އަދީބުގެ ގޭ ބަންދާ ބެހޭ އެއްވެސް މައުލޫމާތެއް ނުދިން

މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ޚިޔާނާތް ހިންގައިގެން 20 އަހަރަށް ޖަލަށް ލާން ހުކުމްކޮށްފައިވާ ކުރީގެ ނާއިބު ރައީސް އަހުމަދު އަދީބަށް ގޭ ބަންދުގެ ލުއި ދިނުމާ ގުޅުން ހުރި މައުލޫމާތުތަކެއް ހޯދަން ސުވާލުކުރުމުން އެއިން އެއްވެސް މައުލޫމާތެއް ހާމަކުރަން ހޯމް މިނިސްޓްރީން އިންކާރުކޮށްފި އެވެ.

އަދީބު ގޭގައި ބަހައްޓަން ޖެހެނީ ވަކި މެޝިނެއް ބޭނުންކޮށްގެން ނިދަން ޑޮކްޓަރު ލަފާދީފައިވާތީ އާއި އެ މެޝިން ޖަލު ތެރޭގައި ބޭނުން ނުކުރޭވޭތީ ކަމަށް ހޯމް މިނިސްޓަރު އިމްރާން އަބްދުﷲ މިދިޔަ އޮކްޓޯބަރު މަހު ވިދާޅުވެފައިވެ އެވެ. އެކަމަކު އެކަމާ ބެހޭ އިތުރު ތަފްސީލް ހޯދަން، މައުލޫމާތު ހޯދައި ލިބިގަތުމުގެ ގާނޫނުގެ ދަށުން މި ނޫސްވެރިޔާ ހޯމް މިނިސްޓްރީ އަށް ފޮނުވި އެއްވެސް ސުވާލަކަށް ޖަވާބެއް ނުދިނެވެ.

ހޯމް މިނިސްޓްރީގެ އިތުރުން މޯލްޑިވްސް ކަރެކްޝަނަލް ސާވިސްގައި ވަކިވަކިން އެދިފައި ވާނީ އަދީބު ބޭނުންކުރަން ޖެހެނީ ކޮން ނަމެއް ކިޔާ މެޝިނެއްތޯ އާއި އެ މެޝިން ޖަލުގައި ބޭނުންކުރެވެން ނެތީ ކީއްވެގެންތޯ އާއި އެފަދަ މެޝިނެއް އަދީބު ބޭނުންކުރަން ޑޮކްޓަރު ލަފާދީފައިވާ ސަބަބާއި އަދީބު ގޭ ބަންދުގައި ބަހައްޓަން ކަނޑައަޅާފައިވާ މުއްދަތާއި އެ މުއްދަތު ހަމަވާނެ ތާރީޚު ސާފުކޮށްދިނުމަށެވެ.

ހޯމް މިނިސްޓްރީން ފޮނުވި ކުރު ޖަވާބުގައި، އެއިން އެއްވެސް މައުލޫމާތެއް ނުދީ، ގާނޫނާ ހަވާލާދީ ހަމައެކަނި ބުނީ އަދީބުގެ "ޒާތީ މައުލޫމާތު ހިމެނިފައިވާތީ، އެ މައުލޫމާތު ދެވެން ނެތް ކަމަށް އިނިސްޕެކްޓަރޭޓް އޮފް ކަރެކްޝަނަލް ސާވިސް ސަޕޯޓް ސެކްޝަނުން އަންގަވާފައިވާ" ކަމަށެވެ.

އެކަމަކު އިސްތިސްނާކުރަން ޖެހޭ މައުލޫމާތެއް ހިމެނޭ ނަމަ، އެ ބައެއް އުނިކޮށްފައި، އެ މައުލޫމާތެއްގެ ދޫކުރެވެން އޮތް ބައި ދޫކުރަން ގާނޫނު ލާޒިމްކުރެ އެވެ.

ހޯމް މިނިސްޓްރީގެ ޖަވާބުގައި ހަވާލާދީފައިވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ 23 ވަނަ މާއްދާގެ ހ. އަށެވެ. އެ މާއްދާގައި އޮންނަނީ ތިން ވަނަ މީހެއްގެ ޒާތީ މައުލޫމާތު އެ ފަރާތުގެ ރުހުމާ އެކު މެނުވީ ދޫކޮށްގެން ނުވާނެ ކަމަށެވެ. އެކަމަކު އެ މާއްދާގެ ށ. ބުނާ ގޮތުން، ހ.ގައި އެހެން އޮތަސް، ތިންވަނަ މީހެއްގެ ޒާތީ މައުލޫމާތު ހާމަކުރުމަކީ އާއްމު މަސްލަހަތު ދަމަހައްޓަން މުހިއްމު ކަމެއް ކަމަށް ފެނިއްޖެ ނަމަ، އެ މީހެއްގެ ރުހުމާ ނުލައި އެކަމަކު އެ އިދާރާއެއްގައި އެ ގާނޫނުގެ ދަށުން އޮންނަ މުރާޖައާ ކޮމިޓީގެ ހުއްދައާ އެކު އެ މައުލޫމާތެއް ދޫކުރެވިދާނެ އެވެ.

