ގިލި ލަންކަންފުށި ކައިރީގައި އޮންނަ ފިނޮޅު ނައްތާލަން މަސައްކަތްކުރި މައްސަލަ ފުލުހުން ބަލަން ފެށުމާ އެކު ރިސޯޓުގެ ޖެނެރަލް މެނޭޖަރު ޑޭވިޑް ސްޓެޕެޓިކް އޭނާގެ ޒިންމާތަކުން ދުރުކޮށްފި އެވެ.
ގިލި ލަންކަންފުށި ރިސޯޓު ހިންގާ އެޗްޕީއެލް ހޮޓެލްސް އެންޑް ރިސޯޓުގެ ވައިސް ޕްރެޒިޑެންޓް ޑޭވިޑް ބްރައުން ނެރުއްވި ބަޔާނުގައި ވިދާޅުވީ، އެ ރިސޯޓު ކައިރީ އޮތް ފިނޮޅެއް ނައްތާލަން އުޅުނު ހިތާމަވެރި ހާދިސާ ހިނގައިދިޔަ ގޮތް އޭނާ އޮޅުންފިލުއްވާފައިވާ ކަމަށެވެ.
"މިކަން މިހާރު ފުލުހުން އަދި ސަރުކާރުގެ އިދާރާތަކުން އަންނަނީ ތަހުގީގު ކުރަމުން. މައްސަލަ ތަހުގީގުކޮށް އިދާރާތަކުން ނިންމާ ގޮތަކަށް އަމަލުކުރާނަން،" މައްސަލަ ބަލައި ނިމެންދެން ޖީއެމް ޒިންމާތަކުން ދުރުކުރިކަން ހާމަކުތައްވަމުން އޭނާ ވިދާޅުވި އެވެ.
ހާދިސާ ހިނގިތާ ތިން ދުވަސް ފަހުން ގިލި ލަންކަންފުށި ރިސޯޓުން ނެރުނު ބަޔާނުގައި ވެސް މިކަން ހިނގައިދިއުމުން މާފަށް އެދިފައެއް ނެތެވެ.
ޑޭވިޑް ވިދާޅުވީ، ގިލި ލަންކަންފުއްޓަކީ ޓޫރިޒަމް ދާއިރާގައި މުހިއްމު ދައުރެއް އަދާކުރާ ތަނެއް ކަމަށާއި އެއީ ޓޫރިސްޓުން ތަކުރާރުކޮށް އެތައް ފަހަރަކު އައުމުގެ ހާއްސަ ރެކޯޑެއް އޮތް ރިސޯޓެއް ކަމަށް ވެސް އޭނާ ވިދާޅުވެފައިވެ އެވެ.
ގިލި ލަންކަންފުށި ރިސޯޓު ހިންގާ އެޗްޕީއެލް ހޮޓެލްސް އެންޑް ރިސޯޓަކީ ސިންގަޕޫރު ކުންފުންޏެކެވެ. މި ކުންފުނިން ރާއްޖޭގެ އިތުރުން ތައިލެންޑައި މެލޭޝިއާ އާއި އޮސްޓްރޭލިއާގައި ވެސް ރިސޯޓުތައް ހިންގަ އެވެ.
ގިލި ލަންކަންފުށީގެ ޖެނެރަލް މެނޭޖަރު އިސްވެ އެ ރިސޯޓުގެ މުވައްޒަފުންތަކެއް ވަނީ ހިންމަފުށްޓާއި އެ ރިސޯޓާއި ދެމެދު އޮތް ފިނޮޅަކަށް އަރައި އެތަން ނައްތާލުމަށް ކޯރު ކަނޑަން މަސައްކަތްކޮށްފަ އެވެ. ނަމަވެސް ހިންމަފުށީ ރައްޔިތުން ވަނީ ފުލުހުންނާ އެކު އެ ފިނޮޅަށް އަރައި އެކަން ހުއްޓުވައިފަ އެވެ.
މި މައްސަލާގައި ރިސޯޓަށް އާންމުންގެ ފާޑުކިޔުން އަމާޒުވެފައި ވާއިރު ރިސޯޓަށް ފިޔަވަޅު ނާޅާ ކަމަށް ބުނެ ސަރުކާރަށް ވެސް އަންނަނީ ފާޑުކިޔަމުންނެވެ.
ފުލުހުން މިހާރު ވަނީ މައްސަލަ ތަހުގީގުކުރަން ފަށައި ގިލި ލަންކަންފުށި ރިސޯޓުގެ ޖެނަރަލް މެނޭޖަރު ރާއްޖެއިން ފުރުން މަނާކޮށްފަ އެވެ. މި މައްސަލަ އީޕީއޭ އިން ވެސް އަންނަނީ ބަލަމުންނެވެ.
ފިނޮޅު ނައްތާލަން އުޅުނު ކަމަށް ހިންމަފުށީ ބައެއް މީހުން ގަބޫލުކުރަނީ އެ ތަނަށް އެ ރަށު މީހުން ދާތީ ރިސޯޓްގެ މެނޭޖްމަންޓުން އެކަމާ ހިތްހަމަނުޖެހިގެންނެވެ.
