ކ. ހިންމަފުށީގައި ހުންނަ ޑްރަގް ޓްރީޓްމަންޓް އެންޑް ރިހެބިލިޓޭޝަން ސެންޓަރުން ފަރުވާ ހޯދަމުން އަންނަ ތިން މީހަކު ކޮވިޑް-19 އަށް އިއްޔެ ޕޮޒިޓިވް ވެފައިވާއިރު އެ މީހުންނަށް އެ ބަލި ޖެހުނު ގޮތެއް ނޭނގޭތީ ކަންބޮޑުވާ ކަމަށް، އެ ސެންޓަރު ހިންގާ، ނެޝަނަލް ޑްރަގް އެޖެންސީ (އެންޑީއޭ) އިން މިއަދު ބުނެފި އެވެ.
ރިހެބުން ތިން މީހަކު ޕޮޒިޓިވްވިކަން އެނގުނީ މީގެ ހަތަރު ދުވަސް ކުރިން އެތަނުން ނެގި 10 ރެންޑަމް ސާމްޕަލްގެ ނަތީޖާ އިއްޔެ ލިބުމުންނެވެ. ޕޮޒިޓިވްވި މީހުންގެ ތެރޭގައި ހިމެނެނީ އެ ތަނުން ފަރުވާ ހޯދަމުން އަންނަ ދެ ފިރިހެނަކާއި އަންހެނެކެވެ.
އެންޑީއޭގެ ލީގަލް އޮފިސާ، އަހުމަދު ހިލްމީ، "މިހާރު" އަށް މިއަދު ވިދާޅުވީ ކޮވިޑް-19 އެ ސެންޓަރުގައި ފެތުރުނަ ނުދޭން ކުރިއާލައި ހަރުދަނާ ފިޔަވަޅުތަކެއް އަޅާފައިވާ ކަމަށެވެ. އެގޮތުން މާލެ ލޮކްޑައުން ކުރުމުގެ އެއް ދުވަސް ކުރިން މިދިޔަ މަހުގެ 13 އިން ފެށިގެން، އެ ސެންޓަރުން ފަރުވާ ހޯދާ މީހުން ތަނުން ބޭރަށް ގޮސްފައިނުވާ ކަމަށް އޭނާ ވިދާޅުވި އެވެ. އަދި އެ ދުވަހުން ފެށިގެން ބޭރުން ވެސް އެ ސެންޓަރަށް މީހަކު ގޮސްފައި ނުވާ ކަމަށް އޭނާ ވިދާޅުވި އެވެ.
"ރިހެބުގައި މަސައްކަތްކުރާ ހިންމަފުށީ މުވައްޒަފުންނާ ވެސް މިތަނުން ފަރުވާ ހޯދާ އެއްވެސް މީހަކާ އޭގެ ފަހުން ބައްދަލުވެފައެއް ނުވާނެ. އެހާ ވެސް ހަރުކަށި ފިޔަވަޅުތަކެއް އަޅުގަނޑުމެން އަޅާފައިވާނީ،" ހިލްމީ ވިދާޅުވި އެވެ.
އޭގެ އިތުރުން އެ ސެންޓަރަށް ބޭރުން ގެންދާ ހުރިހާ އެއްޗެއް ވައްދަމުން އައީ ވެސް ޑިސްއިންފެކްޓް ކުރުމަށް ފަހުގައި ކަމަށް އޭނާ ވިދާޅުވި އެވެ.
"ކާ އެއްޗެހި ގެންނައިރު ވެސް ވަކި އެއްޗެއްގައި އެތަކެތި މި އެތެރެއަށް ވައްދަނީ. ކާ އެއްޗެހި އަޅާފައި ހުންނަ ތަކެތި ވެސް ސާފުކޮށް ޑިސްއިންފެކްޓް ކުރުމަށް ފަހު ތަކެތި ވައްދަނީ،" ހިލްމީ ވިދާޅުވި އެވެ.
