އެމެރިކާގެ އަންހެނަކު އޭނާގެ މާމަދަރިފުޅު ވިހައިފި އެވެ.

އިލިއޯނިގެ ޝިކާގޯގައި ދިރިއުޅޭ ޖޫލީ ލަވިން، 51، ވިހެއީ މި މަހުގެ 2 ގަ އެވެ. އޭނާ ވިހެއީ އަންހެން ކުއްޖެކެވެ. އާންމުކޮށް އަންހެނުން ނުވިހާ އުމުރެއްގައި ޖޫލީ ބަލިވެ އިނދެ ވިހަން ޖެހުނީ އޭނާގެ ދަރިފުޅު ބްރިއާނާ ލޮކްވުޑަށް ދިމާވެފައިވާ ދަރިމައިވުމުގެ މައްސަލައާ ހެދި، ބަލިވެނީންނާތީ އެވެ.

އެހެންވެ ސަރޮގޭޓްކޮށްގެން ދަރިއަކު ހޯދަން އާއިލާ އިން ވިސްނަން ފެށުމާ އެކު ޖޫލީ ވަނީ އޭނާގެ ދަރިފުޅުގެ ފިރިމީހާގެ ފަނި "އިންދައިގެން" ބަލިވެއިނދެ ވިހައިފަ އެވެ. މިގޮތަށް ނިންމައި މި ވާހަކަ ބްރިއާނާ ގެންދިޔައީ އިންސްޓަގްރާމްގައި ހިއްސާ ވެސް ކުރަމުންނެވެ. އޭނާ ބުނި ގޮތުގައި ދަރިއަކު ލިބޭތޯ ދެމަފިރިން ވަރަށް މަސައްކަތްކުރި ނަމަވެސް ސިއްހީ ގޮތުން ދިމާވެފައި ހުރި ކޮމްޕްލިކޭޝަންތަކަކާ ހެދި ބަލިވެއިންނަ ގޮތެއް ނުވެ އެވެ.

https://www.instagram.com/p/CHQan18hIXj/?utm_source=ig_embed&utm_campaign=loading

އެގޮތުން ދަރިއަކު ލިބޭތޯ ހަތް ސާޖިކަލް ޕްރޮސީޖާގެ އިތުރުން އިން-ވިޓްރޯ ފާޓިލައިޒޭޝަން (އައިވީއެފް) ވެސް ހެދި އެވެ. އެކަމަކު އެ ހުރިހާ ކަމެއް ނާކާމިޔާބުވުމުން ބައޮލޮޖިކަލް ގޮތުން ދަރިއަކު ދެން ހޯދެން އޮތީ ފިރިމީހާގެ ފަނީގެ އެހީގައި ސަރޮގެސީ ހަދައިގެން ކަމަށްވާތީ އެގޮތަށް އެކަން ކުރަން ނިންމީ އެވެ.

"ދެން ޑޮކްޓަރުން ވެސް އެގޮތަށް އިރުޝާދު ދޭން ފެށީމަ އެ އޮޕްޝަނަށް ދާން ނިންމީ،" ބްރިއާނާ ބުންޏެވެ.

https://www.instagram.com/p/CHYlry2hp2w/?utm_source=ig_embed&utm_campaign=loading

ސަރޮގޭޓްކޮށްގެން ދަރިއަކު ހޯދަން ނިންމުމާ އެކު ބްރިއާނާގެ މަންމަ ވަނީ އެކަން ކޮށްދޭނެ މީހަކީ އޭނާ ކަމަށް ބުނެފަ އެވެ. އެކަމަކު ބްރިއާނާ އާއި ފިރިމީހާ އެކަމާ ފުރަތަމަ ހެދީ ދެކޮޅެވެ. މަންމަގެ އުމުރަށް ވިސްނާފައި އެއީ ކުރަން ރައްކާތެރި ކަމަކަށް ނުވާނެ ކަމަށް ގަބޫލުކޮށް، އެއްބަސްނުވެވުނު ނަމަވެސް މަންމަ ދޫނުކޮށް ކިޔާވަރުން އެންމެ ފަހުން އެއްބަސްވީ އެވެ. އެކަމަކު އެއީ އެތަކެއް ޓެސްޓްތަކަކަށް ފަހު އެވެ. އަދި ޓެސްޓްތަކުން ޖޫލީ އަށް ބަލިވެއިނދެވިދާނެކަން ކަށަވަރުވުމުން ދަރިފަނި އިންދީ ފެބްރުއަރީ މަހުގެ 25 ގަ އެވެ.

