ވެކްސިން ޖަހަން ސަރުކާރުން ކަނޑައެޅި އަމާޒު ހާސިލެއް ނުވި

ކޮވިޑް-19 އިން ދިފާއުވުމަށް ރާއްޖޭގެ އާބާދީގެ 90 ޕަސެންޓަށް މި މަހުގެ ނިޔަލަށް ވެކްސިން ފުރިހަމަ ކުރުމަށް ސަރުކާރުން ކަނޑައެޅި އަމާޒް ހާސިލެއް ނުވި އެވެ.

ވެކްސިންގެ ދެ ޑޯޒް މިހާތަނަށް ޖަހާފައި ވަނީ ވެކްސިން ޖަހަން ޖެހޭ އާބާދީގެ 66 ޕަސެންޓް މީހުންނެވެ.

ހެލްތު ޕްރޮޓެެކްޝަން އެޖެންސީ (އެޗްޕީއޭ) އިން ބުނީ އެ ވެކްސިން ޖަހަން ޝަރުތު ހަމަވާ އާބާދީގައި 452،798 މީހުން ތިބިއިރު، އޭގެ ތެރެއިން 301،857 މީހަކު ދެ ޑޯޒު ފުރިހަމަ ކޮށްފައިވާ ކަމަށެވެ.

ރާއްޖޭގައި އެންމެ ފުރަތަމަ ކޮވިޑް ވެކްސިން ޖަހަން ފެށީ އުމުރުން 18 އަހަރުން މައްޗަށެވެ. އެ އަށް ފަހު، މީގެ ދެ ހަފުތާ ކުރިން ވަނީ 12 އަހަރުން މަތީގެ ކުދިންނަށް ކޮވިޑް ވެކްސިން ދޭން ފަށައިފަ އެވެ. އެހެންވެ، ވެކްސިން ޖެހުމަށް ޝަރުތު ހަމަވާ އުމުރު މިހާރު ބަލަނީ 12 އަހަރުން މައްޗަށެވެ.

ކޮވިޑް ވެކްސިން ޖެހުމަށް ޝަރުތު ހަމަވާ އާބާދީގެ 383،089 މީހަކު މިހާތަނަށް ފުރިހަމަކޮށްފައި ވަނީ ފުރަތަމަ ޑޯޒެވެ. އެއީ 84 ޕަސެންޓް މީހުންނެވެ.

ސަރުކާރުން މަސައްކަތް ކުރަމުން ދިޔައީ މި މަސް ނިމުމުގެ ކުރިން އާބާދީގެ 90 ޕަސެންޓަށް ވެކްސިންގެ ޑޯޒުތައް ދީ ނިންމާށެވެ. ސަރުކާރުން ކުރިން ހަމަޖައްސާފައި ވަނީ ވެކްސިންގެ ފުރަތަމަ ޑޯޒް ޖެހުން މި މަހުގެ ނިޔަލަށް ކުރިއަށް ގެންދާ ގޮތަށެވެ. ނަމަވެސް މިހާރު މަސައްކަތް ކުރަމުން އަންނަނީ އެ މުއްދަތު އިތުރު ކުރުމަށެވެ.

ރާއްޖޭގައި ކޮވިޑުގެ ހާލަތު ރަނގަޅުވުމުގެ ސަބަބުން މިހާރު ވަނީ ބޮޑެތި ލުއިތަކެއް ދީފަ އެވެ. އޭގެ ތެރޭގައި ޕާޓީތަކާއި ހަފުލާތަކުގައި ގިނަ މީހުންނަށް ބައިވެރިވޭ ގޮތް ހެދުމާއި ފިހާރަތާކައި ކެފޭ/ރެސްޓޯރެންޓްތައް އާންމު އުސޫލުން ހިދުމަތް ދިނުމާއި އޮފީސްތައް ހުޅުވައިގެން މަސައްކަތް ކުރުން އަދި ސްކޫލްތަކާއި ކޮލެޖް/ޔުނިވާސިޓީތަކަށް ދަރިވަރުން ހާޒިރުކޮށްގެން ކިޔަވައިދިނުމުގެ ހުއްދަ ހިމެނެ އެވެ.

ވެކްސިންގެ އެއްވެސް ޑޯޒެއް ނުޖަހާ މީހުން ސަރުކާރުގެ އެކި އިދާރާތަކުން ޚިދުމަތް ހޯދުމުގައި ހުރަސްތަކެއް ކުރިމަތިވާނެ ކަމަށް ކުރިން ވަނީ އިއުލާންކޮށްފަ އެވެ. އޭގެ ތެރޭގައި އެތެރޭގެ ވައިދަތުރުފަތުރު ކުރުމާއި ކެފޭ ރެސްޓޯރެންޓްތަކުން ޚިދުމަތް ނުދިނުން ހިމެނެ އެވެ. މާދަމާ އިން ފެށިގެން ސްކޫލްތަކަށް ވެސް ވަދެވޭނީ ވެކްސިން ޖަހާފައިވާ މީހުންނަށެވެ.