ގިލި ލަންކަންފުށި ކައިރީގައި އޮންނަ ފިނޮޅެއް ނައްތައިލަން މަސައްކަތްކުރި މައްސަލައާ ގުޅިގެން އެ ރިސޯޓުގެ ޖެނެރަލް މެނޭޖަރު ޑޭވިޑް ސްޓެޕެޓިކް މަގާމުން ވަކިކޮށްފި އެވެ.
އޭނާ މަގާމުން ވަކިކުރިކަން "މިހާރު" އަށް ގިލި ލަންކަންފުށި ރިސޯޓުން ވަނީ ކަށަވަރުކޮށްދީފަ އެވެ.
ފިނޮޅު ނައްތައިލަން މަސައްކަތްކުރި މައްސަލައިގައި، މިދިޔަ ހަފުތާގައި އެ ރިސޯޓުގެ އެޗްޕީއެލް ހޮޓެލްސް އެންޑް ރިސޯޓުގެ ވައިސް ޕްރެޒިޑެންޓް ޑޭވިޑް ބްރައުން ނެރުއްވި ބަޔާނުގައި ވިދާޅުވީ އެ ރިސޯޓު ކައިރީ އޮތް ފިނޮޅެއް ނައްތާލަން އުޅުނު ހިތާމަވެރި ހާދިސާ ހިނގައިދިޔަ ގޮތް އޭނާ އޮޅުންފިލުއްވާފައިވާ ކަމަށެވެ.
މިކަން މިހާރު ފުލުހުންނާއި ސަރުކާރުގެ އިދާރާތަކުން ތަހުގީގު ކުރަމުންދާ އިރު އެ އިދާރާތަކުން ނިންމާ ގޮތަކަށް އަމަލު ކުރާނެ ކަމަށް ވިދާޅުވި އެވެ.
މިދިޔަ މަހުގެ 21 ވަނަ ދުވަހުގެ ރޭ ގިލި ލަންކަންފުށީގެ ޖެނެރަލް މެނޭޖަރު އިސްވެ އެ ރިސޯޓުގެ މުވައްޒަފުންތަކެއް ވަނީ ހިންމަފުށްޓާއި އެ ރިސޯޓާ ދެމެދު އޮތް ފިނޮޅަކަށް އަރައި އެތަން ނައްތާލުމަށް ކޯރު ކަނޑަން މަސައްކަތްކޮށްފަ އެވެ. ނަމަވެސް ހިންމަފުށީ ރައްޔިތުން ވަނީ ފުލުހުންނާ އެކު އެ ފިނޮޅަށް އަރައި އެކަން ހުއްޓުވައިފަ އެވެ.
މި މައްސަލާގައި ރިސޯޓަށް އާންމުންގެ ފާޑުކިޔުން އަމާޒުވެފައި ވާއިރު ރިސޯޓަށް ފިޔަވަޅު ނާޅާ ކަމަށް ބުނެ ސަރުކާރަށް ވެސް އަންނަނީ ފާޑުކިޔަމުންނެވެ. ފުލުހުން މިހާރު ވަނީ މައްސަލަ ތަހުގީގުކުރަން ފަށައި ގިލި ލަންކަންފުށި ރިސޯޓުގެ ޖެނަރަލް މެނޭޖަރު ރާއްޖެއިން ފުރުން މަނާކޮށްފަ އެވެ. މި މައްސަލަ އީޕީއޭ އިން ވެސް އަންނަނީ ބަލަމުންނެވެ.
ފިނޮޅު ނައްތާލަން އުޅުނު ކަމަށް ހިންމަފުށީ ބައެއް މީހުން ގަބޫލުކުރަނީ އެ ތަނަށް އެ ރަށު މީހުން ދާތީ ރިސޯޓްގެ މެނޭޖްމަންޓުން އެކަމާ ހިތްހަމަނުޖެހިގެންނެވެ.
