އެމްއެމްޕީއާރުސީގެ ބޮޑު ހިޔާނާތުގެ ފައިސާ ލިބުނު ފަރާތްތަކުގެ ތެރެއިން ދައުލަތުގެ މަގާމުތަކުގައި ތިއްބެވި ބޭފުޅުންނާއި ކުރިން ތިއްބެވި ބޭފުޅުންގެ ނަން ހިމެނޭ ގޮތަށް އާންމުކުރީ "ސިޔާސީ" ލިސްޓެއް ކަމަށް، އެ ލިސްޓުގައި ނަން އޮތް ޔޫތު މިނިސްޓަރު އަހުމަދު މަހްލޫފް ވިދާޅުވެއްޖެ އެވެ.
އާންމުކުރި ލިސްޓުގައި މި ސަރުކާރުގެ ވަޒީރުންގެ ތެރެއިން ނަން އޮތީ މަހްލޫފްގެ އެކަންޏެވެ. އެ މައްސަލައިގައި ދައުވާކުރެވޭ ހިސާބަށް މަހްލޫފްގެ މައްސަލަ ނިމިފައި އޮތް ކަމަށް ދައްކަ އެވެ.
އެކަމާ ގުޅޭގޮތުން މަހްލޫފް ކުރެއްވި ފޭސްބުކް ޕޯސްޓެއްގައި ވިދާޅުވީ އޭނާގެ އެކައުންޓަށް ޖަމާވެފައިވާ އެސްއޯއެފްގެ ޗެކުގެ މައްސަލައިގައި 2019 ވަނަ އަހަރު ރައީސް އިބްރާހީމް މުހައްމަދު ސޯލިހު ވަނީ، އޭނާ މަގާމުން ކުރިން ސަސްޕެންޑްކޮށްފައި ކަމަށެވެ. އަދި ތަހުގީގީ އިދާރާތަކުން އޭނާގެ މައްސަލައެއް ބަލަމުންނުދާތީ އަލުން މަގާމުގެ މަސްއޫލިއްޔަތުތައް ހަވާލުކުރެއްވި ކަމަށް މަހްލޫފްގެ ޕޯސްޓްގައިވެ އެވެ.
މަހްލޫފް ވިދާޅުވީ ސިޔާސީ ބަޔަކު އެކުލަވާލެއްވި، އެ ލިސްޓުގައި ސީދާ ގުޅުން ނެތް އެތައް ބައެއްގެ ނަން ހިމެނުމަކީ ހިޔާނާތުގައި ބައިވެރިވުން ނޫން ކަމަށެވެ. އަދި އޭނާގެ މައްޗަށް ދައުވާއެއް ކޮށްފި ނަމަ، މިނިސްޓަރުކަމުގެ މަގާމުގައި އެންމެ ދުވަހަކު ވެސް ނުހުންނަވާނެ ކަމަށް މަހްލޫފް ވިދާޅުވެ އެވެ.
"ސިޔާސީ ބަޔަކު އެކުލަވާލި، އަދި އެ މައްސަލައާ ސީދާ ގުޅުން ނެތް އެތައް ބައެއްގެ ވެސް ހައްގުތައް ގެއްލިގެންދިޔަ ލިސްޓެއްގައި ނަން އޮތުމަކީ ކުށްވެރިވުމެއް ނޫން އަދި އެކަމުގައި ބައިވެރިވުމެއް ވެސް ނޫން. އެހެންނަމަވެސް އަޅުގަނޑުގެ މައްޗަށް ދައުވާއެއް ކޮށްފިނަމަ މި މަގާމުގަ އެންމެ ދުވަހަކު ވެސް ނުހުންނާނަން،" މަހްލޫފް ވިދާޅުވި އެވެ.
އެސްއޯއެފްްއާ އެކު ޑޮލަރުގެ މުއާމަލާތެއް ހިންގުމުން، މަހްލޫފްް ސަސްޕެންޑް ކުރީ ފެބްރުއަރީ 14، 2019 ގަ އެވެ. އެންޓި ކޮރަޕްޝަން ކޮމިޝަން (އޭސީސީ) ގައި މަހްލޫފްގެ މައްސަލައެއް ނެތުމާއި ބަލަން ޖެހޭ އިތުރު ކަންކަމަށް ބެލުމަށް ފަހު، މަހްލޫފްގެ ސަސްޕެންޝަން އުވާލީ، އޭގެ ދެ މަސް ފަހުން، 16 އޭޕްރީލްގަ އެވެ.
މަހްލޫފް ސަސްޕެންޑްކުރީ އެސްއޯއެފުން ޑޮލަރު ޖަމާކުރި ފަރާތްތަކުގެ ތަފްސީލު ހިމެނޭ ރިޕޯޓް އޭސީސީން ނެރުމުން، މަހުލޫފްގެ މުއާމަލާތެއް ވެސް އޭގައި ހިމެނުމުންނެވެ. އެކަމުގައި މަހުލޫފް ވިދާޅުވީ އޭނާގެ އެކައުންޓަށް 33،000 ޑޮލަރު ވަދެފައި ވަނީ، ޑޮލަރު ގަތުމަށް ހިންގެވި ސައްހަ މުއާމަލާތެއްގެ ތެރެއިން ކަމަށެވެ. އަދި އެސްއޯއެފުން ބޭނުންކުރީ އެމްއެމްޕީއާރުސީގެ ފައިސާކަން އެނގިވަޑައިނުގަންނަވާ ކަމަށް ވެސް ވިދާޅުވެފައިވެ އެވެ. މަހުލޫފުގެ އެދިވަޑައިގަތުމަކަށް އޭނާގެ މައްސަލަ ބެލުމަށް ފަހު އޭސީސީން ވަނީ އެކަމުގައި އޭނާގެ ހިޔާނާތުގެ ކަމެއް ނެތް ކަމަށް ނިންމައިފަ އެވެ.
