އަލީ ވަހީދާ ހަވާލުވީ އައްސަދު، ޕާސްޕޯޓް ދޫކުރީ ހަތަރު މަހަށް

ޓޫރިޒަމް މިނިސްޓަރަކަށް ހުންނަވައި އެ ތަނުގެ ގިނަ އަދަދެއްގެ މުވަައްޒަފުންނަށް ޖިންސީ ގޯނާކުރި ކަމުގެ ދައުވާ އުފުލައި ޝަރީއަތް ފަށާފައިވާ އަލީ ވަހީދަށް ޖާމިނުވީ އޭނާގެ ގާތް އެކުވެރިޔާ، ޔޫތު މިނިސްޓްރީގެ ސްޓޭޓް މިނިސްޓަރު އައްސަދު އަލީ ކަން "މިހާރު" އަށް އެނގިއްޖެ އެވެ.

ހަތް ދައުވާއެއް އުފުލައި ޝަރީއަތް ފެށިތަނުން އޭނާ "ފުރުވާލުމުން" ސަރުކާރާއި ޕްރޮސިކިއުޓަ ޖެނެރަލް ހުސެއިން ޝަމީމްގެ އިތުރުން ކްރިމިނަލް ކޯޓަށް ވަނީ ފާޑުކިއުން އަމާޒުވެފަ އެވެ. ޖިންސީގޯނާގެ މައްސަލަތަކުގައި މުއައްސަސާތައް ސީރިއަސް މިންވަރާއި އިންސާފު ލިބުމުގައި ހަމަހަމަކަން ގާއިމްވުމާ މެދު ސުވާލުތަކެއް ދަނީ އުފައްދަމުންނެވެ.

ކުރީގެ ސަރުކާރުގައި އަމިއްލަ އަށް އަރުވާލެވިގެން އިނގިރޭސިވިލާތުގައި ހުންނަވައި މި ވެރިކަން ގެނައުމަށް ސިޔާސީ ފަރާތްތަކާ އެކު މަސައްކަތް ކޮށްދެއްވި އަލީ ވަހީދުގެ ޕާސްޕޯޓް ދޫކޮށްލަން އެއްބަސްވީ، ޕީޖީ އޮފީހުން ބުނާ ގޮތުގައި، ޑޮކްޓަރުގެ ބަހަށެވެ. ކުރިމަތިވެފައި ވަނީ އޭނާގެ ފުރާނައަށް ނުރައްކާވެދާނެ ބައްޔެއް ކަމަށް ޑޮކްޓަރު ލަފާ ދެއްވާފައިވާ ކަމަށް ޕީޖީ އޮފީހުން ބުންޏެވެ.

ޕާސްޕޯޓް ދޫކުރަން ނެރުނު އަމުރު ދިފާއުކުރަމުން ކްރިމިނަލް ކޯޓުން ބުނެފައި ވަނީ އޭނާގެ ޕާސްޕޯޓް ދޫކޮށްލީ ޖާމިނުވާނެ (ޒިންމާ އުފުލާނެ) ފަރާތެއް ހުށަހެޅުމުން ކަމަށެވެ. މިއީ، ޒިންމާވާނެ ފަރާތެއް ހުށަހަޅައި، މިފަދަ ސީރިއަސް މައްސަލައެއްގައި ހިމެނޭ މީހަކު ބޭސްފަރުވާ އަށް ދޫކޮށްލި ފުރަތަމަ ފަހަރެވެ.

މި ކޭސްގައި ޖާމިނުވާ ފަރާތުން އިގުރާރުވަނީ ހަތަރު މަހަށް ފަހު، ޝަރީއަތަށް އަލީ ވަހީދު ހާޒިރުކޮށްދޭނެ ކަމެވެ. އަދި ނުވެއްޖެ ނަމަ ޖާމިނުވާ ފަރާތަށް އަދަބު ދެވޭނެ އެވެ. އެއީ ބަންދުކުރުން ނުވަތަ ޖޫރިމަނާ އެވެ.

ޖިނާއީ އިޖުރާއަތުގެ ގާނޫނުގެ 64 ވަނަ މާއްދާގައި ބުނެފައި ވަނީ، ކުށެއްގެ ތުހުމަތުގައި ބަންދުކޮށްފައި ހުރި މީހަކު ބަންދުން ދޫކޮށްލުމަށްޓަކައި ވަކި ޝަރުތުތަކެއް ފުރިހަމަވާ މީހަކު ޔަގީންކަންދީ ޖާމިނުވެއްޖެ ނަމަ އޭނާ ކަފާލާތުގެ ދަށުން ދޫކޮށްލަން ފަނޑިޔާރަށް އަމުރުކުރެވިދާނެ ކަމަށެވެ. ބަންދުގައި ހުރި މީހާއާ ޖާމިނުވާ މީހާ އޭނާގެ އިގުރާރާ ޚިލާފުވުމަކީ ކުށެކެވެ. އަދަބުގެ ގޮތުގައި ކަނޑައަޅާފައި ވަނީ ޖަލަށް ލުމާއި ގޭ ބަންދުކުރުމާއި 15،000ރ. އަށް ވުރެން ބޮޑު އަދަދަކުން ޖޫރިމަނާ ކުރުމެވެ.

