ށ. މާއުނގޫދު އަށް ބަޔަކު އަރައި، އެ ރަށުގެ އެކި ތަންތަނުގައި އައިސިސްގެ ދިދަ ކުރެހި މައްސަލައެއް ތަހުގީގުކުރަން ފަށައިފި އެވެ.
ރަށު ކައުންސިލްގެ ނައިބު ރައީސް އަބްދުﷲ ހަމީދު ވިދާޅުވީ ދޯންޏެއްގައި ލަނޑާ ނަގަން އުޅުނު ބަޔަކު މާއުނގޫދޫ އަށް އަރައި 13 ވަރަކަށް ގޭގެ ފާރަށް އައިސިސްގެ ލޯގޯ ސްޕްރޭ ކޮށްފައިވާ ކަމަށެވެ. އެ މައްސަލަ ތަހުގީގުކުރުމަށް ފުލުހުންގެ ޓީމެއް މިއަދުގެ ވަގުތެއްގައި އެ ރަށަށް ދާނެ ކަމަށް އެނގިވަޑައިގެންފައިވާ ކަމަށް އޭނާ ވިދާޅުވި އެވެ.
މިކަން ކުރި މީހުން އައީ ރ. ދުވާފަރު ދޯންޏެއްގައި ކަމަށް ބައެއް ފަރާތްތަކުން ތުހުމަތުކުރާ ކަމަށް އޭނާ ވިދާޅުވި އެވެ.
"ދިދައިގައި ހުންނަ ލޯގޯ ފާރުތަކަށް ސްޕްރޭކޮށްފައި ހުރީ. އެ މަސައްކަތް ކޮށްފައިވަނީ މި ރަށުގެ ފިހާރައަކުން ކަޓަރާއި ސްޕްރޭ ފުޅި ގަނެގަން،" ހަމީދު ވިދާޅުވި އެވެ.
ޓެރަރިޒަމްގެ ގާނޫނަށް މި ފަހުން ގެނައި އިސްލާހުގެ ދަށުން އައިސިސް އަކީ ހަނގުރާމަވެރި ޖަމާއަތެއްގެ ގޮތުގައި ވަނީ ކަނޑައަޅައިފަ އެވެ. އަދި މިފަދަ ޖަމާއަތްތައް ޕްރޮމޯޓްކުރުމަކީ ކުށެކެވެ.
