ސުޕްރީމް ކޯޓަށް ހާޒިރު ނުވެގެން ކޯޓުގެ ހުރުމަތް ކެނޑިކަމުގެ ހުކުމް އިއްވާފައިވާ ކުރީގެ ޓޫރިޒަމް މިނިސްޓަރު އަލީ ވަހީދު އިނގިރޭސިވިލާތުގައި އިއްޔެ ހައްޔަރުކޮށްފައި ވަނީ އޯވަސްޓޭވެގެން ކަން "މިހާރު" އަށް ކަށަވަރު ވެއްޖެ އެވެ.
"މިހާރު" އާ ވާހަކަ ދެއްކެވި ބޭފުޅަކު ވިދާޅުވީ އަލީ ވަހީދު އިއްޔެ ހައްޔަރުކޮށް މިހާރު ބަހައްޓާފައި ހުރީ ޑިޓެންޝަން ސެންޓަރެއްގައި ކަމަށާއި މިއަދުގެ ވަގުތެއްގައި ދޫކޮށްލާނެ ކަމަށް ލަފާކުރެވޭ ކަމަށެވެ.
ޖިންސީ ފުރައްސާރައިގެ މައްސަލަތަކެއް ފެންމަތިވެ، މިނިސްޓަރުކަމުން ވަކިކުރި އަލީ ވަހީދު މިހާރު ވަނީ އިނގިރޭސިވިލާތުގެ ހިމާޔަތަށް ވެސް އެދިވަޑައިގެންފަ އެވެ.
އަލީ ވަހީދުގެ ޖިންސީ ފުރައްސާރައިގެ މައްސަލަ ކްރިމިނަލް ކޯޓުގައި މިއަދު ޝެޑިއުލްކޮށްފައިވާ އިރު، އެ މައްސަލަ ވެސް ވަނީ ކެންސަލް ކޮށްފަ އެވެ. އަލީ ވަހީދު ހުރީ އިނގިރޭސިވިލާތުގައި ހައްޔަރުކޮށްފައި ކަމަށް އޭނާގެ ވަކީލުން ކޯޓަށް ވަނީ އަންގައިފަ އެވެ.