ގޭގެ ހުރިހާ ހަރަދެއް ސީދާ ހަމައެކަނި ފިރިމީހާ ބަލަހައްޓަން ޖެހުމަކީ ވެސް ފިރިންގެ ސިއްހަތަށް އޮތް ނުރައްކަލެކެވެ.
މިކަމުގެ ސަބަބުން ފިރިމީހާ ނަފުސާނީ ގޮތުންނާއި ޖިސްމާނީ ގޮތުންނާއި އިޖުތިމާއީ ގޮތުން ވެސް ބަލިކަށިކޮށްލާ ކަމަށް ދިރާސާގައި ބުންޏެވެ.
މި ދިރާސާ ހަދާފައި ވަނީ އެމެރިކާގެ 6،000 ދެމަފިރިއެއްގެ ދިރިއުޅުމުގެ ހާލަތު 15 ވަރަކަށް އަހަރު ވަންދެން ވަޒަންކޮށްގެންނެވެ. އެގޮތުން ދެމަފިރިން މަސައްކަތްކޮށްގެން އާމްދަނީ ހޯދާ އިރު، ފިރިމީހާ އަށް ވުރެ މަދުން (40 ޕަސެންޓަށް ވުރެ ދަށްކޮށް) އަނބިމީހާ އަށް އާމްދަނީ ލިބުމަކީ ފިރިންނަށް އެއްވެސް މައްސަލައެއް ނޫނެވެ. އަދި ދެ މީހުން ހިއްސާވެގެން ދިރިއުޅުމުގެ ހަރަދުތައް ބަލަހައްޓަމުން ދިޔަ ނަމަވެސް، ގޯސްވާ ހިސާބަކީ ފިރިމީހާގެ އާމްދަނީ އަށް ވުރެ އަނބިމީހާގެ އާމްދަނީ ބޮޑުވާ ހިސާބެވެ.
"އާންމު އުސޫލުތަކަށް ބަލާ އިރު އާމްދަނީ ހޯދާ މީހާ އަކީ ފިރިމީހާ. ހުރިހާ ހަރަދެއްގެ ޒިންމާ ނަގަން ޖެހޭ މީހަކީ ފިރިމީހާ،" ބާތު ޔުނިވަސިޓީގެ ސްކޫލް މެނޭޖްމަންޓްގެ އިކޮނޮމިސްޓް ޑރ. ޖޮއާނާ ސައިޑާ ވިދާޅުވި އެވެ. "އެހެންވެ މީގައި އެބަ އޮވޭ ދެ ޖިންސްގެ މެދުގައި އޮންނަ ފަރަގުތަކާ ދޭތެރޭ ދެކޭ ވިސްނުން ވެސް. އަނބިމީހާ އަށް ފިރިމީހާ އަށް ވުރެ ބޮޑު އާމްދަނީއެއް ލިބެން ޖެހޭ ކަމަށް ގަބޫލުނުކުރެވެނީ މިކަހަލަ ވިސްނުންތަކާ ހެދި."
އެކަމަކު ދިރާސާގައި ފާހަގަކޮށްފައިވާ ވަރަށް މުހިއްމު އެހެން ކަމެއް ވެސް އެބައޮތެވެ. އެއީ ކައިވެނިކުރާ އިރު، އަނބިމީހާ އަކީ ވަޒީފާއަދާކޮށްގެން ބޮޑު މުސާރައެއް ލިބޭނެ މީހެއްކަން ގަބޫލުކުރާ ފިރިންނަށް މި ޒާތުގެ މައްސަލަތައް ދިމާނުވުމެވެ.