ވަކިކުރާ އޮފިސަރުންގެ ލިސްޓު ސައްހައެއް ނޫން: ފުލުހުން

ފުލުހުންގެ އިސް ހަ އޮފިސަރަކު މަގާމުން ވަކި ކުރަން ޕޮލިސް ބޯޑުން އިއްޔެ ލަފާ ދީފައިވާއިރު، މިހާރު އާންމުވެފައިވާ އެ އޮފިސަރުންގެ ލިސްޓު ސައްހަ ނޫން ކަމަށް ފުލުހުން މިއަދު ބުނެފި އެވެ.

އެ ހަ އޮފިސަރުން މަގާމުން ވަކިކުރަން ޕޮލިސް ބޯޑުން ލަފާ ދީފައިވީ ނަމަވެސް، އަދިވެސް ކޮމިޝަނާ އޮފް ޕޮލިސް މުހައްމަދު ހަމީދު އެ ނިންމުން ތަންފީޒު ކުރައްވާފައެއް ނުވެ އެވެ.

ފުލުހުން "މިހާރު" އަށް ކުރި މެސެޖެއްގައި ބުނީ، ފިޔަވަޅު އަޅަން ލާފާ ދީފާއިވާ ފުލުހުން ކަމަށް ބުނެ "މިހާރު" ނޫހުގައި މިއަދު ހަވީރު ޖެހި ޚަބަރުގައި ހިމަނާފައިވާ އޮފިސަރުންގެ ލިސްޓުގައި ހިމެނޭ ބައެއް ފުލުހުންނަކީ އެމީހުންނާ މެދު ފުލުހުންގެ ބޯޑުން، ގާނޫނުގެ ތިން ވަނަ މާއްދާގައި ބުނާ އިޖުރާއަތު ހިންގާފައިވާ އޮފިސަރުން ނޫން ކަމަށެވެ.

"މިހާރު" ނޫހުގައި އެ ލިސްޓު ޖެހިއިރު ވެސް ފުލުހުން އޭގެ ސައްހަކަން ރަސްމީކޮށް ކަށަވަރުކޮށްދީފައެއް ނުވެ އެވެ. އެ ލިސްޓު ސައްހަ ނޫން ކަމަށް ބުނި ނަމަވެސް، ފިޔަވަޅު އަޅަން ނިންމީ ކޮން އޮފިސަރުންނަށް ކަމެއް މިފަހަރު ވެސް ފުލުހުން ސާފުކޮށްދީފައެއް ނުވެ އެވެ.

ފުލުހުންގެ ގާނޫނުގައިވާ ގޮތުން، ފުލުހުންގެ ބޯޑު އައްޔަންކުރާތާ ހަތަރު މަސް ތެރޭގައި ކޮމިޝަންޑް އޮފިސަރުންގެ ތެރެއިން ކޮމިޝަނާ އޮފް ޕޮލިސް ފިޔަވައި، ސުޕްރިންޓެންޑެންޓް އޮފް ޕޮލިސް އިން ފެށިގެން މަތީ ރޭންކުގެ ކޮމިޝަންޑް އޮފިސަރުން ގާނޫނީ ބާރާއި އިހްތިޔާރު ނަހަމަ ގޮތުގައި ބޭނުންކޮށް، ލާއިންސާނީ އަނިޔާވެރި އަމަލެއް ނުވަތަ ކޮރަޕްޝަންގެ އަމަލެއް ހިންގާފައިވާ ކަމަށް ތުހުމަތުކުރެވޭ ނުވަތަ މައްސަލައެއް ދައުލަތުގެ އިދާރާއަކަށް ނުވަތަ ކޮމިޝަނަކަށް ރިޕޯޓު ކުރެވިފައިވާ އޮފިސަރުން ވަކި ކުރުމާ މެދު ފެންނަ ގޮތެއް ނިންމަން ވާނެ އެވެ.

