މި ފަހަރުގެ އޭއެފްސީ ކަޕްގެ މެޗުތައް ސެންޓްރަލައިޒްކޮށް އެއް ދަނޑެއްގައި ކުޅެން ނިންމާފައިވާއިރު، ދެކުނު އޭޝިއާ އަށް ހާއްސަ ގްރޫޕްގެ މެޗުތައް މެއި މަހު ހޯސްޓްކުރަން ރާއްޖެ އިން ކުރި ބިޑް ކާމިޔާބުކޮށްފި އެވެ.
އެފްއޭއެމްގެ ރައީސް ބައްސާމް އަދީލް ޖަލީލް މިއަދު ކުރެއްވި ޓްވީޓެއްގައި ވިދާޅުވެފައިވަނީ ރާއްޖޭގެ މާޒިޔާ ހިމެނޭ ގޮތަށް ކުޅެވޭ އޭއެފްސީ ކަޕްގެ ގްރޫޕް ޑީގެ މެޗުތައް ރާއްޖޭގައި ހޯސްޓްކުރުމުގެ ފުރުސަތު ލިބިފައިވާ ކަަމަށެވެ. އުއްމީދަކީ ކޮލިފައިން ބުރު ފަހަނައަޅައި ރާއްޖޭގެ އީގަލްސް ވެސް ގްރޫޕް ސްޓޭޖުގައި ވާދަކުރުން ކަމަށް ބައްސާމް ވިދާޅުވި އެވެ.
މިދިޔަ އަހަރުގެ އޭއެފްސީ ކަޕް ކޮވިޑް-19ގެ ސަބަބުން މެދުކަނޑާލުމަށް ފަހު އަލުން ސެންޓްރަަލައިޒްކޮށް ބާއްވަން ނިންމައި އޭއެފްސީން ބިޑަށް ހުޅުވާލުމުން އެ ފަހަރު ވެސް ރާއްޖޭން ވަނީ ބިޑް ކާމިޔާބުކޮށްފަ އެވެ. މެޗުތައް ކުޅެން ނިންމީ އޮކްޓޫބަރު މަހު މާލޭގަ އެވެ. އެކަމަކު އެ ފަހަރު ހުރިހާ ގްރޫޕެއްގެ މެޗުތައް ކުރިއަށްގެންދޭނެ ގޮތެއް ނެތުމުން އޭއެފްސީން ނިންމީ މުބާރާތް ކެންސަލްކުރާށެވެ. މުބާރާތް ކެންސަލްކުރުމުގެ ކުރިން ރާއްޖޭގައި ކުޅޭނެ މެޗުތަކުގެ ޝެޑިއުލް ނެރުނެވެ. އަދި މުބާރާތް އެއްކޮށް ކެންސަލްކުރިއިރު މާޒިޔާ އިން ވަނީ ޕްރެކްޓިސް ވެސް ފަށައިފަ އެވެ.
ރާއްޖޭން މި ފަަހަރުގެ އޭއެފްސީ ކަޕް ބިޑް ކާމިޔާބުކުރީ އިންޑިއާއާ ވާދަކޮށެވެ. ރާއްޖެ އަށް މި ފަހަރުގެ ބިޑް ކާމިޔާބުވުމުގައި މިދިޔަ އަހަރު އެންމެ އުނދަގޫ ހާލަތުގައި ވެސް ރާއްޖޭން އޭއެފްސީ ކަޕް ބާއްވަން ކުރި މަސައްކަތް އިސް ދައުރެއް އަދާކުރި އެވެ.
އޭއެފްސީ ކަޕްގެ ދެކުނު އޭޝިއާގެ ގްރޫޕް (ގްރޫޕް ޑީ)ގައި މި ވަގުތު އޮތީ ރާއްޖޭގެ ޗެމްޕިއަން މާޒިޔާ، އިންޑިއާގެ އޭޓީކޭ މޯހަން ބަގަން އަދި ބަންގްލަދޭޝްގެ ބަޝުންދުރަ ކިންގްސް އެވެ. ބާކީ އޮތް ޖާގަ ލިބޭނީ ކޮލިފައިން ކާމިޔާބުކުރާ ޓީމަކަށެވެ. ކޮލިފައިން ބުރުގައި އިންޑިއާގެ ބެންގަލޫރާއި ރާއްޖޭގެ އީގަލްސް އަދި ބަންގްލަދޭޝްގެ ޑާކާ އަބަހާނީ ވާދަކުރާނެ އެވެ.
އޭއެފްސީ ކަޕްގައި ދެކުނު އޭޝިއާ ޓީމުތައް ކުޅޭ ކޮލިފައިން ބުރު އޮންނާނީ އަންނަ މަހު ހަތް ވަނަ ދުވަހުން ފެށިގެން 21 ވަނަ ދުވަހުގެ ނިޔަލަށެވެ. މާލޭގައި ކުރިއަށްދާ ގޮތަށް މިއަދު ހަމަޖެހުނު ގްރޫޕް ސްޓޭޖުގެ މެޗުތައް ތާވަލުކޮށްފައިވަނީ މެއި މަހު 14 އިން 20 ވަނަ ދުވަހަށެވެ.
ދާދި ފަހުން ރާއްޖެ ޓީވީ "ކުޅިވަރު ފައިލް" ޕްރޮގްރާމްގައި ވާހަކަ ދައްކަވަމުން ބައްސާމް ވިދާޅުވީ އޭއެފްސީ ކަޕްގެ ގްރޫޕް ސްޓޭޖު ބާއްވަން ރާއްޖޭން ބިޑްކުރާނީ ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ލިބެން ޖެހޭ ޔަގީންކަން ލިބުމުން ކަމަށެވެ. އެއީ ބައިނަލްއަގުވާމީ މުބާރާތެއްގެ މެޗުތަކެއް ހޯސްޓްކުރަން ބިޑްކޮށް އެކަން ކާމިޔާބުވެފައި އޮއްވައި ވަކި ހިސާބަކުން ހުއްޓާލަން ޖެހިއްޖެނަމަ އެއީ ފަސޭހަކަމަކަށް ނުވާނެތީ ކަމަށެވެ.
އެޗްޕީއޭ އިން ކަނޑައެޅި ހާއްސަ ގައިޑްލައިންތަކެއްގެ ދަށުން ފުރަތަމަ ޑިވިޝަން ކްލަބްތަކުން ވަނީ މަހެއްހާ ދުވަހުގެ މެދުކެނޑުމަށް ފަހު އިއްޔެ ޕްރެކްޓިސްތައް ފަށައިފަ އެވެ. މާލެ ސަރަހައްދުގައި ކޮވިޑް-19ގެ ކޭސްތައް ގިނަވާތީ އެޗްޕީއޭގެ އެންގުމާ އެއްގޮތަށް ދިރާގު ދިވެހި ޕްރިމިއާ ލީގާއި ފަރިތަކުރުންތައް ވެސް މެދުކަނޑާލީ މިދިޔަ މަހު ތިން ވަނަ ދުވަހު އެވެ.