ވިޔަފާރި / މަޓާޓޯ

ޓޫރިޒަމް އިޝްތިހާރު ކުރަން ބަޖެޓެއް ނެތް، އެކަށީގެންވާ މަސައްކަތެއް ނުކުރޭ: މަޓާޓޯ

ރާއްޖެ އައި ޗައިނާގެ ދެ ޓޫރިސްޓަކު އެއާޕޯޓުގައި މަޑުކޮށްލައިގެން: ޗައިނާ މާކެޓް ވަނީ ވަރަށް ބޮޑަށް ދަށަށް ގޮސްފައި.-- ފައިލް ފޮޓޯ: ނިޝާން އަލީ/ މިހާރު

19 ޑިސެމްބަރ 2016 - 10:31

6 comments

ޓޫރިސްޓް މަންޒިލެއްގެ ގޮތުގައި ރާއްޖެ ބޭރު ދުނިޔޭގައި އިޝްތިހާރު ކުރުމަށް އެކަށީގެންވާ މަސައްކަތްތަކެއް އަންނަ އަހަރު ކުރަން ތައްޔާރުވެފައި ނުވާ ކަމަށް ބުނެ، މޯލްޑިވްސް އެސޯސިއޭޝަން އޮފް ޓްރެވަލް އެޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން މިއަދު ވަރަށް ބޮޑަށް ފާޑުކިޔައިފި އެވެ.

ރާއްޖެ އަށް ޓޫރިސްޓުން ގެންނަ ފަރާތްތައް ނިސްބަތްވާ ޖަމިއްޔާ އިން ނެރުނު ބަޔާނެއްގައި ބުނި ގޮތުގައި ގިނަ އަދަދެއްގެ އާ ރިސޯޓުތައް ހުޅުވައި ގެސްޓްހައުސް ވިޔަފާރި ފުޅާވަމުން އަންނަ އިރު، މިހާރަށް ވުރެ ބޮޑަށް ރާއްޖެ އިޝްތިހާރު ކުރަން ޖެހެ އެވެ. އެކަން ސަރުކާރާއި ރައްޔިތުންގެ މަޖިލީހުގެ އިތުރުން، މޯލްޑިވްސް މާކެޓިން އެންޑް ޕީއާރު ކޯޕަރޭޝަން (އެމްއެމްޕީއާރުސީ)ގެ ސަމާލުކަމަށް ވެސް ގެނެސްފައިވާނެކަން އެ ޖަމިއްޔާ އިން ފާހަގަކުރި އެވެ.

އެކަމަކު، ޓޫރިޒަމް އިޝްތިހާރު ކުރުމަށް އަންނަ އަހަރަށް ދީފައި ވަނީ ޓޫރިޒަމް މިނިސްޓްރީން އެދުނު ބަޖެޓުން 25 ޕަސެންޓަށް ވުރެ ބޮޑު އަދަދެއް އުނިކުރުމަށް ފަހު ކަމަށް މަޓާޓޯ އިން ބުންޏެވެ. އެއީ، އެ ޖަމިއްޔާ އިން ބުނި ގޮތުގައި، މި އަހަރާއި މިދިޔަ އަހަރު ވެސް ރާއްޖެ އިޝްތިހާރު ކުރަން ހޭދަކުރި މިންވަރަށް ވުރެ ކުޑަ އަދަދެކެވެ.

"މިއީ އިގްތިސާދުގެ ތިން ބައިކުޅަ ދެ ބައި ޓޫރިޒަމަށް ބަރޯސާވެފައިވާ ގައުމެއްގައި ކަންބޮޑުވާންޖެހޭ ކަމެކެވެ. ސްރީ ލަންކާ، މޮރިޝަސް އަދި ސީޝެލްސް ފަދަ ވާދަވެރި މަންޒިލްތަކުން ގެންގުޅޭ މާކެޓިން ބަޖެޓް ރާއްޖެ އަށް ވުރެ 10 ނުވަތަ 20 ގުނަ ބޮޑެވެ،" ބަޔާނުގައިވެ އެވެ.

