ރައްޔިތުންގެ މަޖިލީހުގެ ރައީސް މުހައްމަދު ނަޝީދު އަވަހާރަކޮށްލަން ހަމަލާ ދިނީ އެކަމުގެ ބަދަލުގައި ފައިސާ ހުށަހަޅައިގެން ކަމުގެ ހެއްކެއް އަދި ނެތް ކަމަށާއި މިހާތަނަށް ލިބިފައި ހުރި ހެކިތަކަށް ބަލާއިރު މިއީ ނަޝީދުގެ ފިކުރާއި ކުރައްވާ މަސައްކަތްޕުޅާ ގުޅުވައިގެން ދިން ހަމަލާއެއް ކަމަށް ފުލުހުން ދެންމެ ބުނެފި އެވެ.
މިރޭގެ ޕްރެސް ކޮންފަރެންސްގައި އެސިސްޓެންޓް ކޮމިޝަނަރު އޮފް ޕޮލިސް މުހައްމަދު ރިޔާޒް ވިދާޅުވީ ހަމަލާ ދިނުމަށް ބޭނުންވާ ކަންކަމަށް އެކި ގޮތްގޮތަށް ފައިސާ ހޯދާފައިވާކަން ތަހުގީގަށް އެނގިފައި ވިޔަސް ހަމަލާގެ މުގާބިލްގައި ފައިސާއެއް ހުށަހަޅާފައިވާ ކަމުގެ ހެއްކެއް އަދި ނެތް ކަމަށެވެ.
ނަޝީދު އަވަހާރަކޮށްލަން ބޮން ހަރުކުރި ސައިކަލް 2019 ގައި ގަންނަން 18،000ރ. އާއި ބޮން ގޮއްވުމަށް ބައެއް ކަންކަން ކުރުމަށް ހުޅުމާލޭގެ ގަރާޖަކުން އެ ސައިކަލް މަރާމާތު ކުރުމަށާއި ހަމަލާ ރޭވުމުގެ ކަންކަމަށް އެޕާޓްމަންޓެއް ކުއްޔަށް ހިފައި އެ ތަނަށް ހަރަދު ކޮށްފައިވާ ކަމަށް ރިޔާޒް ވިދާޅުވި އެވެ.
އޭނާ ވިދާޅުވިގޮތުގައި، 317 އަށް ވުރެ ގިނަ ބޭންކް ސްޓޭޓްމަންޓް ބަލާފައި ވެ އެވެ. އަދި މި ހަމަލަ އަށް ފައިސާ ހޭދަކޮށްފައިވޭތޯ ބަލަން މަރުކަޒީ ބޭންކް އެމްއެމްއޭގެ ފައިނޭންޝަލް އިންޓެލިޖެންސް ޔުނިޓް މެދުވެރިކޮށް ވެސް އެނަލައިސިސްތަކެއް ހަދާފައިވާ ކަމަށް ރިޔާޒް ވިދާޅުވި އެވެ.
"ހަމަ އެ ގޮތަށް ރައީސް ނަޝީދަކީ ވަރަށް ފާޅުގައި ކޮރަޕްޝަނާ ދެކޮޅަށް ވާހަކަ ދައްކަވާ، ދީނީ ހަރުކަށި ފިކުރުގެ ކަންކަމާ ގުޅޭ ގޮތުން އަޑު އުފުއްލަވާ ބޭފުޅަކަށް ވާތީވެ، މި ބާވަތުގެ ކަންތައްތަކާ ގުޅުން ހުރި ބަޔަކު މި ފަދަ ކަމަކަށް ފައިނޭންސް ކޮށްފައި އޮވެދާނެތޯ ބެލުމަށްޓަކައި ބަލަންޖެހޭ ބެލުންތައް ވެސް އަޅުގަނޑުމެން ތަހުގީގުގައި ބަލަމުން މި އައީ،" ރިޔާޒް ވިދާޅުވި އެވެ.
"މިހާތަނަށް ތަހުގީގަށް ހޯދުނު ހޯދުންތަކަށް ބަލާއިރުގައި، މިއީ ބަޔަކު ހަމަލާ ދިނުމުގެ މުގާބިލުގައި އިނާމެއްގެ ގޮތުގައި ފައިސާއެއް ކަނޑައަޅައިގެން، ފައިސާ ދީގެން ކުރުވާފައި ކަމެއް ކަމަށް ބަލާނެ އެއްވެސް ސަބަބެއް ތަހުގީގަށް ފެންނާކަށް ނެތް."
ރިޔާޒް ވިދާޅުވީ މިއީ އަދިވެސް ތަހުގީގު ކުރިއަށްދާ މައްސަލައެއް ކަމަށާއި ފައިސާއާ ގުޅުން ހުރި ކަންކަން އަދިވެސް ބަލަމުން ގެންދާނެ ކަމަށެވެ.
ނަޝީދަށް ހަމަލާ ދޭން ބަޔަކު ފައިސާ ހުށަހަޅައިގެން އުޅޭ ކަމުގެ މައުލޫމާތެއް ރައްޔިތުންގެ މަޖިލީހުގެ މެންބަރު އިލްޔާސް ލަބީބަށް ލިބިވަޑައިގެންފައި ވިޔަސް އެއީ ނަޝީދަށް ދިން ހަމަލާއާ ގުޅުން ހުރި މައުލޫމާތެއް ކަމުގެ ހެއްކެއް ތަހުގީގަށް އަދި ލިބިފައެއް ނުވެ އެވެ.
