ވީޑިއޯ ގޭމް ސީރީޒް "އަންޗާޓެޑް" އަށް ބިނާކޮށް، ސޮނީ ޕިކްޗާސް އިން، އެ ނަމުގައި ހަދަން ނިންމާފައިވާ ފިލްމަށް އެއްބަސްވި ޑައިރެކްޓަރަކު އަނެއްކާ ވެސް ފިލްމު ދޫކޮށްލައިފި އެވެ.
ޓޮމް ހޮލަންޑާއި މާކް ވޮލްބާގް މައިގަނޑު ރޯލްތައް ކުޅެން ހަމަޖެހިފައިވާ ފިލްމު ދޫކޮށްލީ އޭގެ ޑައިރެކްޝަނާ އެންމެ ފަހުން ހަވާލުވި ޓްރާވިޒް ނައިޓެވެ.
ހޮލީވުޑް ރިޕޯޓާ އިން ބުނީ، މިދިޔަ އަހަރު ރިލީޒްކުރި "ބަމްބަލްބީ" ގެ ޑައިރެކްޓަރު "އަންޗާޓެޑް" ދޫކޮށްލީ ފިލްމުގެ ތާވަލް ރާވާފައިވާ ގޮތާ މެދު އެއްބަސްވުމަކަށް ނާދެވިގެން ކަމަށެވެ.
މި ފިލްމުގެ ޑައިރެކްޝަނާ ހަވާލުވެ، ފަހުން ފިލްމު ދޫކޮށްލި ޑައިރެކްޓަރުންގެ ތެރޭގައި "ނައިޓް އެޓް ދަ މިއުޒިއަމް" ފަދަ ފިލްމުތައް ގެނެސްދިން ޝޯން ލެވީ އާއި "10 ކްލޮވަފީލްޑް ލޭން" ގެ ޑައިރެކްޓަރު ޑޭން ޓްރެޗްޓެންބާގް ހިމެނެ އެވެ.
ކުރިން މި އަހަރުގެ ޑިސެމްބަރު 18 ގައި ސިނަމާތަކަށް ގެންނަން ތާވަލުކޮށްފައި އޮތް "އަންޗާޓެޑް" މިހާރު ރިލީޒްކުރަން ނިންމާފައި ވަނީ ޖުލައި 16، 2021 ގަ އެވެ.
ވޮލްބާގް 48، އެންމެ ފަހުން ސްކްރީނުން ފެނިފައި ވަނީ 2018 ގައި "އިންސްޓަންޓް ފެމިލީ" އިންނެވެ. އޭނާގެ ކުރިއަށް ހުރި ފިލްމުތަކުގެ ތެރޭގައި "ސްޕެންސާ ކޮންފިޑެންޝަލް" އާއި "ގުޑް ޖޯ ބެލް" އަދި "އިންފިނިޓް" ހިމެނެ އެވެ.
ސްޕައިޑަމާންގެ ރޯލް ކުޅޭ ޓޮމް 23، ގެ ކުރިއަށް ހުރި ފިލްމުތަކުގެ ތެރޭގައި "ކެއޯސް ވޯކިން" އާއި "ދަ ޑެވިލް އޯލް ދަ ޓައިމް" ގެ އިތުރުން "ޗެރީ" ހިމެނެ އެވެ. އޭނާ އެންމެ ފަހުން ފެނުނީ މިދިޔަ އަހަރު ބިލިއަން ޑޮލަރުގެ އާމްދަނީއެއް ހޯދި "ސްޕައިޑަ-މޭން: ފާ ފްރޮމް ހޯމް" އިންނެވެ.