އުތުރުގެ ކުނި މެނޭޖްކުރާ ތަން އެޅުން އެމްޓީސީސީއާ ހަވާލުކޮށްފި

ކުނބުރުދޫގައި ވޭސްޓް ޓްރާންސްފާ ސްޓޭޝަނެއް އަޅަން އެމްޓީސީސީއާއި ހަވާލުކުރި ރަސްމިއްޔާތުގެ ތެރެއިން ---ފޮޓޯ: އެމްޓީސީސީ

އަހުމަދު އަރުޝަމް، މިހާރު

07 ޖޫން 2022 - 11:37

އުތުރުގެ ރަށްތަކުން އުކާލާ ކުނި މެނޭޖް ކުރުމަށް ހދ. ކުނބުރުދޫގައި ވޭސްޓް ޓްރާންސްފާ ސްޓޭޝަނެއް އަޅަން އެމްޓީސީސީ އާ ހަވާލުކޮށްފި އެވެ.

ވޭސްޓް ޓްރާންސްފާ ސްޓޭޝަނަކީ ކުނި ޖަމާކޮށް ނައްތާލުމުގައި މުހިންމު ދައުރެއް އަދާކުރާ ތަނެކެވެ.

އެމްޓީސީސީން ނެރުނު ނޫސްބަޔާނެއްގައި ބުނީ އެ ސްޓޭޝަންގައި ޒޯން އެކެއްގައި ހިމެނޭ ހއ. ހދ. އަދި ށ. އަތޮޅުގެ ރަށްތަކުގައި އުފެދޭ ކުނި ޖަމާކޮށް ނައްތާލުމަށް ޓަކައި ސްޓޭޝަން އެޅުމުގެ އިތުރުން ފެން ހިންދާ ނިޒާމަކާއި އެ ރަށަށް ފަސޭހައިން އަރައިފޭބޭނެ ނިޒާމެއް ވެސް ގާއިމްކުރާނެ ކަމަށެވެ.

އެ މަޝްރޫއު ފެށުމުގެ ކުރިން އެ މަޝްރޫއުގެ ސަބަބުން ތިމާވެއްޓަށް ކުރާނެ އަސަރުތައް ދެނެގަންނާނެ ކަމަށް ވެސް އެމްޓީސީސީން ބުންޏެވެ.

މިއީ 7.6 މިލިއަން ރުފިޔާ އަށް، ފަސް މަސް ތެރޭގައި ނިންމަން އެމްޓީސީސީން ހަވާލުވި މަޝްރޫއެކެވެ.

އެންވަޔަރަމެންޓް މިނިސްޓްރީން އެމްޓީސީސީ އާއި ހަވާލުކުރި މި މަސައްކަތުގެ އެއްބަސްވުމުގައި މިނިސްޓްރީގެ ފަރާތުން ސޮއިކުރެއްވީ ޑެޕިއުޓީ މިނިސްޓަ މުހައްމަދު އަންސަރެވެ. އެމްޓީސީސީން ސޮއިކުރެއްވީ ސީއޯއޯ ޝާހިދު ހުސައިން މޫސާ އެވެ.