ރައްޔިތުންގެ ފައިސާ އިން ވައްކަންކުރި 3.3 ބިލިއަން ރުފިޔާގެ ބޮޑު ކޮރަޕްޝަންގެ މުގުލުގައި ހުންނެވި އަދީބު ޖަލަށް ލާން ހުކުމްކޮށްފައި ވަނިކޮށް ސަރުކާރުން އޭނާ އަށް ލުއި ދީ ގޭ ބަންދުގައި ބަހައްޓާތީ އާއްމުންގެ ކަންބޮޑުވުން އޮތް އިރު، މައުލޫމާތުގެ ހައްގުގެ ގާނޫނު، އާއްމު މަސްލަހަތަށް އިސްކަންދޭން ބާރު އަޅަ އެވެ. އެގޮތުން، މައުލޫމާތެއް ދިނުމަށް އިންކާރުކުރުމަށް ވުރެ އެ މައުލޫމާތު ދިނުމަކީ މުޅި ރައްޔިތުންގެ މަސްލަހަތު މާ ރަނގަޅަށް ހާސިލްވާނެ ކަމެއް ނަމަ އަދި އެ މައުލޫމާތު ހާމަނުކުރުމުން ރައްކާތެރިކުރެވޭ މަސްލަހަތަށް ވުރެ، ހާމަކުރުމުން ރައްކާތެރިކުރެވޭ މަސްލަހަތު ބޮޑު ނަމަ އެ މައުލޫމާތެއް ދޫކުރަންވާނެ ކަމަށް ގާނޫނު ބުނެ އެވެ.

ތިން ވަނަ ފަރާތަކާ ގުޅޭ މައުލޫމާތު ހާމަކުރަން އެ އިދާރާއެއްގެ އިންފޮމޭޝަން އޮފިސަރު ބޭނުން ނަމަ ތިން ވަނަ މީހާ އަށް އެކަން އެންގުމަށް ފަހު، އޭނާ އިއުތިރާޒު ކުރިޔަސް އޭނާ ދައްކާ ސަބަބުތަކަށް ރިއާޔަތްކޮށް އެ މައުލޫމާތެއް ދޫކުރަން ނުވަތަ ނުކުރަން ނިންމުމުގެ އިޚްތިޔާރު އިންފޮމޭޝަން އޮފިސަރަށް ގާނޫނުން ލިބިދެ އެވެ. އަދި އެ ނިންމުން އިލްތިމާސްކުރަން، އިއުތިރާޒުކުރާ މީހާ އަށް ފުރުސަތު ދިނުމަށް ފަހު އެކަން ކުރުން ރަނގަޅު ކަމަށް މުރާޖައާ މަރުހަލާ އިން ކަނޑައަޅައިފި ނަމަ މައުލޫމާތު ދޫކުރެވޭނެ އެވެ.

ހޯމް މިނިސްޓްރީގެ އިންފޮމޭޝަން އޮފިސަރު މި ޕްރޮސެސް ކުރިޔަށް ގެންދިޔަ ކަމެއް ނޫން ކަމެއް ޖަވާބަކު ނެތެވެ.

Adheeb geah badhalukuree machine eh ge eheegai nidhaathee: Imran

The most trusted news source in the Maldives

Mihaaru

އެމްއެމްޕީއާރުސީ މެދުވެރިކޮށް ޓޫރިޒަމްގެ ބޭނުމަށް ރަށްތަކާއި ފަޅުތައް ދޫކޮށްގެން ހިންގި ޚިޔާނަތަށް ޝަރީއަތުގައި އިއުތިިރާފުވެވަޑައިގެންފައިވާ އަދީބު ހުޅުމާލޭ އެޕާޓްމެންޓެއްގައި ދިރިއުޅުއްވަމުން ގެންދަވާ އިރު އޭނާގެ ސެކިއުރިޓީ ބަލަހައްޓަން ކަރެކްޝަނަލް ސާވިސްގެ އޮފިސަރުން ތިބެ އެވެ.

Adeeb Hulhumale' Ameen Avenue ge flat akah badhalhuvevadaigenfi

The most trusted news source in the Maldives

Mihaaru

އަދީބުގެ ގޭ ބަންދާ ބެހޭ ގޮތުން މައުލޫމާތު ނުދިން މައްސަލަ ބަލައިދީ އެ މައުލޫމާތު ހާމަކުރަން އެދި ހޯމް މިނިސްޓްރީގެ މުރާޖައާ ކޮމިޓީ އަށް ސިޓީއެއް ވާނީ ފޮނުވައިފަ އެވެ.

މުރާޖައާ ކޮމިޓީ އަށް ހުށަހަޅާ ޝަކުވާތައް ބަލައި ނިންމަން އާއްމު އުސޫލުން 30 ދުވަސް އަދި ޚާއްސަ ހާލަތެއް އޮތް ނަމަ 45 ދުވަސް ލިބެ އެވެ.