ޓީސީ މޮޅުވާން ވެލެންސިއާއިން ފުރުސަތެއް ނުދިން

ކްލަބް ވެލެންސިއާގެ މައްޗަށް 1-0 ގެ ނަތީޖާ އަކުން ޓީސީ ސްޕޯޓްސް މޮޅުވާން ދަނިކޮށް ވެލެންސިއާއިން ފަހު ވަގުތު ލަނޑު ޖަހައި މެޗުގެ ނަތީޖާ 1-1 އެއްވަރު ކޮށްފި އެވެ.

މެޗުން މޮޅުވެގެން ތިންވަނަ މަގާމަށް ދެވެން އޮތް ޓީސީ އަށް ހުރަސް އެޅީ މެޗުގެ އެންމެ ފަހު ވަގުތުގައި ވެލެންސިއާގެ ބޯހަސް މާޓިން ކާމިޔާބު ކުރި ލަނޑުންނެވެ. މެޗު އެއްވަރު ކުރުމުން ވެލެންސިއާ އަށް ލިބުނު ޕޮއިންޓާއެކު އެޓީމުން ވަނީ ޖުމުލަ 13 ޕޮއިންޓް ހަމަކޮށްފަ އެވެ. ޓީސީ އަށް ލިބިފައި ވަނީ 11 ޕޮއިންޓެވެ.

މި ދެޓީމު ފުރަތަމަ ބުރުގައި ކުޅުނު މެޗު ވެލެންސިއާ ކާމިޔާބު ކުރީ 1-0 ންނެވެ. ގައުމީ ފުޓްބޯޅަ ދަނޑުގައި މިރޭ ކުޅުނު މެޗުގައި ފުރަތަމަ ހާފުގެ ކުރީކޮޅު ޓީސީގެ ލަނޑު ޖެހީ ޒަޔާން ނަސީރު (ޒައްޔޫ) އެވެ.

ދެވަނަ ހާފުގެ ބޮޑުބައެއް ޓީސީން ކުޅުނީ އެއް ކުޅުންތެރިޔަކު މަދުކޮށެވެ. ދެވަނަ ހާފުގެ 10 ވަނަ މިނެޓްގައި ވެލެންސިއާގެ އަބްދުﷲ ޔާމީން (ޔާން) އަށް ޓީސީގެ އޭރިއާގެ ބޭރުން އަބްދުލް ވާހިދު (ވާޑް) ފައުލުކުރުމުން ރެފްރީ ވަނީ ދެވަނަ ރީނދޫކާޑާއެކު ރަތް ކާޑު ދައްކައި ވާޑް ދަނޑުން ފޮނުވައިލައިފަ އެވެ. ފުރަތަމަ ހާފުގައި ވާޑް އަށް ފުރަތަމަ ރީނދޫ ކާޑް ދެއްކި އެވެ.

ވެލެންސިއާއިން ނަތީޖާ ހަމަހަމަ ކުރީ ދެވަނަ ހާފުގެ އިތުރު ވަގުތުގެ ގޮތުގައި ދެއްކި ހަ މިނެޓްގެ ތެރެއިން އެންމެ ފަހު މިނެޓްގަ އެވެ. އަބްދުﷲ ޔާމީން (ޔާން) ތަނަވަސްކޮށް ދިން ފުރުސަތަކުން ބޯހަސް ވަނީ ގޯލްގެ ތެރެއަށް ބޯޅަ ވައްދައިލައިފަ އެވެ.

މެޗުގެ 36 ވަނަ މިނެޓްގައި ފުރަތަމަ ހާފުގައި ލިބުނު އެންމެ ރަނގަޅު ފުރުސަތު ވެލެންސިއާ އަށް ތަނަވަސްވީ ލިބުނު ހިލޭ ޖެހުމަކުންނެވެ. ޓީސީގެ އޭރިއާގެ ބޭރުން ބޯހަސް މާޓީން ފޮނުވާލި ޖެހުން އަމާޒުވީ ގޯލްގެ ހުރަސްދަނޑީގެ ކަަނަށެވެ. ދެން ރީބައުންސްވި ބޯޅަ އަސްހަދު އަލީ ފޮނުވައިލުމުން ވެސް އަމާޒުވީ ހުރަސް ދަނޑި އަށެވެ.

އޭގެފަހުން 41 ވަނަ މިނެޓްގައި ވެސް ވެލެންސިއާގެ ހުސައިން ހަނާން އަށް ރަނގަޅު ފުރުސަތެއް ލިބުނެވެ. އޭރިއާގެ ތެރެއިން އަބްދުﷲ ޔާމިން (ޔާން) ދިން ބޯޅަ ހަނާން އޭރިއާގެ ތެރޭގައި ހުހަށް ހުރެފައި މަސައްކަތްކުރީ ގޯލްގެ މަތީ ކަނަށް އަމާޒުކޮށް ފޮނުވާލާށެވެ. އެހެންނަމަވެސް އޭނާ ފޮނުވައިލި ބޯޅަ ދިޔައީ ދަނޑި ކައިރިން ބޭރަށެވެ.

ފުރަތަމަ ހާފުގެ ފަހުކޮޅު ހުސައިން ހަނާން އޭރިއާގެ އަރިމަތީގައި ހުރެފައި އޭރިއާ ތެރެއަށް ނަގައިދިން ބޯޅަ އޭރިއާ ބޭރަށް ނުކުތުމުން އިސްމާއީލް ޒާން އާމިރު ފޮނުވައިލުމުން ޓީސީގެ ޑިފެންޑަރު މުހައްމަދު އަޖްފާން ވަނީ ބްލޮކްކޮށްފަ އެވެ.

މެޗުގެ 74 ވަނަ މިނެޓްގައި ވެލެންސިއާގެ އަހްމަދު ރިލްވާން އަށް ވެސް ރަނގަޅު ފުރުސަތެއް ލިބުނެވެ. ގޯލް އޭރިއާގެ ތެރޭގައި ހުރެފައި އޭނާ ފޮނުވައިލި ބޯޅަ، ޓީސީގެ ކީޕަރު ސޫޖަން ޕެރޭރާ ވަނީ ޑައިވްކޮށް ސަލާމަތްކޮށްފަ އެވެ. ފަހުން ސަމްދޫހް މުހައްމަދު (އައްޔަ) އަށް ވެސް މުޅިން ހުސް ފުރުސަތެއް ލިބުނެވެ. އެއް ކުޅުންތެރިޔަކު މަދުކޮށް ކުޅެން ޖެހުމުން ޓީސީން އިސްކަންދިނީ ޑިފެންސިވް ގޭމަކަށެވެ. ދެވަނަ ހާފުގެ ގިނަ ވަހުތު ވެލެންސިއާއިން ކުޅެމުން ދިޔައީ ޓީސީގެ ހާފުގެ ތެރޭގަ އެވެ.