އުމުރުން 29 އަހަރުގައި އާއްކޮ ފުޓްބޯޅަ ކުޅުން ހުއްޓާލައިފި

ފުރަތަމަ ޑިވިޝަންގައި 11 އަހަރު ފުޓްބޯޅަ ކުޅުމަށް ފަހު، ފޯވާޑް އަހްމަދު އިމާޒު (އައްކޮ) އުމުރުން 29 އަހަރުގައި ކުޅުން ހުއްޓާލައިފި އެވެ.

މިދިޔަ ސީޒަންގައި އާއްކޮ ކުޅުނީ، ކްލަބް ވެލެންސިއާ އަށެވެ. އެހެން ނަމަވެސް އޭނާގެ ކުރީގެ ކުޅުން ދެއްކޭ ގޮތެއް ނުވި އެވެ. އާއްކޮ "މިހާރު" އަށް ބުނީ މިވަގުތު ދިރިއުޅުމުގެކަންކަން ހުރި ގޮތުން ދާއިމީކޮށް ފުޓްބޯޅަ ކުޅެވެން ނެތް ކަމަށެވެ.

"ހަމަގައިމު ވެސް ދެން ފުރަތަމަ ޑިވިޝަނަކުން ނުފެންނާނެ. އެކަމަކު ފުރުސަތު ލިބިއްޖެއްޔާ ދެވަނަ ޑިވިޝަން ނޫނީ ތިންވަނަ ޑިވިޝަންގައި ކުޅޭނަން،" އާއްކޮ ބުންޏެވެ.

އެމްޕީއެލްގައި ވަޒީފާ އަދާކުރަމުން އަންނަ އާއްކޮ ބުނީ، އޭނާގެ ވަޒީފާ އާއި ދިރިއުޅުމަށް މިވަގުތު ގިނަ ވަގުތުތަކެއް ހޭދަ ކުރަން ޖެހިފައިވާ ކަމަށެވެ.

"މިއީ ވަރަށް އުނދަގޫ ނިންމުމެއް. އެކަމަކު މިވަގުތު ހާލަތު ހުރި ގޮތުން ދާއިމީކޮށް ފުޓްބޯޅަ ކުޅެވެން ނެތީ،" ދާދި ފަހުން ދަރިޔަކު ލިބުނު އާއްކޮ ބުންޏެވެ.

އާއްކޮ ފުޓްބޯޅައިގެ ތެރެއަށް ނުކުތީ ޔޫތު މުބާރާތުގައި ކްލަބް އީގަލްސްގެ ތެރެއިންނެވެ. އީގަލްސްގެ ޓީމުން ފުރުސަތު ދިން ޒުވާން ކުޅުންތެރިންގެ ތެރެއިން އެންމެ ފާހަގަ ކުރެވޭ ކުޅުންތެރިޔަކީ އާއްކޮ އެވެ. އީގަލްސްގައި އޭނާ ދެއްކި ކުޅުމާއެކު މާޒިޔާއިން އޭނާ ގެންދިޔަ އެވެ. މާޒިޔާގައި 2015 އަދި 2016 ގައި އޭނާ ވަނީ މޮޅު ކުޅުމެއް ދައްކައިފަ އެވެ. ގްރާންޑޭ އަށްވެސް އޭނާ ވަނީ ކުޅެފަ އެވެ.

ވިންގް ފޯވާޑަކަށް މޮޅަށް ކުޅޭ އާއްކޮގެ މޮޅު ކުޅުން ގައުމީ ޓީމުގައި އެންމެ ރަނގަޅަށް ނެރެދިނީ ކުރީގެ ކޯޗް ރިކީ ހާބަޓް އެވެ. އިންޑިއާގައި 2015 ގައި ބޭއްވި ސާފް ޗެމްޕިއަންޝިޕްގައި ލެފްޓް ވިންގްގައި ހާބަޓް އެންމެ ފުރަތަމަ ފުރުސަތު ދެނީ އާއްކޮ އަށެވެ.

ބަންގްލަދޭޝްގައި ބޭއްވި ސާފް ޗެމްޕިއަންޝިޕްގައި އާއްކޮ ވަނީ ގައުމީ ޓީމުގައި ހިމެނިގެން ކުޅެފަ އެވެ. އޭގެ ފަހުން އޭނާ އަށް ގައުމީ ޓީމުން ފުރުސަތު ނުލިބެ އެވެ. ލަންކާގައި 2012 ގައި ބޭއްވި މަހިންދަ ރާޖަޕަކްސަ ފުޓްބޯޅަ މުބާރާތް ކާމިޔާބު ކުރި ރާއްޖޭގެ 23 އަހަރުން ދަށުގެ ގައުމީ ޓީމުގައި ވެސް އާއްކޮ ހިމެނުނެވެ.

އޭރު ކްލަބް އީގަލްސް އަށް ކުޅެމުން އައި ފޯވާޑް ސީނިއާ ގައުމީ ޓީމަށް ވެސް އެ އަހަރު ކުޅުނެވެ. ރާޖަޕަކްސަ މުބާރާތުގެ ލީގު ބުރުގައި 1-0 އިން ޕާކިސްތާނު ބަލިކުރި މެޗުގައި ރާއްޖެ އަށް ލަނޑު ޖެހައިދިނީ ވެސް އޭނާ އެވެ.