މޮސްކޯ (އޮގަސްޓް 11) - ކޮރޯނާވައިރަހަށް ރަޝިޔާގައި އުފެއްދި ވެކްސިން ބޭނުން ކުރުމުގެ ހުއްދަ ދެއްވާފައިވާ ކަމަށް ރައީސް ލަޑިމިއާ ޕުޓިން މިއަދު ވިދާޅުވެއްޖެ އެވެ.
ވެކްސިން ބޭނުން ކުރުމުގެ ހުއްދަ ރަޝިޔާގައި ދީފައި މިވަނީ އިންސާނުން ބޭނުންކޮށްގެން ޓްރަޔަލްތައް ކުރިއަށް ގެންދާތާ ދެ މަސް ފަހުންނެވެ. ރަޝިޔާގައި ފުޅާ ދާއިރާއެއްގައި، ގިނަ ބަޔަކަށް އޮކްޓޯބަރު މަހު ވެކްސިން ދިނުމަށް ހަމަޖެހިފައިވާ ކަމަށް އޮފިޝަލުން ވަނީ ބުނެފަ އެވެ.
ޕުޓިން ވިދާޅުވީ ވެކްސިން ޗެކް ކުރުމުގެ ހުރިހާ މަރުހަލާތަކެއް ނިމިފައިވާ ކަމަށެވެ. އަދި ދަރިކަނބަލުންނަށް ވެސް ވެކްސިން ދީފައިވާ ކަމަށް ވިދާޅުވި އެވެ.
ރަޝިޔާގެ ވެކްސިނަކީ ކޮރޯނާވައިރަހަށް ދުނިޔޭގައި ވެސް އުފެއްދި އެންމެ ފުރަތަމަ ވެކްސިންކަން ފާހަގަ ކުރައްވައި ޕުޓިން ވިދާޅުވީ މޮސްކޯގެ ގަމަލެޔާ އިންސްޓްޓިއުޓުން އުފެއްދި ވެކްސިނުން ކޮރޯނާވައިރަހަށް "ދެމެހެއްޓެނިވި ދިފާއެއް" އުފައްދާނެ ކަމަށެވެ.
ރަޝިޔާގެ ހެލްތު މިނިސްޓަރު މިޚައިލް މުރަޝްކޯ ވިދާޅުވީ އެ ގައުމުގެ ވެކްސިން އަކީ ކާމިޔާބު، ރައްކާތެރި ވެކްސިނެއް ކަމަށެވެ. އަދި އެއީ ކޮވިޑް-19އާ ދެކޮޅަށް އިންސާނިއްޔަތަށް ހޯދުނު ކާމިޔާބެއް ކަމަށް އޭނާ ވިދާޅުވި އެވެ.
ރަޝިޔާގެ ވެކްސިނަށް ދީފައިވާ ނަމަކީ ސްޕުޓްނިކް-ވީ އެވެ. ވެކްސިން އަށް ނަންދީފައި ވަނީ ދުނިޔޭގެ ފުރަތަމަ ސެޓެލައިޓުގެ ނަމާ ގުޅުވައިގެންނެވެ. ސްޕުޓްނިކް އަކީ ރަޝިޔާ ބަހުން ސެޓެލައިޓެވެ.
ރަޝިޔާގެ ވެކްސިންގެ އެކި މަރުހަލާތައް ކުރިއަށް ގެންދިޔަ ސްޕީޑާ މެދު ތަޖްރިބާކާރުން ވަނީ ކަންބޮޑުވުން ފާޅުކޮށްފަ އެވެ. ރަޝިޔާގެ ވެކްސިންގެ ރައްކާތެރިކަމާ މެދު ސުވާލު އުފައްދަނިކޮށް، ދުނިޔޭގެ ސިއްހަތު ޖަމިއްޔާ، ޑަބްލިއުއެޗްއޯ އިން މިދިޔަ ހަފުތާގައި ވަނީ ވެކްސިން އުފެއްދުމުގައި ބައިނަލްއަގުވާމީ ހުރިހާ ގައިޑްލައިންތަކަކަށް ތަބާވުމަށް ރަޝިޔާ އަށް އަންގައިފަ އެވެ. ޑަބްލިއުއެޗްއޯ އިން ބުނެފައި ވަނީ ސުޕުޓްނިކް-ވީ ވެކްސިންއާ ގުޅޭ ގޮތުން އެ ގައުމުގެ ކަމާބެހޭ ފަރާތްތަކާ މަޝްވަރާކޮށްފައިވާ ކަމަށެވެ.
ސްޓޭޖް ތިނެއްގައި މިހާރުވާ ކަމަށް ޑަބްލިއުއެޗްއޯ އިން އިއުލާންކޮށްފައިވާ ހަ ވެކްސިންގެ ތެރޭގައި ރަޝިޔާގެ ވެކްސިން އަދި ނުހިމެނެ އެވެ. ދުނިޔޭގެ އެކި ކުންފުނިތަކުން މިހާރު އަންނަނީ ކޮރޯނާވައިރަހަށް 100 އަށް ވުރެ ގިނަ ވެކްސިން އުފެއްދުމުގެ މަސައްކަތް ކުރަމުންނެވެ. އޭގެ ތެރޭން ބައެއް ވެކްސިން މިހާރު ވަނީ އިންސާނުން ބޭނުންކޮށްގެން ޓެސްޓްކޮށްފަ އެވެ. ގިނަ ތަޖްރިބާކާރުން ބުނަނީ ކޮރޯނާވައިރަހަށް ރަނގަޅު ވެކްސިނެއް ލިބޭވަރު ވާނީ އަންނަ އަހަރުގެ ކުރީކޮޅު ކަމަށެވެ.