ރައީސް އިބްރާހިމް މުހައްމަދު ސޯލިހު ފުލުހުންގެ ބޯޑު އެކުލަވައިލެއްވީ މި އަހަރުގެ އޭޕްރިލް ނުވަ ވަނަ ދުވަހު އެވެ. އެ ބޯޑު އުފެއްދިތާ ހަތަރު މަސް ހަމަވީ އިއްޔެ އެވެ. އަދި އިއްޔެ އިސް ހަ އޮފިސަރަކު ވަކިކުރަން ޕޮލިސް ބޯޑުން ވަނީ ލަފާ ދީފަ އެވެ.

ގާނޫނުގައިވާ ގޮތުން ބޯޑުގެ ނިންމުން ތަންފީޒުކުރާނީ ސީޕީ އެވެ. އަދި ސީޕީ ބޯޑުގެ ނިންމުން ތަންފީޒު ކުރަންދެން އެ މީހުންނަށް މަގާމުގައި ތިބެވޭނެ އެވެ. އެކަމަށް ވަކި މުއްދަތެއް ދީފައެއް ނެތެވެ.

ފުލުހުން ބުނީ، ސީޕީ މިހާރު ގެންދަވަނީ ޕޮލިސް ބޯޑުގެ ނިންމުން މުރާޖައާ ކުރައްވަމުން ކަމަށެވެ. އެނގިފައިވާ ގޮތުގައި ބޯޑުގެ ނިންމުން ސީޕީ އަދި ތަންފީޒެއް ނުކުރައްވަ އެވެ. މިކަަމާ ގުޅިގެން ސީޕީގެ ބަހެއް ލިބޭ ގޮތެއް ނުވި އެވެ.

ގާނޫނުގައިވާ ގޮތުން އެ ނިންމުން ތަންފީޒު ކުރުމަށް އެންގުމުގެ ބާރު ހޯމް މިނިސްޓަރަށް ލިބިގެންވެ އެވެ. ނަމަވެސް، މިނިސްޓަރު އިމްރާން އަބްދުﷲ ވެސް ފޯނު ނުނަންގަވާތީ އޭނާގެ ބަހެއް ލިބޭ ގޮތް އަދި ނުވެ އެވެ.

ބޯޑުން ގޮތެއް ނިންމުމުގައި އެ ފުލުހެއްގެ ތައުލީމީ ފެންވަރާއި އެ ފުލުހެއްގެ ދައުރާއި ކޮށްފައިވާ ހިދުމަތާއި ސުލޫކާއި މަސައްކަތުގެ އަހުލާގާއި ކުރެވިފައިވާ ތުހުމަތުގެ ތަބީއަތާއި އެ މައްސަލައަކާ ގުޅިގެން ލިބެންހުރި ހެއްކާއި ގަރީނާ އަށް ފުލުސް ބޯޑުން ބަލަން ޖެހޭނެ ކަމަށް ގާނޫނުގައި ވެ އެވެ.

ފުލުހުންގެ ގާނޫނު ބުނާ ގޮތުން ބޯޑު އެކުލެވިގެން ވަނީ ރައީސް އައްޔަންކުރައްވާ ދެ މެންބަރުންނާއި ފަންނީ ދާއިރާއަކުން ތައުލީމާއި ތަޖުރިބާ ލިބިވަޑައިގެންފައިވާ ތިން މެންބަރުންގެ އިތުރުން އާންމުންގެ ތެރެއިން ދެ މެންބަރެއްގެ މައްޗަށެވެ.

ބޯޑުގެ ރައީސް އަލީ ފާއިޒު އަދި ނާއިބު ރައީސް އަހުމަދު ފަޔާޒް ހަސަންގެ އިތުރުން ޕޮލިސް ބޯޑުގައި ދެން ތިއްބަވަނީ އާއިޝަތު ނޫރާ މުހައްމަދު، އަހުމަދު ނާޝިދު، އާދަމް އިބްރާހީމް، ހާމިދު އަބްދުލްޣަފޫރު އަދި ސަފާ ޝަރީފެވެ.