މާލޭ އުތުރު ފަރާތް ރީތިކޮށްލަން މި ސަރުކާރުގެ ޕްލޭނަކީ މިއީ!

އެމްޕީއެލް އާއި މާރުކޭޓު ސަރަހައްދުގެ އިތުރުން މާލޭގެ އެހެން ބައެއް ސަރަހައްދުތައް ރީޑިވެލޮޕް ނުވަތަ އަލުން ތަރައްގީ ކުރުމަށް ސަރުކާރުން ގެންގުޅޭ ޕްލޭން ދައްކާލައިފި އެވެ.

މާލެ ރީތިކުރުމަށް ސަރުކާރުން ގެންގުޅޭ ތަސައްވުރު ދައްކާލީ މާލޭ ސިޓީ ކައުންސިލުން ބޭއްވި، މާލޭ ސިޓީގެ ލޭންޑް ޔޫސް ޕްލޭނަށް އާންމުންގެ ހިޔާލު ހޯދުމަށް ރޭ ބޭއްވި ބައްދަލުވުމުގަ އެވެ. ލޭންޑް ޔޫސް ޕްލޭން އެކުލަވާލުމުގެ ކުރިން ރައްޔިތުންގެ ހިޔާލު ހޯދަން ބައްދަލުވުމެއް ބޭއްވުމަކީ ގާނޫނުން ސިޓީ ކައުންސިލަށް މަތިކޮށްފައިވާ ކަމެކެެވެ.

އެ ބައްދަލުވުމުގައި ޕްލޭނިން މިނިސްޓްރީން ދައްކާލި ޕްރެޒެންޓޭޝަންގައި ވަނީ މާލޭގައި ރީޑިވެލޮޕް ކުރެވޭނެ ބިންތައް ދައްކާލައި އެ ސަރަހައްދުތަކާ ބެހޭގޮތުން ގެންގުޅޭ ވިސްްނުން ކިޔައިދީފަ އެވެ.

އެ ޕްރެޒެންޓޭޝަނުގައިވާ ގޮތުން ގުޅީފަޅުގައި ޕޯޓު އެޅުމުން މިހާރު މާލޭގެ އެމްޕީއެލް އާއި މާރުކޭޓު ސަރަހައްދަށް ބޮޑެތި ބަދަލުތަކެއް ގެންނައުމުގެ ވިސްނުން ސަރުކާރުގެ އެބަ ހުއްޓެވެ. ޕްލޭނިންއިން ދައްކާލި ކޮންސެޕްޓުގައިވާ ގޮތުން އެ ސަރަހައްދު ތަރައްގީ ކުރާނީ އާންމުން ހިތްފަސޭހަކޮށްލަން ދެވޭ، ފެހި ތަނެއްގެ ގޮތުގަ އެވެ.

މަސް މާރުކޭޓު ބަދަލު ކުރާނީ ވަޅޯމަަސް މާރުކޭޓު ހުރި ތަނަށެވެ. އެތަން ވެސް ޒަމާނީ ފެންވަރަށް ތަރައްގީ ކުރަން ވިިސްނާފައިވެ އެވެ. އާ ޒަމާނީ ފެންވަރުގެ ލޯކަލް މާރުކޭޓު ބަދަލު ކުރާނީ ވެސްޓް ޕާކު ކައިރި އަށެވެ.

މިހާރު ޕޯޓު ހުރިތަން މުނިފޫހިފިލުވުމުގެ ސަރަހައްދަކަށް ހަދަން އެތަނުގައި ވޯޓާ ޕާކަކާއި ސިނަމާ އަޅަން ވިސްނާފައިވެ އެވެ. އަދި މުޅި އެ ސަރަހައްދު ފެހިކޮށްލަން ވެސް ރާވާފައިވެ އެވެ.

އޭގެ އިތުރުން އެ ކޮންސެޕްޓުގައިވާ ގޮތުން އެ ސަރަހައްދުގައި ކްރޫޒް ޝިޕް ޓާމިނަލެއްގެ އިތުރުން، މާލޭގެ މައި ފެރީ ޓާމިނަލް ވެސް ގާއިމް ކުރާނެ އެވެ.

