ރުގުޔާކުރުމުގެ ނަމުގައި އަންހެނަކު އެކަހެރިކޮށްގެން ކަންތައްތަކެއް ކުރަން ފިރިހެނަކު ހުށަހަޅައިފި ނަމަ އެކަމަށް ދެކޮޅުހަދައި އޭނާ ވަގުތުން ފޮނުވާލަންވީ ކަމަށް ޝެއިޚު އިލްޔާސް ހުސެން ރޭ ވިދާޅުވެއްޖެ އެވެ.
އަދާލަތު ޕާޓީގެ އިލްމުވެރިންގެ މަޖިލީހުގެ ރައީސް އިލްޔާސް، ރާއްޖެޓީވީގެ ޕްރޮގްރާމެއްގައި ވިދާޅުވީ މީހަކު ލައްވާ ރުގުޔާކުރުވާ ނަމަ އޭނާ އަކީ ދީންވެރި، ދޮގާއި މަކަރު ނަހަދާ ތެދުވެރި، ހެޔޮލަފާ އަދި އީމާންތެރި، އަގީދާ ރަނގަޅު މީހެއްކަން ޔަގީންކުރަންވާނެ ކަމަށާއި އެހެން ނޫން ނަމަ އެއީ ރަނގަޅު ރާގީއެއް ނޫން ކަމަށެވެ.
ރުގުޔާކުރުމުގެ ނަމުގައި އަންހެނަކާއި އޭނާގެ ތިން ދަރިން ގޭގައި ރަހީނުކޮށްގެން ޖިސްމާނީ އަދި ޖިންސީ އަނިޔާކުރި ބޮޑު މައްސަލައެއް ފެންމަތިވެގެން އުޅޭ މި ދަނޑިވަޅުގައި، ރަނގަޅު ރާގީއެއްތޯ ދެނެގަންނާނެ އެއް ގޮތެއް ކަމަށް އިލްޔާސް ފާހަގަކުރެއްވީ އެކަހެރިކޮށްގެން ކަންތައްތަކެއް ކުރަން އުޅޭތޯ ބެލުމެވެ. އޭނާ ވިދާޅުވީ ހިލޭ އަންހެނަކާއި ފިރިހެނަކު އެކަހެރިވުން ދީނުގައި ހުއްދަވާނެ ގޮތެއް ނޯންނާނެ ކަމަށެވެ.
"ދެން ކިހިނެއްތޯ ރުގުޔާކުރާށޭ ކިޔާފައި އެކަހެރިކޮށްލާނީ ތިމަންނަ އެކަނި ކިޔަވާލަން ޖެހޭނެއޭ ކިޔާ؟ އެއީ ދޮގުވެރިއެއް. އޭނަ އަށް ހަމަ ބުނަންވީ ތިހިރީ ވަން ދޮރޭ, ނުކުމެގެން ދާށޭ،" އިލްޔާސް ވިދާޅުވި އެވެ.
އޭނާ ވިދާޅުވި ގޮތުގައި ދިމާވާ ކަންތައްތަކަކާ ހެދި މީހުން ޑިޕްރެޝަނަށް ވެއްޓި ވަރަށް ބޮޑަށް މާޔޫސްވެފައި ތިއްބާ "އޭގެ ނާޖާއިޒު ފައިދާތަކެއް، ޝައިތާނީ ވަސްވާސްތަކަށް ހެއްލިގެން ގޮސް، ބައެއް މީހުން ނަގަނީ" އެވެ. އެހެންވެ، އެފަދަ މީހުން ބުނާ ކަންތައްތައް ކުރެވޭ ކަމަށާއި އެކަމަކު އެއީ ސަމާލުވާން ޖެހޭ ކަމެއް ކަމަށް އޭނާ ވިދާޅުވި އެވެ.
"މި ބުނަނީ ގައިގައި ލިޔެލަން އެބަޖެހެއޭ. ހަމަ ވަރަށް ތަޖުރިބާ އެއްޗެކޭ މިއީ ހަމަ ލިޔެލާ އިރަށް ޝިފާ ލިބޭނެއޭ. އެ ރިއްސާ ރިއްސުން ވެސް ހިނގައިދާނެއޭ. މިފަދަ ވާހަކަތަކެއް އަތުވެއްޖެ ނަމަ އަޅުގަނޑުމެން ހަނދާންކުރަންވީ މި ދަނީ ގޯސްކޮށްކަން. އެހެންވީމާ [ބުނަންވީ] ތިމަންނަ ބޭނުމެއް ނޫނޭ،" އިލްޔާސް ވިދާޅުވި އެވެ.