އަލީ ވަހީދު ފުރާވަޑައިގަތުމުގެ ލިއުންތަކުގައި އައްސަދު ސޮއިކުރެއްވުމާ ގުޅޭ ގޮތުން "މިހާރު"ން ގުޅުމުން ފޯނެއް ނުނަންގަވަ އެވެ. މެސެޖަށް ޖަވާބެއް ވެސް ނުދެއްވަ އެވެ.

އަލީ ވަހީދުގެ މައްޗަށް ވަނީ ޖިންސީ އަނިޔާކުރުމުގެ ދައުވާއަކާއި ޖިންސީ ގޯނާ ކުރުމުގެ ދައުވާ އާއި ޖިންސީ ގޯނާ ކުރަން އުޅުމުގެ ދައުވާ އާއި ރޭޕް ކުރަން އުޅުމުގެ ކުށުގެ ދައުވާ އާއި ބޭއަދަބީ ގޮތުގައި ޖިންސީ ގުނަވަން ހާމަކުރުމުގެ ދައުވާ އާއި ހުއްދަ ނޫން ޖިންސީ މުއާމަލާތެއް ހިންގަން އެދުމުގެ ދެ ދައުވާއެއް ކޮށްފަ އެވެ. އެ ދައުވާތައް ސާބިތުވެއްޖެ ނަމަ، މަދުވެގެން 21 އަހަރުގެ ޖަލު ހުކުމެއް އަލީ ވަހީދުގެ މައްޗަށް އަންނާނެ އެވެ.

އަލީ ވަހީދު ބޭރަށް ފުރާވަޑައިގަތުމާ ގުޅޭ ގޮތުން މައުލޫމާތު އެނގިވަޑައިގަންނަވާ ބޭފުޅަކު ކިޔައިދެއްވި ގޮތުގައި އޭނާގެ ޕާސްޕޯޓް ދޫކުރީ ހަތަރު މަހަށެވެ. އިނގިރޭސިވިލާތަށް އިއްޔެ ފުރާވަޑައިގަތީ ހަތަރު މަހުން އެނބުރި ރާއްޖެ ވަޑައިގަންނަވާ ގޮތަށް ކަމަށް އޭނާ ވިދާޅުވި އެވެ.

އެކަމަކު އޭނާ އެނބުރި ވަޑައިގަންނަވާނެ ކަމެއް "މިހާރު"އާ ވާހަކަ ދެއްކެވި ބޭފުޅާއަށް ވެސް ކަށަވަރެއް ނޫނެވެ.

"ކޭސްއަކީ [ސިއްހީ މައްސަލަ] އަސްލު ކަމެއް، އައުމާ ނައުމަކީ ވަކި ކަމެއް،" އަލީ ވަހީދުގެ ސިއްހީ ހާލަތާ ގުޅުވައި އޭނާ ވިދާޅުވި އެވެ.

އޭނާ ވިދާޅުވި ގޮތުގައި މައިބަދައިގެ މައްސަލަތަކެއް ދިމާވެ އަލީ ވަހީދު ފުރަތަމަ ފަރުވާ ހޯއްދެވީ ޓްރީ ޓޮޕް ހޮސްޕިޓަލުންނެވެ. އޮޕަރޭޝަނެއް ކުރަން ޖެހޭ ކަމާއި އެކަށީގެންވާ ފަރުވާ ލަސްކޮށްފި ނަމަ ނުރައްކާ އޮތް ކަމަށް ކޯޓަށް ޔަގީންކޮށްދޭން ހުށަހެޅި ލިއުންތައް ފުރަތަމަ ކްރިމިނަލް ކޯޓުން ގަބޫލުނުކުރީ އެވެ.

އެ ލިއުންތައް ބަލައިނުގަތުމުން އަލީ ވަހީދު ދެން ވަޑައިގަތީ އައިޖީއެމްއެޗަށެވެ. އެތަނުން އޭނާ އަށް ފަރުވާދެއްވީ ރާއްޖޭގެ އެންމެ ގިނަ ބަޔަކު ކަށީގެ ކަންކަމުގައި ފަރުވާ ހޯދަން ބޭނުންވާ އެއް ޑޮކްޓަރު ޔޫސުފް ޝާނެވެ.