މާލޭގެ ހުޅަނގު ފަރާތު ރަސްފަންނު ކައިރިން ވެސް ވޯޓާ ފްރަންޓް ސަރަހައްދު އިޖުތިމާއީ އެކި ބޭނުންތަކަށް ފެހި ތަނެއްގެ ގޮތުގައި ތަރައްގީ ކުރާ ގޮތަށް އޮތީ ވިސްނައިފަ އެވެ. އެގޮތުން، މާކެޓް ހޯލަކާއި ކޮމިއުނިޓީ ސެންޓަރަކާ އެކު ރަސްފައްނު ތަރައްގީ ކުރަން ނިންމާފައި ވަނީ ގާޑަން ޕްލާޒާއެއްގެ ގޮތުގަ އެވެ.

ވިލިމާލޭ ފެރީ ޓާމިނަލް ހިމޭނޭހެން ޓީ ޖެޓީ ސަރަހައްދު ވެސް ތަރައްގީކުރަން ރާވާފައި ވަނީ ހިތްހަމަޖައްސާލަން ދާ ފަދަ ފެހި ވޯޓާ ފްރަންޓް މާހައުލެއްގެ ގޮތުގަ އެވެ.

އޭގެ އިތުރުން، ރާއްޖޭގެ އަޑާ އިންވެގެން އޮންނަ ދައުލަތުގެ ބިމެއް މީހުން ދިރިއުޅޭ ރެޒިޑެންޝަލް ތަނެއްގެ ގޮތުގައި ތަރައްގީ ކުރަން ރާވާފައިވެ އެވެ.

މާލޭގެ ދެކުނު ފަރާތުގައި ކުޑަކުދިންގެ ބަގީޖާ ހިމެނޭހެން އެ ސަރަހައްދުން ބޮޑު ބިމެއްގައި ނެއިބާހުޑް ޑިވޮލޮޕްމެންޓެއް ހިންގަން ރާވާފައިވެ އެވެ. އެތަނުގައި އޮފީސް އަދި ރެޒިޑެންޝަލް އިމާރާތްތަކާއި ފިހާރަ ތަކާއި ހަމައެކަނި ހިނގާ ބިނގާ އުޅެވޭ މަގުތައް ހުންނާނެ ކަމަށް ޕެލޭނިން މިނިސްޓްރީން ބުންޏެވެ.

ހިޔާލު ހޯދުމުގެ ބައްދަލުވުމުގައި ޒޫމް މެދުވެރިކޮށް ކޮމެންޓު ކުރަމުން ދިޔަ މާލޭގެ ބައެއް ރައްޔިތުން ބުނަމުން ދިޔައީ ބޭނުންވަނީ ފެހި ތަންތަން ނޫން ކަމަށާއި ބޯހިޔާވަހިކަމުގެ މައްސަލަ އަށް ހައްލެއް ކަމަށެވެ.

އިންޑަސްޓްރިއަލް ވިލެޖުގައި ވެސް ޕާކު، ކައުންސިލުން އެއްބަހެއް ނޫން

ޕްލޭނިން މިނިސްޓްރީން ބުނި ގޮތުގައި އިންޑަސްޓްރިއަލް ވިލެޖު ވެސް ތަރައްގީ ކުރަން ނިންމާފައި ވަނީ ފެހި ތަނެއްގެ ގޮތުގަ އެވެ. އަދި އެތަނުގައި ބަސް ޓާމިނަލާއި ފެހި ސަރަހައްދުތަކާއި، ޕާކިން އޭރިއާތައް ވެސް ހުންނާނެ އެވެ.

މިއީ މާލޭ ސިޓީ ކައުންސިލުން ބޭނުންވާ ގޮތާ ހިލާފު ކަމެކެވެ. އެ ކައުންސިލުން ފާސް ކޮށްފައި ވަނީ އެތަނަށް އިންޑަސްޓްރިއަލް މަސައްކަތް ކުރާ ފަރާތްތަަށް ބަދަލު ކުރާށެވެ. ކުރީގެ ރައީސް އަބްދުﷲ ޔާމީންގެ ސަރުކާރުގައި އެތަން ހިއްކީ ވެސް އެ ވިސްނުމުގަ އެވެ. ނަމަވެސް، ސަރުކާރުން ބޭނުންވަނީ އެފަދަ ތަންތަން ތިލަފުއްޓަށް ބަދަލު ކުރާށެވެ.

