މި އަހަރުގެ ކުރީކޮޅު އަވަހާރަވި، އިނގިރޭސި ރާނީ އެލިޒަބަތުގެ ފިރިކަލުން ޕްރިންސް ފިލިޕްގެ ހަނދާނުގައި ފަސް ޕައުންޑްގެ ފައިސާފޮއްޗެއް ނެރެފި އެވެ.
ޕިލިޕްގެ ނަމާއި ސޫރަ ވެސް ސިފަކޮށްދޭ ކުރެހުން ހިމެނޭ ފައިސާފޮތި ނެރުނީ އިނގިރޭސިވިލާތުގައި ހޮނިހިރު ދުވަހު ފާހަގަކުރި މި އަހަރުގެ އާމްޑް ފޯސެސް ޑޭގައި ޗާންސެލަރު ރިޝީ ސުނަކް އެވެ. އޭނާ ވިދާޅުވީ ޕްރިންސް ފިޕިޕަށް ހާއްސަކޮށްގެން ފައިސާފޮއްޗެއް ނެރެން ނިންމީ އެއީ އިނގިރޭސި ޝާހީ އާއިލާގެ ވަރަށް ހިދުމަތްތެރި ބޭފުޅަކަށްވެފައި، ގައުމުގެ އެތައް ބަޔަކު ނަމޫނާއެއްގެ ގޮތުގައި ދެކުނު ޝަހުސިއްޔަތަކަށްވާތީ ކަމަށެވެ.
"މި ފައިސާފޮތި ނެރުމުގެ ޝަރަފު ލިބުމަކީ ވަރަށް ބޮޑު ފަހުރެއް. ޕްރިންސް ފިލިިޕަކީ ރާނީ އަށް ވަފާތެރި އަދި ގައުމީ ހިދުމަތުގައި ވެސް އެތައް ބަޔަކަށް އިންސްޕިރޭޝަނެއް،" ރިޝީ ވިދާޅުވި އެވެ. "އެހެންވީމާ ޑޫކް އޮފް އެޑިންބަރާގެ ހަނދާނުގައި ފައިސާ ފޮއްޗެއް ނެރުމަކީ މުޅި ގައުމަށް ވެސް ވަރަށް ހާއްސަ ކަމެއް."
މި ފައިސާފޮއްޗަކީ ހަނދާނީ އެއްޗެއްގެ ގޮތުގަގައި ރައްކާކުރަން ބޭނުންވާ މީހުން ގަނެވޭނެ އެއްޗެކެވެ. އެ ވިއްކާނީ އިނގިރޭސިވިލާތުގައި ފައިސާފޮތި އުފައްދާ ދަ ރޯޔަލް މިންޓް އިންނެވެ. ރަން ކުލަ އާއި ރިހި ކުލައިން ނެރުނު ފައިސާފޮތި ރޯޔަލް މިންޓްގެ ވެބްސައިޓް މެދުވެރިކޮށް ގަނެވޭނެ އެވެ.
ރޯޔަލް މިންޓުން ބުނި ގޮތުގައި ހަނދާނީ ފައިސާފޮއްޗާ އެކު، އެތަނުން ޑޫކް އޮފް އެޑިންބަރާ އެވޯޑް އަށް 50،000 ޕައުންޑް ވެސް ހަދިޔާކުރާނެ އެވެ.
ޕްރިންސް ފިލިޕް އުމުރުން 99 އަހަރުފުޅުގައި އަވަހާރަވީ އެޕްރީލް މަހުގެ 9 ގަ އެވެ.
