ސަންޖޭ ލީލާ ބަންސާލީ 2021 ގައި ގެނެސްދޭން ނިންމާފައިވާ ފިލްމް "ބައިޖޫ ބަވްރާ" އިން އަޖޭ ދޭވްގަން އަށް ހުށަހެޅި ރޯލް އޭނާ ގަބޫލު ނުކޮށް، ދޫކޮށްލައިފި ކަމަށް ރިޕޯޓްތައް ބުނެފި އެވެ.
މީޑިއާ އިން ކުރިން ރިޕޯޓް ކޮށްފައިވާ ގޮތުން އާދައިގެ ދަނޑުވެރިކަމުން ކުޅަދާނަ ލަވަކިޔުންތެރިއަކަށް ބަދަލުވި މީހެއްގެ ވާހަކަ ކިޔައިދޭ ފިލްމުން އަޖޭ އަށް ހުށަހެޅީ ފިލްމުގެ ޓައިޓްލް ރޯލެވެ. އެހެންވެ އަޖޭ ހުރީ ފިލްމަށް އެއްބަސްވާން ތައްޔާރަށެވެ.
ނަމަވެސް ފަހުން އަޖޭ އަށް ހުށަހަޅާފައި ވަނީ ފިލްމުގެ ތަންސެންގެ ކެރެކްޓާ ކަމަށާއި އެއީ ފިލްމުގެ ޓައިޓްލް ރޯލާ އަޅައިބަލާ އިރު، އެހާ މުހިއްމު ކެރެކްޓާއަކަށް ނުވާތީ އަޖޭ އެ ރޯލަށް އެއްބަސްނުވީ ކަމަށް ބޮލީވުޑް ހަންގާމާ އިން ބުންޏެވެ. ތަންސެން އަކީ އަކަބްރު ރަސްގެފާނުގެ ދަރުބާރުގައި ހުނަރުތައް ދައްކަމުން ދިޔަ ކުޅަދާނަ ކްލަސިކަލް ލަވަކިޔުންތެރިއެކެވެ.
"ބައިޖޫ ބަވްރާ" 2021 ގެ ދިވާލީގައި ސިނަމާތަކަށް ގެންނަން ނިންމައި، ފިލްމު މިދިޔަ އޮކްޓޯބަރު މަހުގެ ތެރޭގައި އިއުލާންކުރި ނަމަވެސް، އޭގެ އެއްވެސް ކާސްޓެއް އަދި ރަސްމީކޮށް އިއުލާނެއް ނުކުރެ އެވެ. މި ފިލްމުގެ ކުރިން އަންނަ އަހަރު ބަންސާލީ އާލިއާ ބަޓާ އެކު "ގަންގްބާއީ" ކިޔާ ފިލްމެއް ގެނެސްދޭނެ އެވެ.
ބައެއް ރިޕޯޓްތައް ބުނާގޮތުން "ބައިޖޫ ބަވްރާ" ގެ ޓައިޓްލް ރޯލުން ފެނުމުގެ ފުރުސަތު ބޮޑީ ރަންވީރު ސިންގެވެ. އޭނާ މިހާތަނަށް ބަންސާލީއާ އެކު ތިން ފިލްމެއްގައި މަސައްކަތް ކޮށްފައި ވެ އެވެ. އަދި "ބައިޖޫ ބަވްރާ" ގެ ބަތަލާ އަކީ ޕްރިޔަންކާ ޗޯޕްޅާ ކަމަށް ވެ އެވެ.
ބަންސާލީގެ ހުށަހެޅުމެއް އަޖޭ ދޫކޮށްލި އިރު، 2015 ގައި ރިލީޒްކުރި "ބަޖިރާއޯ މަސްތާނީ" ވެސް އޭނާ އަށް ކުރިން ހުށަހެޅި އެވެ. އެކަމަކު އޭނާ ފިލްމު ވެސް ދޫކޮށްލުމުން އެ ފުރުސަތު ލިބުނީ ރަންވީރެވެ. ބަންސާލީއާ އެކު އަޖޭ މިހާތަނަށް މަސައްކަތްކުރި ހަމައެކަނި ފިލްމަކީ 1999 ގެ "ހަމް ދިލް ދޭ ޗުކޭ ސަނަމް" އެވެ.
ސަލްމާން ޚާނާއި އައިޝްވާރިޔާ ރާއީ ލީޑް ރޯލް ކުޅުނު ފިލްމްގައި އަޖޭ ކުޅުނީ ސަޕޯޓިން ރޯލެކެވެ.
"ބައިޖޫ ބަވްރާ" ގެ ނަމުގައި 1952 ގައި ވެސް ފިލްމެއް ގެނެސްދީފައިވެ އެވެ. އެ ފިލްމުގެ ތަރިންނަކީ މީނާ ކުމާރީ އާއި ބާރަތު ބުޝަނެވެ. ބޮޑު ކާސްޓެއް ހިމެނޭ އެ ފިލްމުގައި ތަންސެންގެ ކެރެކްޓާ ކުޅުނީ ސުރެންރުދަ އެވެ.