"ކުރިއަރަމުން އަންނަ ޓޫރިސްޓް މަންޒިލްތަކާ އެކު ވާދަވެރިކަން ބޮޑުވެ އަދި ރާއްޖެ އިޝްތިހާރު ކުރުމަށް ގޮންޖެހުންތަކެއް ކުރިމަތިވެފައިވާ ދަނޑިވަޅެއްގައި، ރާއްޖެ އިޝްތިހާރު ކުރުމަށް ޓޫރިޒަމް މިނިސްޓްރީ އަށް އެކަށީގެންވާ ބަޖެޓެއް ދިނުމަކީ ކޮންމެހެން މުހިއްމު ކަމެކެވެ."

މިދިޔަ މަހު މާޓާޓޯ އިން ބޭއްވި ޓެރެވަލް ކޮންފަރެންސްގައި އެ ޖަމިއްޔާގެ އިސް ވެރިން ބައިވެރިވެވަޑައިގަންނަވަނީ.-- ފައިލް ފޮޓޯ: ހުސެން ޝަޔާހު/ މިހާރު

މީގެ އިތުރުން، ކުރިއަށް އޮތް ތިން މަހު ބާއްވާ ޓޫރިޒަމް ފެއާތަކުގައި ބައިވެރިވުމުގެ ފުރުސަތު އެމްއެމްޕީއާރުސީން އަދިވެސް ހުޅުވާލާފައި ނުވާ ކަމަށް މަޓާޓޯ އިން ބުންޏެވެ. ހާއްސަކޮށް ޔޫރަޕުގެ ގައުމުތަކުގައި ބާއްވާ ފެއާތަކުގައި ބައިވެރިވާން ފްލައިޓާއި ހޮޓާ ބުކް ކުރުން ފަދަ ގިނަ އިންތިޒާމުތަކެއް ދުރާލާ ހަމަޖައްސަން ޖެހޭ އިރު، ރާއްޖޭގެ ބްރޭންޑް އެ ފެއާތަކުން ނުފެނުން އެކަށީގެންވާ ކަމަށް އެ ޖަމިއްޔާ އިން ބުންޏެވެ.

މި ހުރިހާ މައްސަލަތަކެއް ރާއްޖެ އަށް ދިމާވެފައި ވަނީ، މަޓާޓޯ އިން ބުނި ގޮތުގައި، ދެކުނު ކޮރެއާ އާއި ޖަޕާނާއި ވިއެޓްނާމް އަދި ލަންކާ ފަދަ ގައުމުތަކުން ބޮޑެތި ކުރިއެރުންތަކެއް ހޯދަމުން އަންނަނިކޮށެވެ. ޗައިނާ އިން ބޭރަށް ދަތުރުކުރާ ޓޫރިސްޓުންގެ އަދަދު އަހަރަކު 18 ޕަސެންޓް އަދި އޭޝިއާގެ އެހެން ގައުމުތަކުން ޗުއްޓީ ހޭދަކުރަން ގައުމުން ބޭރަށް ދަތުރުކުރާ މީހުންގެ އަދަދު ވެސް އަހަރަކު 11 ޕަސެންޓް އިތުރު ވާނެ ކަމަށް އަންދާޒާ ކުރެވޭކަން އެ ޖަމިއްޔާ އިން ފާހަގަކުރި އެވެ.

އެކަމަކު، މިދިޔަ އޮކްޓޯބަރު މަހުގެ ނިޔަލަށް ރާއްޖޭގެ ޓޫރިޒަމް ކުރިއަރާފައި ވަނީ، މަޓާޓޯ އިން ބުނި ގޮތުގައި، މިދިޔަ އަހަރުގެ އެ މުއްދަތާ އަޅާބަލާއިރު އެންމެ 3.5 ޕަސެންޓުގަ އެވެ. އަދި އެއް ގައުމަކުން ރާއްޖެ އަށް އެންމެ ގިނައިން ޓޫރިސްޓުން އަންނަ ޗައިނާ މާކެޓް 10.6 ޕަސެންޓް ދަށަށް ގޮސްފައިވާ އިރު، ރިސޯޓުތަކުގެ އޮކިއުޕެންސީ އާއި ދުވާލަކަށް ކޮޓަރި ދޫކުރެވޭ އަގާއި އާމްދަނީގެ ގޮތުގައި ލިބޭ މިންވަރު ވެސް ދަށްވަމުން އަންނަ ކަމަށް އެ ޖަމިއްޔާ އިން ބުންޏެވެ.

