ކުރިން ވެސް ސިޔާސީ ދާއިރާގައި މަސައްކަތްކޮށްފައިވާ އިންޑިއާގެ ފިލްމީ ތަރި މިތުން ޗަކްރަބަތީ އަލުން ސިޔާސީ ދާއިރާ އަށް ނުކުމެ، ވެރިކަންކުރާ ޕާޓީ ބީޖޭޕީ އަށް ސޮއިކޮށްފި އެވެ.
އާދީއްތަ ދުވަހު އެ ޕާޓީ އަށް ސޮއިކުރުމަށް ފަހު، 70 އަހަރުގެ އެކްޓަރު ވަނީ އެ ފުރުސަތު ދިންކަމަށްޓަކައި ބީޖޭޕީ އަށް ވަރަށް ބޮޑަށް ޝުކުރު ވެސް އަދާކޮށްފަ އެވެ. މިތުން ބުނީ އޭނާ އަކީ އަބަދު ވެސް ހައްގު ބަސް ބުނުމުގައި ދެމިހުންނަ މީހެއް ކަމަށާއި އަލުން ސިޔާސީ ދާއިރާ އަށް ނުކުތީ ވެސް އެ ފަލްސަފާގެ ތެރެއިން ކަމަށެވެ.
ޕާޓީ އަށް ސޮއިކުރުމަށް ފަހު ފުރަތަމަ ބައިވެރިވި ރެލީއެއްގައި މިތުން ވަނީ ބީޖޭޕީ އަކީ ވަރަށް ވަރުގަދަ ޕާޓީއެއްގެ ގޮތުގައި ސިފަކޮށްފަ އެވެ. އެގޮތުން އެކަން އޭނާގެ ފިލްމެއްގެ ޑައިލޮގަކާ ގުޅުވާފައި ބުނީ "ކޯބްރާ އަކީ އެއް ފަހަރުން ވިހަލައި ދުވަސް ދުއްވައިލާ އެއްޗެއް" ކަމަށާއި ބީޖޭޕީ އަކީ އަބަދު ވެސް އެ ޕާޓީއާ ދެކޮޅު މީހުން މައިތިރިކުރަން ދަންނާނެ ޕާޓީއެއް ކަމަށެވެ.
"އެހެންވީމަ އަހަންނާ ދޭތެރޭ ވެސް ފަރުވާތެރިވާން ޖެހޭނެ. ސިޔާސީ މަސައްކަތްކުރަން ވަރަށް ވަރުގަދަ ޕްލެޓްފޯމެއް އަލުން މި ލިބުނީ،" މި ފަހުން ސިއްހީ ހާލަތު އެހާ ރަނގަޅު ނޫން އެކްޓަރު ބުންޏެވެ.
މިތުން އަކީ ކުރިން އިންޑިއާގެ ގާނޫނު ހަދާ މަޖިލީހުގެ މަތިގެ ރާޖިއާ ސަބާގެ މެމްބަރުކަންކޮށްފައިވާ މީހެކެވެ. އެއީ 2014-2016 އަށެވެ. އޭރު އޭނާގެ ވެސްޓް ބެންގާލް ތަމްސީލުކުރީ އޯލް އިންޑިއާ ތުރިނަމޫލް ކޮންގްރެސް (ޓީއެމްސީ) ގެ މެމްބަރެއްގެ ގޮތުގަ އެވެ. އަދި ކޮމިއުނިސްޓް ޕާޓީ އޮފް އިންޑިއާ (ސީޕީއައި) ގައި ވެސް މިތުން ކުރިން އުޅުނެވެ.
މިތުން އަކީ 1970-1990 އަހަރުތަކުގައި އިންޑިއާގައި އެންމެ ވިދައިލި އެކްޓަރުންގެ ތެރެއިން އެކެކެވެ. ހާއްސަކޮށް އޭނާގެ ނެށުމުގެ ހުނަރު ވަރަށް ބޮޑަށް ފާހަގަކުރެވިގެން ގޮސްފައިވެ އެވެ.
އިންޑިއާގައި ފިލްމު ހަދާ ވަރަށް ގިނަ ބަހުރުވަތަކުން ފިލްމު ކުޅެފައިވާ މިތުންގެ ކުރިއަށް އޮތް ފިލްމަކީ މި އަހަރުގެ އޮގަސްޓްގައި ގެނެސްދޭ "ދަ ކަޝްމީރު ފައިލްސް" އެވެ.
މިތުން ބީޖޭޕީ އަށް ސޮއިކުރި އިރު މަޝްހޫރު ފިލްމީ ތަރި ސަނީ ޑިއޯލް އަކީ ވެސް އެ ޕާޓީގެ ޓިކެޓްގައި މިހާރު ލޯކް ސަބާގެ މެމްބަރެކެވެ.