"މި ބުނަނީ މިސާލަކަށް މަންމަ އަށް ކިޔަނީ ކީކޭހޭ، ބާ ހެދުން ކޮޅެއް އެބައޮތް ހޭ، ނުވަތަ ގޭގެ ޗާޓު ގެނެސްދީބަލާށޭ. އޭގެ މާނައަކީ އެ ދަނީ ގޯސްވަމުން. މި އާޔަތް ލިޔެފައި ބޮލު ދަށުގައި ބާއްވާށޭ. އެފަދަ މީހުންނާ ދުރުހެލިވާން ޖެހޭ."
"ޖިންނިން ހަދާނީ ދޮގު"
އިލްޔާސް ވިދާޅުވީ ޖިންނި ހާޒިރުކޮށްގެން އެންމެންނަށް އަޑުއިއްވައިގެން ސުވާލުކުރުމާއި ޖަވާބު ހޯދަން އުޅުމަކީ ވެސް ރަނގަޅު ރާގީއެއްގެ ސިފައެއް ނޫން ކަމަށެވެ. އޭނާ ވިދާޅުވި ގޮތުގައި އެ ގޮތަށް ދޭ މައުލޫމާތަށް ބަރޯސާވުމުން "އަޅުގަނޑުމެން ގޯސްކޮށްލަ" އެވެ. ސަބަބަކީ، އިލްޔާސް ވިދާޅުވީ، "99 އިންސައްތަ ޝައިތާނުންނަކީ ދޮގު ހަދާނެ ބައެއް" ކަމަށްވާތީ އެވެ.
"އެހެންވީމާ އެ މީހުން ދައްކާ ވާހަކަތައް, ކަލެއަށް ރުގުޔާކޮށްފައި ހުރީ މިވެނި މީހެކޭ، ކަލެއަށް ފަންޑިތަ ހެދީ މިވެނި މީހެކޭ, ބޭނުންވަނީ ކަލޭ ވަކިކޮށްލާށޭ ކަލޭމެން ދެމަފިރިން ވަކިކޮށްލާށޭ ... އަޅުގަނޑުމެންނަށް އެކަހަލަ އަޑެއް އިވުނުކަމުގައި ވިޔަސް އެއެއް ގަބޫލު ނުކޮށް އަޅުގަނޑުމެންނަށް އޮތީ ރުގުޔާ ޝަރީއާ އިޚްތިޔާރުކުރުން, ގުރުއާނުގެ އާޔަތްތައް ކިޔެވުން،" އިލްޔާސް ވިދާޅުވި އެވެ.
ރާއްޖޭގައި ރުގުޔާކުރުމާއި ސިހުރު ހެދުން އާއްމެވެ. އެ ކަންކަމުގެ ތެރެއިން އަންހެނުންނަށާއި ކުޑަކުދިންނަށް ޖިންސީ ގޯނާކުރާ މައްސަލަތައް ގިނަ އަދަދަކަށް ހުށަހަޅާ ކަމަށް ފުލުހުން މި އަހަރުގެ ކުރީކޮޅު ބުނެފައިވެ އެވެ. ރުގުޔާގެ ނަމުގައި މީހުންނަށް ގެއްލުންދޭ މީހެއްގެ ވަނަވަރު މިދިޔަ ޖޫން މަހު ފުލުހުން އާއްމުކުރުމުން އޭނާގެ މައްޗަށް ވެސް ޖިންސީ ގޯނާގެ ތުހުމަތުތަކެއް ރިޕޯޓްކޮށްފައިވެ އެވެ. އެކަމަކު މިހާރު ފެންމަތިވެގެން އުޅޭ ބޮޑު މައްސަލަ ފަޅާއެރި އިރު ވެސް މި ކަމަށް އާއްމު ހޭލުންތެރިކަން ވަރަށް ކުޑަ އެވެ.
