ނުކުޅެދުންތެރިކަން ހުންނަ މީހުންގެ ހައްގުތައް ރައްކާތެރިކުރުމާއި މާލީ އެހީތެރިކަން ފޯރުކޮށްދިނުމުގެ ގާނޫނާއި ގަވައިދުގެ އޯޑިއޯ ރިކޯޑިންއެއް އެޓާނީ ޖެނަރަލްގެ އޮފީހުގެ ވެބްސައިޓުގައި އިއްޔެ އާންމުކޮށްފި އެވެ. މިއީ ރާއްޖޭގެ ގާނޫނަކާއި ގަވާއިދެއްގެ އޯޑިއޯ ސަރުކާރު އިދާރާއެއްގެ ވެބްސައިޓުން އަޑުއަހާލެވޭނެ ގޮތް ހެދި ފުރަތަމަ ފަހަރެވެ.
އޭޖީ އޮފީހުން ނެރުނު ނޫސްބަޔާނެއްގައި ބުނީ މި އޯޑިއޯ އަކީ އެ އޮފީހާއި ޔުނައިޓެޑް ނޭޝަންސް ޑިވެލޮޕްމަންޓް ޕްރޮގްރާމް (ޔޫއެންޑީޕީ) ގުޅިގެން، ގާނޫނުތަކަށް އާންމުން އަހުލުވެރިކުރުވުމަށް ކުރަމުން އަންނަ މަސައްކަތްތަކުގެ ދަށުން ކޮށްފައިވާ މަސައްކަތެއް ކަމަށެވެ.
"މި މަސައްކަތަކީ، އެޓާނީ ޖެނެރަލްގެ އޮފީހުން ގާނޫނުތަކާއި ގަވާއިދުތައް ޝާއިއުކޮށްފައިވާ އޮންލައިން ޕްލެޓްފޯމަށް ފަސޭހައިން ވާސިލުވުމަށް ކުރަމުންގެންދާ މަސައްކަތުގެ ތެރެއިން، ހާއްސަ އެހީ އަށް ބޭނުންވާ ފަރާތްތަކަށް އަމާޒުކޮށްގެން ކުރެވިފައިވާ މަސައްކަތެކެވެ،" އެ ބަޔާނުގައިވެ އެވެ.
އޭޖީ އޮފީހުން ބުނީ މި އޯޑިއޯ ރިކޯޑިންގެ މަސައްކަތް ކޮށްފައި ވަނީ ޔޫއެންޑީޕީ އާއި އޮސްޓްރޭލިއާ ސަރުކާރުގެ އެހީ ލިބިގެން ކަމަށެވެ.
ހާއްސަ އެހީ އަށް ބޭނުންވާ މީހުން، ގާނޫނީ އެކި މަސްދަރުތަކަށް އަހުލުވެރިވުމަށާއި އެންމެ އެދެވިގެންވާ ގޮތުގައި ގާނޫނީ ދާއިރާއާ ގުޅޭ މައުލޫމާތު ލިބުމަށް ދަތިވެފައިވާކަން ފާހަގަކުރެވިފައިވާ މައްސަލަ އަށް ވެސް މި މަސައްކަތުގެ ސަބަބުން ހައްލު ލިބި، ގާނޫނީ އަހުލުވެރިކަން އިތުރުވުމަށް މަގުފަހިވެގެންދާނެ ކަމަށް އެ އޮފީހުން ބުނެފައިވެ އެވެ.
އޭޖީ އޮފީހުގެ ވެބްސައިޓުގެ އިތުރުން ހުރިހާ ގާނޫނުތައް ފެންނަން ހުންނަ "އެމްވީ ލޯ" ވެބްސައިޓުގައި ވެސް މި އޯޑިއޯ ހިމަނާފައިވެ އެވެ.
އެ އޮފީހުން ބުނީ ކުރިއަށް އޮތް ތަނުގައި އިތުރު ގާނޫނުތަކާއި ގަވާއިދުތަކުގެ އޯޑިއޯ ރެކޯޑިންތައް ވެސް އެ އޮފީހުގެ ވެބްސައިޓްގައި އާންމުކުރާނެ ކަމަށެވެ.
ނޭޝަނަލް ބިއުރޯ އޮފް ސްޓެޓިސްޓިކްސްގެ އެންމެފަހުގެ ތަފާސްހިސާބުތައް ދައްކާ ގޮތުން، އެކި ބާވަތުގެ ނުކުޅެދުންތެރިކަން ހުންނަ 36،000 އަށް ވުރެ ގިނަ މީހުން ރާއްޖޭގައި އުޅެ އެވެ. އޭގެ ތެރެއިން ދެވަނަ އަށް އެންމެ ގިނައީ ފެނުމުން މަހުރޫމުވެފައިވާ މީހުންނެވެ. އެއީ ނުކުޅެދުންތެރިކަން ހުންނަ މީހުންގެ އާބާދީގެ 24 ޕަސެންޓެވެ.