މާމަދަރިފުޅު ވިހޭ ވާހަކަ ވެސް އާއިލާ އިންސްޓަގްރާމްގައި ހިއްސާކޮށް "ޖޫލީ އަކީ ރޮކްސްޓާއެއް" ގެ ގޮތުގައި ސިފަކޮށްފައިވެ އެވެ.

https://www.instagram.com/p/CGh81frh0M4/?utm_source=ig_embed&utm_campaign=loading

"މަންމަވި ގުރުބާނީއަށްޓަކައި އަބަދުވެސް ޝުކުރުވެރިވާނަން،" ބްރިއާނާ، 29، ބުންޏެވެ. "ވަރަށް ވަރަށް އުފާވެއްޖެ ދަރިއަކު ލިބުނީމަ. ދަރިފުޅު އުރާލަން ލިބުނު ފުރަތަމަ ހިނދުކޮޅުގައި އިހުސާސްކުރެވުނީ މަންމަ އަހަރެން ވިހާފައި މިގޮތަށް އުރާލަން ލިބުނީމަ ކުރެވުނު އިހުސާސްކަމާ ދޭތެރޭ އެއްވެސް ޝައްކެއް ނެތް."

ބްރިއާނާ ބުނިގޮތުގައި މަންމަ އަކީ ވަރަށް ކެތްތެރި މީހެކެވެ. މާބަނޑުވި ދުވަހުން ފެށިގެން ގޮސް ދަރިފުޅު ވިހެއުމާ ހަމައަށް އުފުލި ބުރަ އޭނާ ވަރަށް ގާތުން ތަޖުރިބާކުރި ކަމަށް ބުންޏެވެ.

https://www.instagram.com/p/CGppZ2mB0FX/?utm_source=ig_embed&utm_campaign=loading

ބްރިއާނާ ކިޔައިދިން ގޮތުގައި ބަލިވެއިން ދުވަސްތަކަކީ އެއްގޮތަކަށް ފަސޭހަ ދުވަސްތަކެއް ނޫނެވެ. ސަބަބަކީ ދިމާވި ބައެއް ކޮމްޕްލިކޭޝަނާ ހެދި ވިހަން އޮތް ތާރީހަށް ވުރެ 10 ދުވަސް ކުރިން އިމަޖެންސީގައި ސިޒޭރިއަން ވެސް ހަދަން ޖެހުމެވެ. އެކަމަކު ޖޫލީ އާއި ބްރިއާގެ ހާލު ވެސް ރަނގަޅެވެ. ސިއްހީ އެއްވެސް މައްސަލައެއް ވެސް ނެތެވެ.

https://www.instagram.com/p/CBEt0mJBa2S/?utm_source=ig_embed&utm_campaign=loading

އާއިލާ އަށް މިހާރު އޮތީ މުޅިން ވެސް އުފާވެރި ކަމެވެ. އަމިއްލަ ބަނޑުން ވިހޭ މާމަ ދަރިފުޅާ އެކު ޖޫލީގެ މޫނުމައްޗަށް ވެސް އައިސްފައި ވަނީ ވަރަށް ބޮޑު އުފާވެރި ކަމެކެވެ. އެންމެ ބޮޑަށް އުފާވަނީ އަންހެން ދަރިފުޅާއި ފިރިމީހާގެ ހަޔާތަށް އާ އުންމީދެއް ގެނެސްދެވުނީތީ އެވެ.

އެ މީހުންގެ މި ދަތުރަށް އިންސްޓަގްރާމްގައި އެތައް ބަޔަކު ތައުރީފުކޮށް، ހިތްވަރު ވެސް ދީފައިވެ އެވެ. ބްރިއާނާގެ އާއިލާގެ އައިވީއެފްސަރޮގެސީ ޑައިރީގެ ނަމުގައި ހަދާފައިވާ އިންސްޓަގްރާމް އެކައުންޓުން މި ދަތުރު ފެންނާނެ އެވެ. ފޮލޯވަރުންގެ އަދަދު 128،000 އަށް އަރަ އެވެ.