ސްޓެލްކޯ އިންޖީނުތަކުގެ ދުމާއި އަޑު ފޯރާ ހިސާބުގައި ދިރިއުޅޭ މީހުން ސާފު އަދި ސިއްހަތަށް ރަނގަޅު މާހައުލެއް ލިބުމުގެ ހައްގުން މަހުރޫމްވެފައިވާތީ އެ މައްސަލައަށް ވަގުތުން ހައްލު ހޯދައިދޭން އެންގުމަށް އެޗްއާރްސީއެމުން ނިންމައިފި އެވެ.

އެޗްއާރްސީއެމުން ނިންމާފައި ވަނީ މިކަމުގައި ބަދަލު ހޯދަން ވެސް ދެވޭނެ ކަމަށެވެ.

އޭޕްރީލް 18، 2021 ގައި ފޮނުވި މައްސަލަ ބެލުމަށް ފަހު އެޗްއާރުސީއެމުން ނިންމީ ސްޓެލްކޯ އިންޖީނުތައް ބަހައްޓާފައިވާ ސަރަހައްދުގައި ރައްޔިތުން އުޅެނީ ސިއްހަތަށް އެކަށީގެންވާ މާހައުލެއްގައި ނޫން ކަމަށެވެ. އެހެންވެ، އިންސާނީ އަދި އިޖުތިމާއީ ހައްގުތަކުގައި ބަޔާންކޮށްފައިވާ ދިރިއުޅޭނެ ސާފު އަދި ސިއްހަތަށް ރަނގަޅު މާހައުލެއް ލިބުމުން މަހުރޫމްވެފައިވާ ކަމަށް ބުންޏެވެ.

ގ. ފެހިރިހީގައި ދިރިއުޅޭ މީހުންގެ ފަރާތުން އެޗްއާރުސީއެމަށް ހުށަހެޅި މައްސަލައިގައި ބުނީ ސްޓެލްކޯ ކޮށީގައި ބަހައްޓާފައި ހުރި ބޮޑެތި އިންޖީނުތަކުން ކަޅުދުމާއި ތެޔޮ ވަހުގެ އަސަރު އެ ގޭގައި އުޅޭ މީހުންނަށް ކުރާ ކަމަށެވެ. އެކަމުގެ ސަބަބުން ނޭވާލަން އުނދަގޫވެ، އަޑުގަދަވަމުން އެޕާޓްމަންޓުތަކުގެ ދޮރު ހުޅުވާލައިގެން އުޅުމަކީ ބޮލުގެ ރިހުމެއް ކަމަށް ބުނެފައިވެ އެވެ.

އިންޖީނުގެތަކުގެ އަޑުގަދަވުމުން އޮންލައިންކޮށް ކިޔަވަން އުނދަގޫވާތީ ކުދިންގެ ތައުލީމަށް ހުރަސްއެޅޭ ކަމަށް ސިޓީގައި ބުންޏެވެ. އޭގެ އިތުރުން ނިދަން އުނދަގޫވުމާއި ސްޓްރެސް އިތުރުވުމާއި ލޭގެ ޕްރެޝަރު މައްޗަށް ދިއުން ފަދަ ބަލިތައް ކުރިމަތިވާ ކަމަށް ވެސް ބުނެފައިވެ އެވެ.

އެ މައްސަލައާ ގުޅިގެން މެއި 3، 2021 ގައި އެޗްއާރުސީއެމުން ވަނީ ގ. ފެހިހިރިގެ އާއި އެ އާއިލާގެ މީހުން ދިރިއުޅޭ ގ. ރަސްރޯނުގެއަށް ޒިޔާރަތްކޮށްފަ އެވެ.

އެޗްއާރުސީއެމުން ބުނީ އެ ޒިޔާރަތުގައި ބެލިބެލުމުން، ސްޓެލްކޯ އިންޖީނުތައް ބަހައްޓާފައި ހުރި ސަރަހައްދުގައި ރައްޔިތުން އުޅެނީ ސިއްހަތަށް އެކަށީގެންވާ މާހައުލެއްގައި ނޫންކަން ފާހަގަވި ކަމަށެވެ. އެ މައްސަލައަށް މިހާރުން މިހާރަށް ހައްލު ހޯދައިދީ، ހައްގު ގެއްލިފައިވާ ރައްޔިތުންގެ ހައްގު ކަށަވަރުކޮށްދިނުމަށް ސްޓެލްކޯއަށް ލިޔުމުން އެންގުމަށް ނިންމާފައިވާ ކަމަށް ކޮމިޝަނުން ބުންޏެވެ.

"...ތިޔަ ފަރާތުން މި މައްސަލަ ކޯޓަށް ހުށަހެޅުމުގެ ފުރުސަތު އޮތްކަމާއި ތިޔަ ފަރާތްތަކަށް މި ކަމުގެ ސަބަބުން ލިބިފައިވާ ގެއްލުމުގެ މަދަނީ ބަދަލު ނަގައިދިނުމަށް އެދި ހުށަހެޅުމުގެ ފުރުސަތު ވެސް އޮތް ކަމުގައި އަންގައި، މި ކޮމިޝަނަށް ތިޔަ ފަރާތުން ހުށަހަޅާފައިވާ މައްސަލަ ބަލައި ނިމުނު ވާހަކަ ދަންނަވަމެވެ،" އެޗްއާރުސީއެމްގެ ސިޓީގައި ބުންޏެވެ.

މި މައްސަލަ އެޗްއާރްސީއެމްގެ އިތުރުން ރައްޔިތުންގެ މަޖިލީހަށް ވެސް ވަނީ ހުށަހަޅައިފަ އެވެ.