ރާއްޖޭގެ ޓޫރިޒަމް ސިނާއަތުގައި ދޭ އެންމެ ބޮޑު އެވޯޑު ކަމަށްވާ މޯލްޑިވްސް ޓްރެވަލް އެވޯޑްސް ދިނުމުގެ ހަފުލާ މި މަހުގެ 20 ގައި އޮޅުވެލި ރިސޯޓުގައި ބާއްވަން ނިންމައިފި އެވެ.
މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ބާއްވާ ޓްރެވަލް އެވޯޑްސް ހަފުލާ އޮޅުވެލީގައި ބޭއްވުމުގެ އެއްބަސްވުމުގައި، އެ ރިސޯޓު ހިންގާ ސަން ސިޔާމް ރިސޯޓްސް އާއި މި ހަފުލާ އިންތިޒާމު ކުރާ ތިންކް އެސޯސިއޭޓްސް އިން މިއަދު ވަނީ ސޮއިކޮށްފަ އެވެ. އެ އެއްބަސްވުމުގައި ތިންކުގެ ފަރާތުން ޑިރެކްޓަރު މުހައްމަދު ވަހީދު ސޮއިކުރެއްވިއިރު، ސަން ސިޔާމް ރިސޯޓްސް ތަމްސީލުކުރެއްވީ އެ ކުންފުނީގެ ކޮމިއުނިކޭޝަންސް މެނޭޖަރު ފާތުމަތު ރީނާ އެވެ.
ހޮޓެލް ޖެންގައި ބޭއްވި މި ހަފުލާގައި މަޓާޓޯގެ ސެކްރެޓަރީ ޖެނެރަލް އިބްރާހިމް މުއާޒް ވިދާޅުވީ އެވޯޑު ހަފުލާ ބޭއްވުމުގެ އެންމެ ފަހުގެ ތައްޔާރީތައް މިހާރު ކުރިއަށް ދާ ކަމަށެވެ. އެ މަސައްކަތް ކުޑަކޮށް ލަސްވީ، އޭނާ ވިދާޅުވި ގޮތުގައި، އެވޯޑު ހަފުލާ ބާއްވާނެ ތަނެއް ހަމަނުޖެއްސިގެންނެވެ.
"ވަރަށް ފުރިހަމަ އިވެންޓެއް އެ [އޮޅުވެލި] ރިސޯޓުގައި ބޭއްވޭނެ ކަމަށް ޔަގީން ކުރަން،" މުނާޒް ވިދާޅުވި އެވެ.
އޭނާ ފާހަގަކުރެއްވި ގޮތުގައި މިފަހަރުގެ އެވޯޑު ހަފުލާ ވަރަށް ތަފާތު ވާނެ އެވެ. އެ ގޮތުން، މި އަހަރު ނޮމިނޭޓްވި ފަރާތްތަކުގެ އަދަދު ކުރީ އަހަރުތަކަށް ވުރެ 100 ޕަސެންޓް އިތުުރުވެފައި ވާއިރު، އެވޯޑު ހަފުލާގެ ކުރިން ޓޫރިޒަމް ދާއިރާގެ ބޮޑު ކޮންފަރެންސެއް ވެސް އޮންނާނެ ކަމަށް މުނާޒް ވިދާޅުވި އެވެ.
އެވޯޑު ހަފުލާ ބާއްވާ ރޭގެ ކުރީ ދުވަހު ބަނޑޮސް އައިލެންޑް ރިސޯޓުގައި ބާއްވާ އެ ކޮންފަރެންސްގައި ޓޫރިޒަމް ދާއިރާގައި ހަރަކާތްތެރިވާ ބައިނަލްއަގުވާމީ ޖަމިއްޔާތަކާއި ކުންފުނިތަކުން ބައިވެރިވާނެ ކަމަށް އޭނާ ވިދާޅުވި އެވެ. އޭގެ ތެރޭގައި އެކި މައުލޫތަކަށް ވާހަކަދައްކަވާނެ 20 ބޭފުޅުންނާއި ޓްރެވަލް އިންޑަސްޓްރީގެ ތަމްސީލުކުރައްވާ 150 ފަރާތެއް ހިމެނެ އެވެ.
"ޓްރެވަލް ކޮންފަރެންސްގައި ޓޫރިޒަމާ ގުޅޭ މުހިއްމު މައުލޫތަކާ ގުޅޭ ގޮތުން ބަހުސްކޮށް، ހިޔާލު ބަދަލުކޮށް އަދި ޕްރޮފެޝަނަލް ފަރާތްތަކާ ގުޅިގެން މަސައްކަތްތަކެއް ކުރާނެ،" މުނާޒް ވިދާޅުވި އެވެ.
މި އަހަރު އަލަށް ތައާރަފުކުރި ފަސް ކެޓަގަރީއަކާ އެކު ޖުމްލަ 35 ކެޓަގަރީއެއް ހިމެނޭ ޓްރެވަލްސް އެވޯޑަށް ކުރިމަތިލާން ހުޅުވާލި ފުރުސަތުގައި 240 އަށް ވުރެ ގިނަ ފަރާތަކުން ނަން ހުށަހަޅާފައިވެ އެެވެ. އެ ފަރާތްތަކަށް ފަނޑިޔާރުން ދޭ 70 ޕަސެންޓް މާކްސް ކަނޑައެޅުމުގެ މަސައްކަތް މިދިޔަ މަހުގެ ކުރީކޮޅު ކުރިއިރު، ބާކީ 30 ޕަސެންޓް މާކްސް ހޯދުމަށް އާންމުންގެ ވޯޓަށް ވެސް ހުޅުވާލި އެވެ.
ޓްރެވަލް އެވޯޑުގެ މައި ސްޕޮންސަރަކީ މޯލްޑިވްސް އެއާޕޯޓްސް ކޮމްޕެނީ ލިމިޓެޑް (އެމްއޭސީއެލް) އެވެ. އެވޯޑުގެ އޮންލައިން މީޑިއާ ޕާޓްނަރަކަށް "މިހާރު" ހަމަޖައްސާފައި ވާއިރު، އިތުރު ޕާޓްނަރުންގެ ތެރޭގައި އެލައިޑް އިންޝުއަރެންސާއި ފިއުލް ސަޕްލައިސް މޯލްޑިވްސް، ޕީއެސްއެމާއި ދިރާގު އަދި ކޮކާކޯލާ ހިމެެނެ އެވެ.
މަޓާޓޯ ޓްރެވަލް އެވޯޑަކީ ރާއްޖޭގެ ޓޫރިޒަމް ދާއިރާ ތަރައްގީކޮށް ކުރިއަރުވަން މަސައްކަތް ކުރާ އަދި ރާއްޖެ އާއި ރާއްޖޭން ބޭރުން އެ ދާއިރާ އިން ހޮވޭ ފަރާތްތަކަށް ދޭ އެވޯޑެކެވެ.