"ދުނިޔޭގެ މާކެޓުގައި ރާއްޖޭގެ ބްރޭންޑް ފުޅާ ދާއިރާއެއްގައި އިޝްތިހާރު ކުރުމަކީ ކޮންމެހެން ކުރަންޖެހޭ ކަމެކެވެ. މި ކަމަށް އިހުމާލުވެ، އަޅާ ނުލާ ދޫކޮށްލައިފި ނަމަ، ރާއްޖެ އަންނަ ޓޫރިސްޓުންގެ އަދަދު މަދުވެ، ޓޫރިޒަމްގެ ސިނާއަތުގައި ހަރަކާތްތެރިވާ ވިޔަފާރިވެރިންނަށް ލިބޭ ނަފާ ދަށް ވާނެ އެވެ،" ބަޔާނުގައިވެ އެވެ.

ރާއްޖޭގެ ޓޫރިޒަމާ ގުޅޭ ގޮތުން މަޓާޓޯ އިން ކަންބޮޑުވުން ފާޅުކުރި އިރު، މި ދުވަސްވަރު ވަނީ ޓޫރިޒަމް ވަރަށް ދަށަށް ގޮސްފަ އެވެ. އެ ގޮތުން، ކުރިން ގާތްގަނޑަކަށް އަހަރަކު ހަ ޕަސެންޓުގައި ކުރިއަރަމުން ދިޔަ މި ސިނާއަތް މި އަހަރުގެ ފުރަތަމަ ހަ މަސްދުވަހު ކުރިއަރާފައި ވަނީ، އޭޝިއަން ޑިވެލޮޕްމަންޓް ބޭންކް (އޭޑީބީ)ގެ ތަފާސްހިސާބުތައް ދައްކާ ގޮތުން، 1.8 ޕަސެންޓުގަ އެވެ.

މީގެ އިތުރުން، މި އަހަރު 1.5 މިލިއަން ޓޫރިސްޓުން އަންނާނެ ކަމަށް ކުރިން ލަފާކުރިޔަސް، ރާއްޖެ އަށް އެންމެ ގިނައިން ޓޫރިސްޓުން އަންނަ ޗައިނާ މާކެޓް ވަރަށް ބޮޑަށް ދަށްވުމުން މިދިޔަ އަހަރެކޭ އެއްވަރަށް 1.4 މިލިއަން ޓޫރިސްޓުން ގެންނަން މިހާރު ވަނީ އަމާޒު ހިފައިފަ އެވެ.

އަންނަ އަހަރު ރާއްޖޭގެ ޓޫރިޒަމް ރަނގަޅުކޮށް، ޓޫރިސްޓުންގެ އަދަދު އިތުރުކުރުމަށް ގިނަ މަސައްކަތްތަކެއް ކުރާނެ ކަމަށް ޓޫރިޒަމް މިނިސްޓްރީ އާއި އެމްއެމްޕީއާރުސީން ވަނީ ބުނެފަ އެވެ. އޭގެ ތެރޭގައި، ގިނަ ފެއާތަކެއްގައި ބައިވެރިވުމާއި ރާއްޖޭގައި ބައިނަލްއަގުވާމީ ޓޫރިޒަމް ފެއާއެއް ބޭއްވުމުގެ އިތުރުން ޓޫރިޒަމް އިޝްތިހާރު ކުރުމަށް ގެންގުޅޭ އުސޫލް ބަދަލުކުރުން ހިމެނެ އެވެ.

6 ކޮމެންޓް, 12 ރިއެކްޝަންސް

icon happy icon happy 8%
icon sad icon sad 42%
icon angry icon angry 50%
icon wow icon wow 0%
icon inlove icon inlove 0%
The name is already taken The name is available. Register?

