ވޫހާންގައި ތިބި ދިވެހިން ގެންނާނީ ކަރަންޓީނަށް ފަހު

ޗައިނާގެ ވޫހާން ސިޓީގައި ތިބި ދިވެހިންގެ ތެރެއިން ރާއްޖެ އަންނަން ބޭނުންވާ މީހުން ގެނައުމުގެ މަސަައްކަތް ކުރަމުން އަންނަ ކަމަށާއި އެހެން ނަމަވެސް އެމީހުން ރާއްޖެ ގެންނާނީ އެހެން ގައުމެއްގައި ކަރަންޓީނުކޮށް، ރައްކާތެރިކަމުގެ ގޮތުން ފުރިހަމަ ކުރަން ޖެހޭ ކަންތައްތައް ފުރިހަމަކޮށްފައި ކަމަށް ސަރުކާރުން މިއަދު ބުނެފި އެވެ.

ވޫހާން އިން ކޮރޯނާ ވައިރަސްގެ އާ ވައްތަރެއް ފެނި، އެ ވައިރަސް ފެތުރެމުން ދާތީ އަޅަމުން އަންނަ ފިޔަވަޅުތަކުގެ މައުލޫމާތު ދިނުމަށް ރައީސް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރު އަބްދުﷲ ޝާހިދު ވިދާޅުވީ ވޫހާންގައި ތިބި ނުވަ ދިވެހިންގެ ތެރެއިން ރާއްޖެ އަންނަން އެދިފައި ވަނީ ހަތް މީހުން ކަމަށާއި އެމީހުން ގެނައުމުގެ މަސައްކަތް ކުރަނީ އެހެން ގައުމެއްގެ އެހީގައި ކަމަށާއި އެމީހުން ފުރަތަމަ ގެންދާނީ އެ ގައުމަށް ކަމަށެވެ. އެކަމަކު އެމީހުން ގެންދާނީ ކޮން ގައުމަކަށް ކަން ޝާހިދު ވިދާޅެއް ނުވެ އެވެ. އޭނާ ވިދާޅުވީ ވޫހާންގައި ތިބި ދިވެހިން ގެންނަން ކުރާ މަސައްކަތް ކާމިޔާބުވާނެ ކަމަށާއި ލަހެއް ނުވެ އެމީހުން ގެނެވޭނެ ކަމަށެވެ.

"އެ ގެންނަ މީހުން ގެންނަނީ ސީދާ ރާއްޖެއަށް ކަމުގައި ނުވާތީ އެ ގެންދެވޭ ގައުމެއްގެ ޕަބްލިކް ހެލްތު އުސޫލުތަކުގެ މަތިން، އެ ކުރަން ޖެހޭ ކަރަންޓީނެއް ގެ މުއްދަތު ނިންމާފައި ނޫނީ ރާއްޖެ ގެނެވޭކަށް ނެތް،" ޝާހިދު ވިދާޅުވި އެވެ.

ވޫހާންގެ އިތުރުން ޗައިނާގެ އެހެން ސަރަހައްދުތަކުގައި ތިބި ދިވެހިން ރާއްޖެ އައުމަށް ޓަކައި ހިލޭ ދަތުރުކުރެވޭނެ އިންތިޒާމެއް ކުރިން ވަނީ ހަމަ ޖައްސައިފަ އެވެ. އެގޮތުން މޯލްޑިވިއަން ދަތުރުކުރާ ޗައިނާގެ ފަސް މަންޒިލުން ވެސް މީހުންނަށް ހިލޭ އާދެވޭ ގޮތަށް ސަރުކާރުން ހަމަޖެއްސި އެވެ. ޝާހިދު ވިދާޅުވީ އެ އިންތިޒާމްގެ ބޭނުންކޮށްގެން ރާއްޖެ އަންނަ ރަޖިސްޓްރީ ކުރީ އެންމެ ދެފަރާތަކުން ކަަމަށެވެ.

ކޮރޯނާ ވައިރަސް ފެތުރޭތީ ރާއްޖެއިން އަލަށް އެޅި ފިޔަވަޅުތައް ހާމަކުރަން ރައީސް އޮފީހުގައި މިއަދު ބޭއްވި ނޫސްކޮންފަރެންސް އަށް ފަހު ޓޫރިޒަމް މިނިސްޓަރު އަލީ ވަހީދު، ހެލްތު މިނިސްޓަރު އަބްދުﷲ އަމީން އަދި ފޮރިން މިނިސްޓަރު އަބްދުﷲ ޝާހިދު ވާހަކަ ދައްކަވަނީ. ފޮޓޯ: ނިޝާން އަލީ/މިހާރު

ނޮވެލް ކޮރޯނާ ވައިރަސް ފެތުރެން ފެށުމުން ޗައިނާގެ ގިނަ ސިޓީތަކެއް ކަރަންޓީނުކުރަން ފެށި އިރު އެ ގައުމުގައި އުޅޭ ކަމަށް، ބެއިޖިންގައި ހުންނަ ރާއްޖޭގެ އެމްބަސީ އަށް އަންގާފައި ވަނީ 69 މީހެކެވެ.

ވޫހާންގައި ތިބި ދިވެހިންގެ ހާލަތާ ބެހޭ ގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޝާހިދު ވިދާޅުވީ އެ ރަށް މުޅިން ބަންދުުކޮށްފައި އޮތުމުން އެރަށުގެ ހާލަތު ދަށް ކަމަށާއި ކާބޯތަކެތި ލިބުން ދަތިވެފައިވާ ކަމަށާއި އެހެންވެ އެ މީހުންނަށް ފައިސާގެ އިތުރު އެހީއެއް ލިބޭނެ ގޮތް ސަރުކާރުން ހަމަޖައްސައިދީފައިވާ ކަމަށެވެ.

"ރައީސުލް ޖުމްހޫރިއްޔާއާ ހަމައަށް އެ މައުލޫމާތު ދިއުމުން ރައީސުލް ޖުމްހޫރިއްޔާ ވަނީ ކޮންމެ މީހަކަށް ފަންސާސް ޑޮލަރު، ދުވާލަކަށް، ކާބޯތަކެތި ހޯދުމަށް އިތުރަށް ހަރަދުތައް ބޮޑުވެގެން ދިޔައިމާ، އެ ހަމަޖައްސަވައިދެއްވާފައި،" އޭނާ ވިދާޅުވި އެވެ.

ޗައިނާގެ ވޫހާން އިން މިދިޔަ އަހަރުގެ ފަހުކޮޅު ފެނުނު ކޮރޯނާވައިރަސް ޗައިނާގެ އިތުރުން 17 ގައުމަކުން ވަނީ ފެނިފަ އެވެ. އޭގެ ތެރޭގައި ދިވެހިން އެންމެ ގިނައިން ގޮސް އުޅޭ އިންޑިއާ، ސްރީ ލަންކާ އަދި މެލޭޝިއާ ވެސް ހިމެނެ އެވެ. މިހާތަނަށް 7،000 އަށް ވުރެ ގިނަ މީހުންގެ ގައިން މި ވައިރަސް ފެނިފައިވާއިރު މަރުވި މީހުންގެ އަދަދު ވަނީ 170 އަށް ވުރެ އިތުރުވެފަ އެވެ.