ޑރ. ޝާންގެ ލަފައަކަށް ވީ އަލީ ވަހީދު މައިބަދައިގެ އޮޕަރޭޝަނެއް ކުރަން ޖެހިފައި ހުރި ކަމަށާއި ރާއްޖެ އިން ބޭރުން ފަރުވާ ހޯއްދެވުމެވެ. އެ އޮޕަރޭޝަން ރާއްޖޭގައި ކުރެވުނަސް ޑރ. ޝާން ލަފާ ދެއްވަނީ ބޭރުން ކުރުން ކަމަށް "މިހާރު"އަށް ވާހަކަ ދެއްކެވި ބޭފުޅާ ވިދާޅުވި އެވެ.

ޑރ. ޝާން ދައްކަވާ ސަބަބަކީ، އެ އޮޕަރޭޝަން ރާއްޖޭގައި ކުރި އެހެން މީހަކަށް ސީރިއަސް ކަންތައްތަކެއް ދިމާވެ ފުރާނައަށް ނުރައްކާ ވުން ކަމަށް ވެ އެވެ.

އަލީ ވަހީދު ޕާސްޕޯޓް ދޫކުރި ޝަރީއަތަށް ޑރ. ޝާން ހާޒިރުކުރި އެވެ. އަލީ ވަހީދަށް ދިމާވެފައިވާ ސިއްހީ ކަންކަމުގެ ސީރިއަސްކަން އޮތް މިންވަރު އޭނާ އެ ޝަރީއަތުގައި ކިޔައިދެއްވި އެވެ.

އެނގިފައިވާ ގޮތުގައި އަލީ ވަހީދު އެދިވަޑައިގަތީ ޓްރެވަލް ޑޮކިއުމެންޓެއްގައި ފަރުވާއަށް ދުބާއީ ނުވަތަ ޖަރުމަނަށް ވަޑައިގަންނަވާށެވެ. އެކަމަކު، ޕީޖީން ބޭނުންވީ އަލީ ވަހީދު ބޭނުން ތަނަކަށް އޭނާ ވަޑައިގަތުމުގެ ހުއްދަދޭން ކަމަށް "މިހާރު"އަށް ވާހަކަ ދެއްކެވި ބޭފުޅާ ވިދާޅުވި ނަމަވެސް ޕީޖީން އެކަން ދޮގުކުރެ އެވެ.

ޕީޖީ އޮފީހުން ބުނިގޮތުގައި ހުށަހެޅީ ބޭސްފަރުވާ ކުރަން އެދިވަޑައިގަންނަވާ ގައުމަކަށް ފުރާވަޑައިގެންނެވޭ ގޮތަށް ޓްރެވަލް ޑޮކިއުމެންޓެއް ދޫކޫރާށެވެ. އެކަމަކު ހަތަރު މަހަށް ޕާސްޕޯޓް ދޫކުރީ މައްސަލަ ބެއްލެވި ފަނޑިޔާރު ހަސަން ސައީދެވެ.

ފެމިލީ ކޯޓުގައި ކުރިމަތިވި ޖިންސީ ފުރައްސާރައިގެ މައްސަލައެއް އޮއްބާލަން އުޅުއްވި ކަމުގެ ތުހުމަތުކޮށް ފަނޑިޔާރު ހަސަންގެ މައްސަލަ ޖޭއެސްސީން ބަލާފައިވެ އެވެ. އޭނާ ކްރިމިނަލް ކޯޓަށް ބަދަލުކުރީ ޖޭއެސްސީން މައްސަލަ ބަލައި އެ ތުހުމަތުތައް އޭނާގެ މައްޗަށް މަދަނީ މިންގަނޑުން ސާބިތުވާ ކަމަށް ނިންމުމަށް ފަހު ނަސޭހަތް ދީފަ އެވެ.

އަލީ ވަހީދުގެ ޖިންސީ ފުރައްސާރަ ކުރިމަތިވި ކަމަށް ބުނާ މުވައްޒަފުންގެ އަދަދު 13 އަށް ވުރެ ގިނަ އެވެ. އޭނާ ވަނީ ޖިންސީ ގޯނާގެ ތުހުމަތުތަކަށް އިންކާރު ކުރައްވައިފަ އެވެ. އެއީ ބަޔަކު ރާވައިގެން ހިންގި ޖަރީމާއެއް ކަމަށް ވެސް އޭނާ ސިފަކުރެއްވި އެވެ. އެ މުވައްޒަފުން އަލީ ވަހީދުގެ ޝަކުވާ ހުށަހެޅީ ރައީސް އިބްރާހިމް މުހައްމަދު ސޯލިހަށެވެ. އެ ވާހަކަތައް އަޑުއައްސަވައި ވަގުތުން އަލީ ވަހީދު އިސްތިއުފާ ދެއްވަން ރައީސް އިބްރާހިމް މުހައްމަދު ސޯލިހް އެންގެވި ނަމަވެސް އަލީ ވަހީދު އިސްތިއުފާ ނުދެއްވުމުން މަގާމުން ވަކިކުރެއްވީ އެވެ.