ކޮމެންޓްތައް

އެންމެ ފަސް މަގުބޫލް

ކުޑަދޫއަހްމަދު

19 December 2016

ފުރަތަމަ ކަމަކީ، ދިވެހިރާއްޖޭގެ ފަތުރުވެރިކަން އިސްތިހާރުކުރަން ހެދިފައި އޮތް އެމް.އެމް.ޕީ.އާރު.ސީގެ ހިންގުމުގެ އޮނިގަނޑު ވަރަށް ދޯދިޔާ، ޒަމާނުއްސުރެއް ފަތުރުވެރިކަން އިސްތިހާރުކުރުމަށް ދިވެހިރާއްޖެއިން ގެންގުޅޭ މޮޑެލް ކަމަކު ނުދޭ. މިހާރު ވަރަށް ފުރިހަމައަށް ކޮށްލެވޭނެކަމެއް މިއީ. ގާބިލުމީހުނާއި ހަވާލުކުރައްވާ، ކަންކޮށް ނިންމާލާނެ

The name is already taken The name is available. Register?

ކުރިބޯށި

19 December 2016

މަޓީ މިކަމާ ކަންބޮޑެއް ނުވޭ ... މަޓީ ގެ ގިނަމެމްބަރުންގެ ރަށްތަށް ފުރަނީ ޗާޓަރ އޮޕޮރޭޓަރުން. އެމީހުން އަމިއްލަ އަށް އެމީހުންގެ ޕެކޭޖްތަށް އިސްތިހާރު ކުރޭ. މަޓާޓޯ މެމްބަރުންނާއި އެމީހުންގެ އޭޖަންޓުންނަކީ މމޕރސ ގެ އިސްތިހާރު / ޕީއާރު ބަޖެޓުގައި ޕިގީބެކްކޮށް މާކެޓްކޮއް ވިއްކާމީހުން.

The name is already taken The name is available. Register?

އަލީ

19 December 2016

ސަރުކާރުން ޓުއަރިޒަމް އިޝްތިހާރުކުރަން ހޭދަކުރަންޖެހޭތޯ؟ ޓެކްސްގެ ގޮތުގައި އެހެންހުރިހާ ވިޔަފާރިތަކާއި އާއްމުންވެސް ސަރުކާރަށް ޓެކްސްދައްކާ. އެކަމަކު އެމީހުންގެ ފައިދާއިތުރުކޮށްދޭކަށް ސަރުކާރުން އެތައްމިލިޔަންރުފިޔާ ހޭދައެއްނުކުރޭ. ޓުއަރިޒަމުން ލިބޭހުރިހާ ޑޮލަރުތަކެއް ރާއްޖޭގެބޭންކުތަކަށްނުވައްދާ ބޭރުގައުމުތަކުގައި ރައްކާކުރާއިރު މިފަދަބޮޑު ޚަރަދެއްކޮށްގެން ބޭރުބަޔަކަށް ފައިދާހޯދަދޭން ސަރުކާރުން ޚަރަދުކުރާކަށްނުޖެހޭ.

The name is already taken The name is available. Register?

މަޓާޓޯގެ މަސައކަތު މީހާ

19 December 2016

ޓްއަރިޒަމް އިޝްތިހާރު ކުރުމަށް ބެނުންވާ ފައިސާ ހޯދުމަށްޓަކައި ރާއްޖޭން ރަށެއްގައި ރިސޯޓެއް ހަދައި އެ ރިސޯޓުން ލިބޭ ފައިސާ ޓުއަރިޒަމް އިޝްތިހާރުކުރުމަށް ޚަރަދު ކުރަންވީ ނޫންތޯ !

The name is already taken The name is available. Register?

ކުރިބޯށި

19 December 2016

ދެން މަސްވެރިކަމަށްވެސް ރަށެއް ދިނުން އެދެން ... ދީން ކުރިއަރުވަންވެސް ރަށެއް މުހިންމު.

The name is already taken The name is available. Register?

އަހްމަދު

19 December 2016

މިރައީސްގެ ޕާރޓީއަށްވެސް ރިސޯރޓެއް ދިނުންރަގަޚު

The name is already taken The name is available. Register?

އިތުރު ލިޔުންތައް

މަގްބޫލް ލިޔުންތައް

Daily News Digest

Deliver popular news headlines to your inbox!

Subscribe

Download Mihaaru News App

Offline Alerts

SMS 'sub mihaaru' to 5454