ކުޅުދުއްފުށީ ޕޯޓުގެ މުވައްޒަފުންގެ މުސާރަ ބޮޑު ނުކުރާތީ މަސައްކަތްތައް އިއްޔެ ހުއްޓާލި ނަމަވެސް، ގޮތް ދޫކޮށް މިއަދު އެ މީހުން އަލުން މަސައްކަތަށް ނުކުމެއްޖެ އެވެ.
އެމްޕީއެލްގެ ސީއީއޯ މުހައްމަދު ޖުނައިދު "މިހާރު" އަށް ވިދާޅުވީ މުވައްޒަފުން އަނބުރާ މަސައްކަތަށް ނުކުތީ، ކުޅުދުއްފުށީ ޕޯޓު ވަގުތީ ގޮތުން ހިންގުމަށް މާލެއިން އޭނާ ގެންދެވި 40 ވަރަކަށް މުވައްޒަފުން އެ ރަށަށް ގޮސް ކުރި މަޝްވަރާތަކަށް ފަހު ކަމަށެވެ.
"ކުޅުދުއްފުށީ ޕޯޓުގެ މުވައްޒަފުންނާ އަޅުގަނޑު މިއަދު ބައްދަލުކޮށް މަޝްވަރާ ކުރީމާ ވެސް އެ މީހުންގެ ޑިމާންޑަކަށް ވީ މުސާރަ ބޮޑުކުރުން. އަޅުގަނޑު ދެންނެވި ވަރަށް ސާފުކޮށް މި ދަނޑިވަޅަކު އެކަމެއް ނުކޮށްދެވޭނެއޭ. އެ މީހުން މަސައްކަތަށް ނުނިކުންނަ ނަމަ، މާލެއިން ގެންދިޔަ މުވައްޒަފުންނާއެކު ޕޯޓު އޮޕަރޭޝަނަށް ގެންނަނީއޭ. އެ ހިސާބުން އެ މީހުންގެ އިސް މުވައްޒަފުން ވެސް އެއްބަސްވެ އަނބުރާ މަސައްކަތަށް ނުކުތީ،" ޖުނައިދު ވިދާޅުވި އެވެ.
"މިހާރު ކުޅުދުއްފުށީ ޕޯޓުގެ އެންމެން މަަސައްކަތަށް ނުކުމެއްޖެ. ބަރާބަރަށް އެ ޕޯޓު މިދަނީ ހިންގަމުން."
ކުޅުދުއްފުށީ ޕޯޓުގެ މުވައްޒަފުންގެ މުސާރަ ބޮޑުކޮށްދިނުމަށް އެދި ޖުނައިދަށް ލިޔުމަކުން ހުށަހެޅީ އިއްޔެ ހެނދުނު ކަމަށް އޭނާ ރޭ ވިދާޅުވި އެވެ. އަދި މައްސަލަ ހައްލު ނުވުމުން، ޖުނައިދު ނިންމެވީ ކުޅުދުއްފުށީ ޕޯޓު ވަގުތީ ގޮތުން އޮޕަރޭޝަނަށް ގެނައުމަށްޓަކައި އެމްޕީއެލް މާލޭ ޕޯޓުގެ 40 ވަރަކަށް މުވައްޒަފުން ކުޅުދުއްފުއްޓަށް ގެންދިއުމަށެވެ.
އެ މީހުން ގޮވައިގެން ޖުނައިދު ވަނީ މިއަދު ހެނދުނު ކުޅުދުއްފުއްޓަށް ވަޑައިގެންފަ އެވެ. ނަމަވެސް މައްސަލަ ހައްލުވެ، ކުޅުދުއްފުށީ ޕޯޓުގެ މުވައްޒަފުން މަސައްކަތަށް ނުކުތުމުން، މާލެއިން ގެންދިޔަ މީހުން އަނބުރާ އަންނަން ދަތުރު ފަށާފައިވާ ކަމަށް ޖުނައިދު ވިދާޅުވި އެވެ.
ޖުނައިދު އަބަދުވެސް ވިދާޅުވަމުން ގެންދެވީ ކުޅުދުއްފުށީ ޕޯޓުގެ މުވައްޒަފުން މުސާރަ ބޮޑުކުރަން ޑިމާންޑް ކުރިޔަސް މި ވަގުތު އެކަން ނުކުރެވޭނެ ކަމަށެވެ. އަދި މުސާރަ ބޮޑުނުކުރުން ފަދަ ކަމަކާ ގުޅުވައިގެން، އާންމުންނަށް ދޭ ހިދުމަތެއް ހުއްޓާލުމަކީ ގަބޫލު ކުރައްވާނެ ކަމެއް ނޫން ކަމަށް ޖުނައިދު ރޭ ވިދާޅުވި އެވެ.
ޖުނައިދު ވިދާޅުވެފައި ވަނީ ކުޅުދުއްފުށީ ޕޯޓާއި އައްޑޫ ޕޯޓް ހިންގަނީ ގެއްލުމާ އެކުގައި ކަމަށެވެ. އަދި ކުޅުދުއްފުށީ ޕޯޓަށް ލިބޭ އާމްދަނީ އިތުރުކުރުމަށްޓަކައި މިހާރު ވެސް 22 ކޮޓަރީގެ ގެސްޓް ހައުސްއެއްގެ މަސައްކަތް ކުރަމުން އަންނަކަން އޭނާ ފާހަގަކުރެއްވި އެވެ.
"އަޅުގަނޑު ހަވާލުވިއިރު ހުރި އޮފީސް އިމާރާތެއް ގެސްޓް ހައުސްއަކަށް ޑިޒައިންކޮށް، 22 ކޮޓަރި އެ ނިމެނީ. މިވެސް އާމްދަނީ އިތުރުކުރަން ކުރާ ކަމެއް. އެހެންވީމާ މިކަން މުވައްޒަފުން ވެސް ދެނެގަންނަންޖެހޭ،" ޖުނައިދު ވިދާޅުވި އެވެ.