ކުޅުދުއްފުށީ ޕޯޓުގެ މުވައްޒަފުން މިއަދު މަސައްކަތްތައް ހުއްޓާލުމާ ގުޅިގެން، އެތަން ވަގުތީ ގޮތުން އޮޕަރޭޓް ކުރުމަށްޓަކައި މާލެއިން 40 ވަރަކަށް މުވައްޒަފުން ފޮނުވާ ގޮތަށް އެމްޕީއެލް އިން ނިންމައިފި އެވެ.
ސީއީއޯ މުހައްމަދު ޖުނައިދު "މިހާރު" އަށް މިރޭ ވިދާޅުވީ ކުޅުދުއްފުށީ ޕޯޓުގެ މުވައްޒަފުން މަސައްކަތް ހުއްޓާލީ މުސާރަ ބޮޑު ނުކޮށްގެން ކަމަށާއި އެ މީހުން އަމަލު ކުރި ގޮތާ ގުޅުވައިގެން މުސާރަ ބޮޑުކޮށް ނުދޭނެ ކަމަށެވެ.
"އެމީހުން މަސައްކަތް ހުއްޓާލިއޭ ކިޔާފައި އަޅުގަނޑުމެން މުސާރަ ބޮޑުކޮށް ނުދޭނަން. އެ މުވައްޒަފުންނާ ވާހަކަ ދައްކައިގެން، ސުލްހަވެރިކަމާ އެކު މިކަމަށް ހައްލެއް ގެނެވޭނެ ގޮތެއް އަޅުގަނޑުމެން ހޯދާނީ. ގާނޫނީ ގޮތުން ހޯދަންޖެހޭ ލަފާ ވެސް ހޯދާނަން،" ޖުނައިދު ވިދާޅުވި އެވެ.
އޭނާ ފާހަގަ ކުރެއްވި ގޮތުގައި ކުޅުދުއްފުށީ ޕޯޓުގެ މުވައްޒަފުންގެ މުސާރަ ބޮޑުކުރުމަށް އެދި ސޮއިކޮށްފައިވާ ލިޔުމެއް މިއަދު ހެނދުނު އޭނާއަށް ލިބިވަޑައިގަތެވެ. އެކަމަކު މުވައްޒަފުންނާ ވާހަކަ ދައްކައި މަޝްވަރާ ކުރުމަށް އެކަށީގެންވާ ފުރުސަތެއް ނުދީ، މަސައްކަތް ހުއްޓާލުމުން ހިތާމާ ކުރައްވާ ކަމަށް ޖުނައިދު ވިދާޅުވި އެވެ.
ޖުނައިދު ވިދާޅުވި ގޮތުގައި މައްސަލަ ހައްލުވަންދެން، ކުޅުދުއްފުށި ޕޯޓް ހިންގަން މާދަމާ ހެދުނު އެ ރަށަށް ދާ ޓީމާއެކު އޭނާ ވެސް ވަޑައިގަންނަވާނެ އެވެ. އަދި މާދަމާ މެންދުރެއްހާއިރު ކުޅުދުއްފުށި ބަނދަރު އަލުން އޮޕަރޭޝަނަށް ގެނެވޭނެ ކަމަށް އޭނާ ވިދާޅުވި އެވެ.
"ކުޅުދުއްފުށި ޕޯޓް އޮޕަރޭޓް ކުރެވޭ ވަރަށް މީހުން ގޮވައިގެން އަޅުގަނޑު މި ނައްޓާލަނީ. އެތަނުގެ ކޮންމެ މަގާމަކަށް މީހަކު ގޮވައިގެން މިދަނީ. މާލޭގައި އެބަތިބި ތަމްރީން ވެފައި ތިބި މީހުން. ކުޅުދުއްފުށީ ޕޯޓުގެ ސްޓާފުންނާ މަޝްވަރާކޮށް، ވަކި ގޮތަކަށް ނިމެންދެން، މިކޮޅުން ދާ މުވައްޒަފުން އެ ރަށުގައި ތިބޭނެ،" ޖުނައިދު ވިދާޅުވި އެވެ.
އޭނާ ވިދާޅުވީ މުސާރަ ބޮޑުނުކުރާ މައްސަލައެއްގައި މުވައްޒަފުން މަސައްކަތް ހުއްޓާލުމަކީ ގަބޫލު ކުރައްވާ ކަމެއް ނޫން ކަމަށެވެ. ހާއްސަކޮށް ރައްޔިތުންނަށް ހިދުމަތްދޭ ތަނެއްގެ މުވައްޒަފުން އެގޮތަށް އަމަލުކޮށްގެން ނުވާނެ ކަމަށް ޖުނައިދު ވިދާޅުވި އެވެ.
"އެއީ އަޅުގަނޑުމެން އެއް އިރެއްގައި ވެސް މަރުހަބާ ކިޔާނެ ކަމެއް ނޫން،" އޭނާ ވިދާޅުވި އެވެ.
ސީއީއޯ ތުހުމަތު ކުރައްވާ ގޮތުގައި މަސައްކަތް ހުއްޓާލީ، ކުޅުދުއްފުށީ ޕޯޓުގެ އިސް މުވައްޒަފުންތަކެއްގެ ރޭވުމެއްގެ މަތިންނެވެ.
ޖުނައިދު ވިދާޅުވީ ކުޅުދުއްފުށީ ޕޯޓުން އަދިވެސް ވަޒީފާ ދޭން ބޭނުންވަނީ އެ ރަށުގެ މީހުންނަށް ކަމަށެވެ. އެގޮތުން މިހާރު މަސައްކަތް ހުއްޓާލާފައި ތިބި މީހުންނަށް ވެސް އެ ފުރުސަތު އޮންނާނެކަން އޭނާ ފާހަގަކުރެއްވި އެވެ. އެކަމަކު ކުންފުނީގެ ގަވައިދުތަކުގެ ތެރެއިން އަމަލު ކުރާނެ ކަމަށް އޭނާ ވިދާޅުވި އެވެ.
ޖުނައިދު ވިދާޅުވީ ކުޅުދުއްފުށީ ޕޯޓާއި އައްޑޫ ޕޯޓް ހިންގަނީ ގެއްލުމާއެކުގައި ކަމަށެވެ. އަދި ކުޅުދުއްފުށީ ޕޯޓަށް ލިބޭ އާމްދަނީ އިތުރުކުރުމަށްޓަކައި މިހާރު ވެސް 22 ކޮޓަރީގެ ގެސްޓް ހައުސްއެއްގެ މަސައްކަތް ކުރަމުން އަންނަކަން އޭނާ ފާހަގަކުރެއްވި އެވެ.
"އަޅުގަނޑު ހަވާލުވިއިރު ހުރި އޮފީސް އިމާރާތެއް ގެސްޓް ހައުސްއަކަށް ޑިޒައިންކޮށް، 22 ކޮޓަރި އެ ނިމެނީ. މިވެސް އާމްދަނީ އިތުރުކުރަން ކުރާ ކަމެއް. އެހެންވީމާ މިކަން މުވައްޒަފުން ވެސް ދެނެގަންނަންޖެހޭ،" ޖުނައިދު ވިދާޅުވި އެވެ.