ކައިރީ އޮތް ފިނޮޅެއް ނައްތާލަން ގިލިލަންކަންފުށި ރިސޯޓުން މަސައްކަތްކޮށްފި

ގިލިލަންކަންފުށި ރިސޯޓުގެ މެނޭޖްމަންޓާއި ބައެއް މުވައްޒަފުން ކ. ހިންމަފުށީ ކައިރީގައި އޮތް ފިނޮޅަކަށް ރޭ ދަންވަރު އަރައި އެތަން ނައްތާލަން ކޯރު ކަނޑަނިކޮށް ހިންމަފުށީ ރައްޔިތުން ގޮސް އެކަން ހުއްޓުވައިފި އެވެ.

ގިލިލަންކަންފުށި ރިސޯޓު އޮންނަނީ، އެއް ފަޅެއްގައި، ހިންމަފުއްޓާ ކައިރީގަ އެވެ. އެކަމަކު ރައްޖޭގެ މަތީ ފެންވަރުގެ އެ ރިސޯޓްގެ ކޮޓަރިތައް އަޅާފައި ހުންނަނީ ހިންމަފުއްޓާ ދުރުގަ އެވެ.

ނައްތާލަން އުޅުނު ފިނޮޅަށް އެ ރަށުގެ ރައްޔިތުން ވަރަށް ގިނައިން ޕިކްނިކް ގޮސް އުޅެ އެވެ.

ގިލިލަންކަންފުށި ރިސޯޓުން ފިނޮޅު ނައްތާލަން، އެ ފަސްގަނޑުގެ ތެރެއިން ކޯރު ކަނޑަމުން ދަނިކޮށް ހިންމަފުށީ ބަޔަކު ވަނީ ފުލުހުންނާ އެކު ގޮސް އެތަނަށް އަރައި އެކަން ހުއްޓުވައިފަ އެވެ. ރޭ ދަންވަރު އެކަން ހުއްޓުވަން ފިނޮޅަށް ދިޔަ، އެ ރަށުގެ ގެސްޓްހައުސްގެ އިސް ވެރިއެއް ކަމަށްވާ މުހައްމަދު އިމްތިޔާޒް ވިދާޅުވީ ގިލިލަންކަންފުށި ރިސޯޓުން އެކަން ކުރަން ގޮސް ތިބީ އެ ރިސޯޓުގެ ޖެނެރަލް މެނޭޖަރު ޑޭވިޑް ސްޓެޕެޓިކްއާ އެކު ކަމަށެވެ.

މިކަން ހިނގި ވަގުތު ނަގާފައިވާ ވީޑިއޯގައި ގިލިލަންކަންފުށީގެ ޖެނެރަލް މެނޭޖަރު ވެސް އެކަމުގައި ބައިވެރިވެ އުޅުއްވިތަން ފެނެ އެވެ. އަދި އެހެން އެކަން ކުރަނީ ކީއްވެތޯ ވެސް ވީޑިއޯގައި ބަޔަކު އޭނާއާ ސުވާލުކުރެ އެވެ. އެކަމަކު އޭނާ އެއަކަށް ޖަވާބެއް ނުދެއްވަ އެވެ.

އިމްތިޔާޒް ވިދާޅުވީ ހީވާ ގޮތުން އެކަން ކުރާތާ ދުވަސްތަކެއް ވެއްޖެ ކަމަށެވެ. އެކަން ކުރަނީ އެ ރަށުގެ ރައްޔިތުން އެ ފިނޮޅަށް ގޮސް ޕިކްނިކް ގޮސް އުޅޭތީ އެކަމާ ހިތްހަމަނުޖެހޭތީ ކަމަށް ބެލެވޭ ކަމަށް ވެސް އޭނާ ވިދާޅުވި އެވެ.

ފިނޮޅު ނައްތާލަން މަސައްކަތްކުރަނީ ކީއްވެގެންތޯ ޑޭވިޑް ކައިރީ އެހުމުން އެއްވެސް ޖަވާބެއް ނުދެއްވި ކަމަށް އިމްތިޔާޒު ވިދާޅުވި އެވެ.

"ގިލިލަންކަންފުށީގެ ވޯޓާ ވިލާތަކުގައި ތިބޭ މީހުންނަށް ފިނޮޅު ވަރަށް ރީތިކޮށް ފެންނާނެ. އެހެންވެގެން ކަމަށް ބެލެވެނީ އެހެން ހެދީ. އަސްލު މިކަން ކުރީ ކީއްވެ ކަމެއް އެހީމަ ވެސް ޖީއެމް ވިދާޅެއް ނުވޭ،" އޭނާ ވިދާޅުވި އެވެ.

ދިޔަވަރު ހިކިފައި އޮންނަ އިރު އެ ފިނޮޅުގެ ދިގުމުގައި ގާތްގަނޑަކަށް 200 ފޫޓް ހުރެ އެވެ. އެތަން ނައްތާލަން އުޅެނިކޮށް ހިންމަފުށީގެ ބައެއް މީހުން ދިޔަ އިރު ތިން ސަރަހައްދަކުން އޭރު ވެސް ކޯރު ކަނޑާފައި އޮތް ކަމަށް، މަންޒަރު ދުށް މީހުން ބުނެ އެވެ. މިގޮތަށް ކޯރު ކޮނުނީ ފިނޮޅު އަވަހަށް ގިރައިގެން ދާނެ ގޮތް ހެދުމަށެވެ. ނަމަވެސް ގިލިލަންކަންފުށިން ހަދަން އުޅުނު އެ ބޮޑު ގޯސް ހުއްޓުވަން ހިތްމަފުށިން ސާޅީހަކަށް ޒުވާނުން ފިނޮޅަށް އެރި އެވެ.

މި މައްސަލަ ފުލުހުން އަންނަނީ ތަހުގީގުކުރަމުންނެވެ. އެ ރިސޯޓުގެ މެނޭޖްމެންޓާއި ހިންމަފުށީ ކައުންސިލާ އެކު ސުލްހަވެރި ބައްދަލުވުމެއް މިއަދު ބާއްވާނެ ކަމަށްވެ އެވެ.

މި ސީރިއަސް މައްސަލާގައި ގިލިލަންކަންފުށީގެ އެއްވެސް ބަހެއް ލިބޭ ގޮތެއް ނުވި އެވެ.