ބައްދަލުވުމުގައި އާންމުންގެ ހިޔާލު ހޯދަން ހުޅުވާލި ފުރުސަތުގައި ހަސަން ޒަރީރު ކިޔާ މީހަކު ވެސް ވަނީ އެގޮތަށް އެކަން ކުރަން އެދިފަ އެވެ. އޭނާ ބުނީ، މާލޭގައި މީހުން ދިރިއުޅޭ ސަރަހައްދަށް ވިހަ ދުންތައް ބޭރު ކުރާ އިންޑަސްޓްރިއަލް މަސައްކަތް ކުރާ ފަރާތްތައް ބަދަލު ކުރަންވީ އިންޑަސްޓްރިއަލް ވިލެޖަށް ކަމަށެވެ.

މާލޭގެ މޭޔަރު ޑރ. މުހަންމަދު މުއިއްޒު ވިދާޅުވީ، ސަރުކާރުގެ ޕްރެޒެންޓޭޝަނުގައި އެއްބަސްވާ ގިނަ ކަންތައްތަކެއް ހުއްޓަސް އޭގައި ދެބަސްވާ ބައެއް ކަންތައްތައް ހުރި ކަމަށެވެ. އޭގައިވާ އެއްވެސް ކަމަކީ ކުރަން މުޅިން ނިންމާފައިވާ ކަމެއް ނޫން ކަމަށާއި އެއްވެސް ކަމެއް ނިންމާނީ ރައްޔިތުންގެ ހިޔާލު ހޯދައިގެން ކަމަށް އޭނާ ވިދާޅުވި އެވެ.

"މި ހުށަހަޅާ ޕްރެޒެންޓޭޝަންގައިވާ ކަންތައްތަކަކީ ފައިނަލް ކަންތަކެއް ނޫން. އެއީ ހިޔާލުތަކެއް ނޫނިއްޔާ އޮޕްޝަންސްތަކެއް. އަޅުގަނޑުމެން ދެ މުއައްސަސާގެ މެދުގައި ވެސް އެއްބަސް ނުވެވޭ ކަންތައްތަކެއް ވޭ،" މުއިއްޒު ވިދާޅުވި އެވެ.

އޭނާ ވިދާޅުވީ، ކުރިއަށް އޮތްތަނުގައި ޒުވާނުންނަށާއި އަންހެނުންނަށް އަދި އުމުރުން ދުވަސްވީ މީހުން ފަދަ ވަކި ގްރޫޕުތަކާއި އެކި ދާއިރާތަކުގައި މަސައްކަތް ކުރާ ފަރާތްތަކަށް ހާއްސަކޮށްގެން ބައްދަލުވުންތަކެއް ބާއްވާނެ ކަމަށެވެ.

އެކި ދާއިރާތަކުގެ މީހުންނާ ބައްދަލު ކުރާނީ ދެ ހަފްތާ ވަންދެން ކަމަށް މުއިއްޒު ވިދާޅުވި އެވެ. އަދި ގެ ދެވަނަ ޑްރާފްޓް ޕްލޭނެއް ހެދޭނީ ފަސް ވަރަަކަށް ހަފްތާ ފަހުން ކަމަށް މުއިއްޒު ވިދާޅުވި އެވެ. އެއްވެސް ކަމެއް ނިމިގެންދާނީ ރައްޔިތުންގެ ހިޔާލާ އެކު ކަމަށް ވިދާޅުވި އެވެ.

ޒޫމް މެދުވެރިކޮށް އޮންލައިންކޮށް ބޭއްވި އެ ބައްދަލުވުމުގައި 200 އަށް ވުރެ ގިނަ މީހުން ބައިވަރިވި އިރު 100 އަށް ވުރެ ގިނަ މީހުން ވާހަކަ ދައްކަން ފުރުސަތަކަށް އެދުނެވެ. ނަމަވެސް، ވަގުތު ނެތުމުން ފުރުސަތު ދެވުނީ ދެ ތިން މީހުންނަށެވެ.