ތަދު: ކޮވިޑުން ބަދަލުވި ދިރިއުޅުން ސްކްރީނަށް

ކޮވިޑް-19ގެ ސަބަބުން ދިވެހިންގެ ދިރިއުޅުން ބަދަލުވެގެންދިޔަ ގޮތް ދައްކައިދީ، ހޭލުންތެރިކަން އިތުރުކުރުމަށްޓަކައި "މަދޮޝިޕް" އާއި ހެލްތު ޕްރޮޓެކްޝަން އެޖެންސީ އާއި ހެލްތު އިމަޖެންސީ އޮޕަރޭޝަން ސެންޓަރު އަދި ޔުނިސެފް ގުޅިގެން އުފެއްދި ފިލްމު "ތަދު" ގެ ޕްރީ-ސްކްރީނިންއެއް ބާއްވައިފި އެވެ.

ގިޔާސުއްދީން އިންޓަނޭޝަނަލް ސްކޫލް ހޯލްގައި މިރޭ ބޭއްވި ޕްރީ-ސްކްރީނިންގައި ޑިރެކްޓަ އޮފް ޕަބްލިކް ހެލްތު މައިމޫނާ އަބޫބަކުރާއި ސިއްހީ ދާއިރާގައި މަސައްކަތްކުރައްވާ އިސް ބައެއް ބޭފުޅުން އަދި މި ފިލްމު އުފެއްދި "މަދޮޝިޕް" ގެ ޓީމާއި ކާސްޓުން ބައިވެރިވި އެވެ.

ނުވަ ޗެޕްޓަރަކަށް ބަހާލައިގެން ގެނެސްދިން މި ފިލްމުގައި ދައްކަނީ ކޮވިޑްގެ ސަބަބުން އައި ލޮކްޑައުންއާ އެކު އާއިލާއަކާއި ދެމަފިރިއެއްގެ ދިރިއުޅުން ބަދަލުވެގެންދިޔަ ގޮތެވެ. ސިއްހީ ގޮތުންނާއި އަމިއްލަ ދިިރިއުޅުން އަދި މާލީ ގޮތުން އެ އާއިލާގެ މެމްބަރުންނަށް ކުރިމަތިލާން ޖެހުނު ގޮންޖެހުންތައް މީގައި ދައްކަ އެވެ.

މި ބަލިމަޑުކަމުގެ ތެރޭގައި މީހުންނަށް ނޭނގި ވެވޭ އިހުމާލުންނާއި ފަރުވާކުޑަކުރެވުމުގެ ސަބަބުން ކުރިމަތިލާން ޖެހޭ ހިތްދަތި އިމްތިހާނުތަކަށް ވެސް، 50 މިނެޓަށް ދެމިގެންދާ މި ފިލްމުގައި އަލިއަޅުވާލައިފައިވެ އެވެ.

މީގެ އިތުރުން ޑޮކްޓަރެއްގެ ދިރިއުޅުމާއި ޒިންމާތައް ބަދަލުވެގެންދިޔަ ގޮސް ވެސް ދައްކާފައިވެ އެވެ. އަދި ސިއްހީ ދާއިރާގައި މަސައްކަތްކުރާ ބައެއް މީހުންގެ ޒިންމާތަކާ އެކު ވަރަށް ރަނގަޅު، އަސަރުގަދަ މެސެޖުތަކެއް މި ފިލްމުން ލިބެ އެވެ.

މި ފިލްމުގެ ވާހަކަ ލިޔެ އަދި ޑައިރެކްޓުކޮށްފައި ވަނީ ދިވެހި ފިލްމު އެވޯޑް ކާމިޔާބުކޮށްފައިވާ އަހްމަދު ޝާމިން ނިޒާމް އެވެ. ފިލްމުގެ މުހިންމު ރޯލުތަކުން ފެނުނީ އައިޝަތު ރިޝްމީ ރަމީޒް، ރަވީ ފާރޫގް، މަރިޔަމް ހަލީމް، އަލީ ފާރޫގް، އައިޝަތު އަލީ އަދި ނަތާޝާ ޖަލީލު އެވެ.

މި ފިލްމު އާންމުންނަށް ރިލީޒްކުރަނީ މާދަމާ އެވެ.