ލީކުވި އޯޑިއޯގެ މައްސަލަ އިދިކޮޅު ކޯލިޝަނުން ރައީސަށް

މަނީ ލޯންޑަރިންގެ ކުށުގައި ކުރީގެ ރައީސް އަބްދުﷲ ޔާމީން ފަސް އަހަރަށް ޖަލަށް ލުމަށް ކްރިމިނަލް ކޯޓުން ހުކުމްކުރި ބެންޗުގައި ތިއްބެވި ބައެއް ފަނޑިޔާރުންގެ އޯޑިއޯތަކެއް ލީކުވި މައްސަލަ، އިދިކޮޅު ކޯލިޝަނުން ރައީސް އިބްރާހިމް މުހައްމަދު ސޯލިހަށް މިއަު ހުށަހަޅައިފި އެވެ.

ނޮވެމްބަރު 28، 2019 ގައި ޔާމީން ޖަލަށް ލާން ހުކުމް ކުރީ ކްރިމިނަލް ކޯޓުގެ ފަސް ފަނޑިޔާރުންގެ ބެންޗެއްގެ އިއްތިފާގުންނެވެ. އެ ބެންޗުގައި ހިމެނިވަޑައިގަތީ ރިޔާސަތު ބެލެހެއްޓެވި، ސުޕްރީމް ކޯޓުގެ މިހާރުގެ ފަނޑިޔާރު އަލީ ރަޝީދާއި ގާޒީ ހުސައިން ފާއިޒު ރަޝާދާއި ކްރިމިނަލް ކޯޓުގެ މިހާރުގެ އިސް ގާޒީ އަހުމަދު ޝަކީލާއި ގާޒީ އަލީ އާދަމާއި ޑްރަގް ކޯޓުގައި މިހާރު ހުންނެވި ގާޒީ މުހައްމަދު ސަމީރެވެ. އޭގެ ތެރެއިން ލީކުވެފައިވަނީ ފަނޑިޔާރު ފާއިޒާއި ފަނޑިޔާރު އަލީ އާދަމްގެ އިތުރުން ފަނޑިޔާރު މުހައްމަދު ސަމީރު، ޔާމީންގެ ޝަރީއަތާ ބެހޭގޮތުން ވާހަކަ ދައްކަވާ އޯޑިއޯތަކެކެވެ.

އެ އޯޑިއޯތަކުގައި ފަނޑިޔާރުން ވަނީ ޔާމީންގެ މައްސަލައިގެ ތެރެއަށް ނުފޫޒު ފޯރުވާފައިވާ ކަމަށް ދޭހަވާ މޭރުމަކުން ވާހަކަ ދައްކައިފަ އެވެ.

އެކަމާ ގުޅިގެން، ރައްޔިތުންގެ މަޖިލީހުގެ ޖަލްސާގައި އިހުތިޖާޖު ކުރައްވައި އަޑުގަދަ ކުރެއްވުމަށް ފަހު، ޕީޕީއެމް/ޕީއެންސީގެ ބައެއް މެމްބަރުން ވަނީ ރައީސްއާ ބައްދަލުކުރެއްވުމަށް ރައީސް އޮފީހަށް ވަޑައިގެންފަ އެވެ.

ރައީސް އޮފީހުން ނުކުމެވަޑައިގެން ނައިފަރު ދާއިރާގެ މެމްބަރު އަހުމަދު ޝިޔާމް "މިހާރު" އަށް ވިދާޅުވީ، ރައީސް އިބްރާހިމް މުހައްމަދު ސޯލިހުގެ ފަރާތްޕުޅުން ޗީފް އޮފް ސްޓާފް އަލީ ޒާހިރުއާ ބައްދަލުކުރައްވައި، ލީކުވި އޯޑިއޯއާ ގުޅޭ ކަންބޮޑުވުންތައް ހިއްސާ ކުރައްވާފައިވާ ކަމަށެވެ. އެ އޯޑިއޯތަކުން، އެ ފަނޑިޔާރުން ތިއްބެވީ މަޖުބޫރީ ހާލަތުގައިކަން އެނގޭ ކަމަށް އޭނާ ވިދާޅުވި އެވެ.

