މިދިޔަ ބުރާސްފަތި ދުވަހުގެ ރޭ ކުރީގެ ރައީސް މުހަންމަދު ނަޝީދު އަވަހާރަކޮށްލަން ދިން ހަމަލާގައި ބޮޑު ގޮވުމެއް ގޮވާފައިވާ ކަމަށް، ފުލުހުން މިއަދު އާންމުކުރި ވީޑިއޯއިން ފެނިއްޖެ އެވެ.
އޭތި ގޮއްވާލައިފައި ވަނީ ފުލުހުން ބުނެފައިވާ ގޮތުގައި ނަޝީދުގެ ކާރުކޮޅާ ވަރަށް ކައިރީގައި ހުރި ސައިކަލެއްގައި ހަރުކޮށްގެންނެވެ.
އާންމުކުރި ގާތްގަނޑަކަށް ތިރީހަކަށް ސިކުންތުގެ ވީޑިއޯ އިން ފެންނަނީ ނަޝީދު، އެމަނިކުފާނު ދިރިއުޅުއްވާ ގެކޮޅު، ގ. ކެނެރީގެ އިން 8:27 ހާއިރު ނުކުމެ ވަޑައިގަތުމާއި ގޮވުމާ ދޭތެރޭ ކަން ހިނގައިދިޔަ ގޮތެވެ. ނީލޯފަރުމަގުން މަޖީދީމަގާ ދިމާއަށް އެމަނިކުފާނު ހިންގަވާފައި ވަޑައިގަތީ ތިން ބޮޑީގާޑުންނާ އެކު އެވެ. އެއް ބޮޑީގާޑަކު ކުރީގައި ހުއްޓެވެ. އަނެއް ދެ ބޮޑީގާޑުން ތިބީ އެމަނިކުފާނުގެ ފަހަތުގަ އެވެ. އަދި ބައެއް އާންމުން ވެސް ސައިކަލްގަ އާއި ހިނގާފައި ވެސް އެތަނުން ދިޔަ ތަން ފެނެ އެވެ.
ހަނި ގޯޅިތެރެއިން، އަދި ދުއްވާ މީހުންނާއި ޕާކްކޮށްފައި ހުރި ސައިކަލްތަކުގެ ތެރެއިން ނަޝީދު ކުރިއަށް ވަޑައިގަތީ، ދެ ފަރާތް ބައްލަވަމުން ހިނިތުވުންވުމާ އެކު ކަން ވީޑިއޯ އިން ފެނެ އެވެ. ނަޝީދު ކާރާ އަރާ ހަމަވެ ވަޑައިގަތް އިރު، އޭރު އެތާނގައި ޕާކްކޮށްފައި ހުރި ސައިކަލަކަށް އާންމުންގެ މީހަކު އަރަން މަސައްކަތް ކުރާ ތަން ފެނެ އެވެ. އަދި އެހެން މީހަކު އެމަނިކުފާނުގެ ކުރިމަތިން ވެސް ދިޔަ ތަން ފެނެ އެވެ. އޭރު މަޖީދީމަގުން އެއްކޮޅުން އަނެއްކޮޅަށް އެއްޗެހި ދުއްވާތަނާއި މީހުން ހިނގާ އުޅޭ ތަން ވެސް ފެނެ އެވެ.
ނަޝީދުގެ ކުރީގައި ހުރި ބޮޑީ ގާޑު ކާރުގެ ދޮރުކޮޅު ހުޅުވާލަން ހަމަ އުޅުމާ އެކު ބޮން ގޮއްވާލި އެވެ. އޭރު ނަޝީދު ހުރީ ގޮއްވާލި އެއްޗާ، ބެލެވޭ ގޮތުގައި ތިން ހަތަރު ފޫޓެއްހާ ދުރުގަ އެވެ. ބޮޑު ގޮވުމާ އެކު ދުންގަނޑު ފެތުރި މުޅި ތަން އޮތީ ހުދުވެފަ އެވެ. މީހުން ދުވަމުން ދިޔަ ތަން ފެނެ އެވެ. ބޮން ގޮވުމާ އެކު އެމަނިކުފާނު ވެއްޓުނެވެ. އަދި ބޮޑީ ގާޑީ އެމަނިކުފާނު ނަގައިގެން ގެންގޮސް ކާރަށް ލިތަން ވެސް ފެނެ އެވެ. އޭރު އާންމުންގެ ތެރެއިން އެކަކު ދެ ކަންފަތުގައި އަތް އަޅައިގެން ދުވަމުން ދިޔަ ތަނާއި އެހެން ބައެއް މީހުން ވެސް ދުވަމުން ދިޔަ ތަން ވަރަށް ރީތިކޮށް ފެނެ އެވެ.
މި ވީޑިއޯ އަކީ ނީލޯފަރުމަގުގައި ހުރި ސީސީޓީވީއެއްގެ ފުޓޭޖެކެވެ.
މި ހަމަލާގައި ރައީސް ނަޝީދަށް ވަނީ ފުރާނަ އަށް ނުރައްކާވާ ވަރުގެ ސީރިއަސްތައް ޒަހަމްތައް ލިބިފަ އެވެ. އެމަނިކުފާނު އަދިވެސް އޮތީ އޭޑީކޭގެ އައިސީޔޫގަ އެވެ. މި ހަމަލާގައި އާންމުންގެ އެކަކާއި ތިން ބޮޑީ ގާޑުންގެ އިތުރުން އިނގިރޭސިވިލާތުގެ ރައްޔިތަކު ވެސް ޒަހަމްވި އެވެ.
ބޮން ގޮއްވި ކަމުގެ ތުހުމަތުގައި މިއަދު ދެ މީހަކު ވަނީ ހައްޔަރުކޮށްފަ އެވެ. އެހެން ނަމަވެސް، ފުލުހުން މިއަދު ބުނެފައި ވަނީ މިކަމުގައި ހިމެނޭ އެންމެ މުހިންމު މީހާ އަދި އަތުނުވާ ކަމަށެވެ.