ހުޅުމާލޭގައި ދެވަނަ ފިޔަވަހީގެ ހިޔާ ޓަވަރުތަކުގެ ތިރީގައި ހުރި ކުނިތަކެއްގައި އަނެއްކާވެސް ރޯވެއްޖެ އެވެ.
ހުކުރު ވަގުތު އަލިފާން ރޯވީ ޓަވަރު 13 ގެ ތިރީގައި ހުރި ކުނިތަކެއްގަ އެވެ. އަލިފާން ރޯވެގެން އުޅޭ ކަމަށް ރިޕޯޓްކޮސްގެން އެތަނަށް އެމްއެންޑީއެފުގެ ފަޔަ އެންޑް ރެސްކިއު ޓީމުން ދިޔައިރު ފްލެޓްތަކުގައި އުޅޭ މީހުން ނުކުމެ ދިޔައީ އަލިފާން ނިއްވުމުގެ މަސައްކަތް ކުރަމުންނެވެ.
މިހާރު ވަނީ އަލިފާން ކޮންޓްރޯލް ކޮށްފަ އެވެ.
މިކަމާ ގުޅިގެން އަދި އެމްއެންޑީއެފްގެ ބަހެއް ނުލިބެ އެވެ. އަދި އަލިފާންގަނޑު ރޯވާން ދިމާވި ސަބަބެއް ވެސް ނޭނގެ އެވެ.
ފްލެޓްތަކުގައި މީހުން އުޅެން ފެށިތާ އަދި ތިން މަހެއްހާ ދުވަސް ވެފައި ވާއިރު މިހާތަނަށް ފަސް ވަރަކަށް ފަހަރު މިގޮތަށް ކުނިތަކުގައި ރޯވެފައިވެ އެވެ. މިފަހަރު ރޯވި ކުނިތަކުގެ ތެރޭގައި ހުރީ ކަރުދާސް ފޮއްޓާއި ގޯންޏާއި ކޮތަޅު ކަހަލަ ކުންޏެވެ.
ކުނިތަކުގައި އަލިފާން ރޯވުމުގެ މައްސަލަ ބޮޑުވެފައިވާއިރު އެތަނުގައި އުޅޭ މީހުން ބެލްކަނީގައި ސިނގިރޭޓް ބުއިމަށް ފަހު އެއްލާލައި ސިނގިރޭޓް ފިލްޓަރުތައް ކުނިތަކުގެ ތެރެއަށާއި އެހެން ފްލެޓްތަކުގެ ބެލްކަންޏަށް ވެއްޓި އަލިފާނުގެ ހާދިސާތައް ހިނގާފައިވެ އެވެ.