މާލެ އަތޮޅު ފިނޮޅެއް ނައްތާލަން ގިލި ލަންކަންފުށި ރިސޯޓުން މަސައްކަތްކުރި މައްސަލައިގައި ހައްލެއް ހޯދުމަށް ކ.ހިންމަފުށީ ކައުންސިލުން އެ ރިސޯޓާއި ޓޫރިޒަމް މިނިސްޓްރީއާ އެކު މަޝްވަރާ ބައްދަލުވުމެއް ބާއްވަން ހަމަޖައްސައިފި އެވެ.
ހިންމަފުށީ ކައުންސިލްގެ ރައީސް ޝާން އިބްރާހިމް މިއަދު ވިދާޅުވީ ފިނޮޅު ނައްތާލަން އުޅުނު މައްސަލައިގައި އެ ކައުންސިލުން މިއަދު ވެސް ޓޫރިޒަމް މިނިސްޓްރީގެ އިސްވެރިންނާއި ބައްދަލުކޮށްފައިވާ ކަމަށެވެ.
"މިހާ ހިސާބަށް އައީ ކައުންސިލާއި ރިސޯޓާ ދެމެދު ގުޅުމެއް ނެތުމުން. ދެ ފަރާތުގެ ހުރި މައްސަލަތަކަށް ހައްލުތަކެއް ލިބޭތޯ ބަލާނީ،" އޭނާ ވިދާޅުވި އެވެ.
މިދިޔަ ހުކުރު ވިލޭރޭ ގިލި ލަންކަންފުށީގެ ޖެނެރަލް މެނޭޖަރު ޑޭވިޑް ސްޓެޕެޓިކް އިސްވެ އެ ރިސޯޓުގެ މުވައްޒަފުންތަކެއް ވަނީ ހިންމަފުއްޓާއި އެ ރިސޯޓާ ދެމެދު އޮތް ފިނޮޅަކަށް އަރައި އެތަން ނައްތާލުމަށް ކޯރު ކަނޑަން މަސައްކަތްކޮށްފަ އެވެ. ނަމަވެސް ހިންމަފުށީ ރައްޔިތުން ވަނީ ފުލުހުންނާ އެކު އެ ފިނޮޅަށް އަރައި އެކަން ހުއްޓުވައިފަ އެވެ.
އެހާދިސާއަށް ފަހު ހުކުރު ދުވަހުގެ މެންދުރު ފަހު ރިސޯޓާއި ކައުންސިލާ ބައްދަލުވުމެއް ބާއްވަން ހަމަޖެއްސި ނަމަވެސް އެކަން ފަސްކުރީ އެވެ. ކައުންސިލްގެ ރައީސް ޝާން ވިދާޅުވީ، މައްސަލަތަކެއް ހުރި ނަމަ، ވާހަކަ ދައްކައިގެން އެކަންކަން ހައްލުވާނެ ކަމަށް އުންމީދު ކުރައްވާ ކަމަށެވެ.
މި މައްސަލާގައި ރިސޯޓަށް އާންމުންގެ ފާޑުކިޔުން އަމާޒުވެފައި ވާއިރު ރިސޯޓަށް ފިޔަވަޅު ނާޅާ ކަމަށް ބުނެ ސަރުކާރަށް ވެސް އަންނަނީ ފާޑުކިޔަމުންނެވެ. ފުލުހުން މިހާރު ވަނީ މައްސަލަ ތަހުގީގުކުރަން ފަށައި ގިލި ލަންކަންފުށި ރިސޯޓުގެ ޖެނަރަލް މެނޭޖަރު ރާއްޖެއިން ފުރުން މަނާކޮށްފަ އެވެ. މި މައްސަލަ އީޕީއޭ އިން ވެސް އަންނަނީ ބަލަމުންނެވެ.