އޭރު އެ މައްސަލަ ބެއްލެވި ކްރިމިނަލް ކޯޓުގެ އިސްގާޒީ އަހުމަދު ހައިލަމަށް ނުފޫޒު ފޯރުވި ކަމަށް އޭނާ ނެރުއްވި ބަޔާނުގައި ވިދާޅުވާ ކަމަށާއި ނަމަވެސް އެ މައްސަލަ ތަހުގީގުކޮށްފައިނުވާ ކަމަށް ވިދާޅުވި އެވެ. އެކަމަކު، މިހާރު އޯޑިއޯތަކުގެ މައްސަލައަކީ ގައުމީ ކަމަކަށްވާތީ ރައީސް އިސްތިއުފާ ދެއްވަން ޖެހިވަޑައިގަންނަވާ ކަމެއް ކަމަށާއި އަމިއްލަފުޅަށް އެކަން ކުރައްވަން ކެރިވަޑައިނުގަންނަވާނަމަ މަޖިލިސް ތެރެއިން ވެސް އެ މަސައްކަތް ކުރައްވާނެ ކަމަށް ވިދާޅުވެފައިވާނެ ކަމަށް ޝިޔާމް ވިދާޅުވި އެވެ.

"ކޯޓުތައް އިސްލާހުކުރަން އައި ބަޔަކު ކޯޓުތަކަށް މި ވަރަށް ނުފޫޒު ފޯރުވީމަ މިއީ ދެން ވަރަށް ހަޑި ހުތުރު ކަމެކޭ. ޗީފް އޮފް ސްޓާފް ވިދާޅުވީ ތިމަންނަމެން ރައީސް ޔާމީންގެ ޝަރީއަތަށް މިހާރު ނުފޫޒެއް ނުފޯރުވަމޭ. ކުރީގައި ދެން އެކަހަލަ ކަންތައްތަކެއް ހިނގާފައި ހުރެދާނެއޭ، އެކަމަކު މިހާރު ތިމަންނަމެން ނުފޫޒެއް ނުފޯރުވަމޭ،" ޝިޔާމް ވިދާޅުވި އެވެ.

"އޭގެ މާނައަކީ ކޮންމެ ވެސް ވަރެއްގެ ނުފޫޒެއް ފޯރުވި ވާހަކަތާ އެ ވިދާޅުވީ. އަޅުގަނޑުމެން ނުދަންނަވަން ސުޕްރީމް ކޯޓު މައްސަލައިގައި ނުފޫޒު ފޯރާ ވާހަކައެއް،" ޝިޔާމް ވިދާޅުވި އެވެ.

އެކަމާ ގުޅިގެން ޖުޑީޝަލް ސާވިސް ކޮމިޝަން (ޖޭއެސްސީ) އިން ރޭ ނެރުނު ބަޔާނެއްގައި ބުނީ، އަމިއްލަ ފަރުދަކު ވިޔަސް، ދައުލަތުގެ ކަމެއް ހިންގުމާ ހަވާލުވެ ހުރި މީހަކު ވިޔަސް ފަނޑިޔާރުންގެ މަސައްކަތާ ބެހި ނުފޫޒު ފޯރުވާ ކަމަށް ކުރެވޭ ތުހުމަތަކީ ވަކިން ހާއްސަ ސަމާލުކަމެއް ދީގެން އެ ކޮމިޝަނުން ބަލާނެ މައްސަލައެއް ކަމަށެވެ. އެއީ ފަނޑިޔާރުގޭގެ އިތުބާރު ނެގެހެއްޓުމާއި ފަނޑިޔާރުގޭގެ މިނިވަންކަމާއި އިންސާފުވެރިކަން ކަށަވަރުކޮށް ދެމެހެއްޓުމަށްޓަކަައި ކަމަށް ޖޭއެސްސީން ބުންޏެވެ.