ހިލްމީ ވިދާޅުވީ އެތަނުގެ ތެރޭގައި މުވައްޒަފުންނާއި ފަރުވާ ހޯދާ މީހުން އުޅޭއިރު ހަ ފޫޓް ދުރުމިނެއް ބަހައްޓައިގެން އުޅެން އަންގާފައިވާ ކަމަށެވެ. އެފަދަ ފިޔަވަޅުތަކެއް އަޅާފައިވަނިކޮށް އެތަނުން ކޮވިޑް-19 އަށް ބަޔަކު ޕޮޒިޓިވްވުމުން ވަރަށް ބޮޑު ކަންބޮޑުވާ ކަމަށް އޭނާ ވިދާޅުވި އެވެ.
"އަޅުގަނޑުމެންނަށް އެއްގޮތަކަށް ވެސް ނޭނގެ ކިހިނެއް ކަމެއް މި ބަލި މިއައީ މިތަނަށް. އެއްވެސް މީހަކު ބަލިވެއެއް ވެސް ނޫޅޭ. ހަމަ ރެންޑަމްކޮށް ނެގި ސާމްޕަލްތަކަކުން ޕޮޒިޓިވްމިވީ. އެންމެ ބޮޑު ކަންބޮޑުވުމަކީ ބަލި އައިގޮތެއް ނޭންގޭތީ. އެގޮތް އެނގޭނަމަތާ އެކަމަށް ފިޔަވަޅެއް ވެސް އެޅޭނީ،" ހިލްމީ ވިދާޅުވި އެވެ.
އެ ސެންޓަރުގައި 129 މީހުން މިހާރު ވެސް އަންނަނީ ފަރުވާ ހޯދަމުންނެވެ. އަދި އެތަނުގައި އުޅޭ މީހުން ތިބެނީ ތަނުގެ ތެރެއަށް ދޫކޮށްލައިފައި ކަމަށްވާތީ ގިނަ ބަޔަކާ ބައްދަލުވުމުގެ ފުރުސަތު ވެސް ބޮޑެވެ. އެހެންވެ ޕޮޒިޓިވްވި މީހުންގެ ފަރާތުން އެހެން މީހުންނަށް އެބަލި ފެތުރިފައިވުމުގެ ބިރު ވަނީ ހީވެފަ އެވެ.
ހިލްމީ ވިދާޅުވީ ޕޮޒިޓިވްވި ތިން މީހުން ކަރަންޓީނަށް ގެންދިއުމުގެ މަސައްކަތް ކުރަމުން އަންނަ ކަމަށެވެ. އަދި އެމީހުންނާ ކޮންޓެކްޓްވި މީހުން ދެނެގަނެ އެ މީހުން އައިސޮލޭޓް ކުރުމުގެ މަސައްކަތް ކުރަމުން އަންނަ ކަމަށް ވެސް ވިދާޅުވި އެވެ.
"ކަރަންޓީން ކުރެވޭނެ އިންތިޒާމާއި އައިސޮލޭޓް ކުރެވޭނެ އިންތިޒާމު ވެސް ތަނުގައި އަޅުގަނޑުމެން ވާނީ ހަމަޖައްސައިފައި. ފަރުވާ ދިނުމަށް ޑޮކްޓަރުންނާއި ނަރުހުން ވެސް ތިބޭނެ. ޕޮޒިޓިވްވި މީހެއް ވެސް އަދި އެހެން މީހެއް ވެސް ބަލިވެ ނޫޅޭ،" ހިލްމީ ވިދާޅުވި އެވެ.
ހިންމަފުށީފައި ހުންނަ ރިހެބުން ތިން މީހަކު ޕޮޒިޓިވްވުމުން އެ ރަށް އެޗްޕީއޭ އިން ވަނީ މޮނީޓަރިންގެ ހާލަތަށް ގެނެސްފަ އެވެ.