އިންޑިއާ ސަރުކާރާ ދެކޮޅު މުސްލިމު އެކްޓިވިސްޓެއްގެ ގެ ބިމާ ހަމަކޮށްލައިފި

އިންޑިއާގައި މުސްލިމުންގެ ހައްގުތައް ގެއްލޭ ގޮތަށް ސިޓިޒެންޝިޕް ގާނޫނަށް އިސްލާހު ގެނައުމާ ދެކޮޅަށް އުއްތަރް ޕްރަދޭޝްގައި އަޑު އުފުލާ، ވެލްފެއާ ޕާޓީ އޮފް އިންޑިއާގެ މެންބަރު ޖާވިދު މުހައްމަދާއި އެކްޓިވިސްޓެއްގެ ގޮތުގައި މަޝްހޫރު އޭނާގެ ދަރިފުޅު އަފްރީން ފާތިމާގެ ގެ އިއްޔެ ބިމާ ހަމަކޮށްލައިފި އެވެ.

ޕްރަޔަގްރާޖް ޑިވެލޮޕްމަންޓް އޮތޯރިޓީ (ޕީޑީއޭ) ގެ އޮފިޝަލުން ފުލުހުންނާ އެކު ގޮސް، ބުލްޑޯޒަރުތަކުން ގެ ބިމާ ހަމަކޮށްލީ ގާނޫނާ ހިލާފަށް، ހުއްދަ ނުހޯދާ ގެ އިމާރާތްކޮށްފައި ހުރި ކަމަށް ބުނެފަ އެވެ. އެކަމަކު މި ގެ އާއި މުސްލިމުން އެހެން އެތައް ބައެއްގެ ގެ ތަޅާލާފައި ވަނީ އިންޑިއާގެ ވެރިކަންކުރާ ޕާޓީ ބާރަތިޔާ ޖަނަތާ ޕާޓީ (ބީޖޭޕީ) ގެ އިސް ބަޔަކު ކީރިތި ރަސޫލާއަށް ފުރައްސާރަކުރި މައްސަލާގައި މުޒާހަރާކުރި ފަހުންނެވެ.

ވިޔަފާރިވެރިއެެއް ކަމަށްވާ ޖާވިދު، 54، ހައްޔަރުކޮށްފައި ވާއިރު ފުލުހުން ބުނެފައި ވަނީ އޭނާ އަކީ މިދިޔަ ހުކުރު ދުވަހު މުޒާހަރާކޮށް ވެހިކަލްތަކުގައި ހުޅުޖެހުން ރޭވި އިސް މީހާ ކަމަށެވެ. ފުލުހުން ބުނީ ކީރިތި ރަސޫލާއަށް ފުރައްސާރަކުރި މައްސަލާގައި އެކަމާ ދެކޮޅަށް އުއްތަރް ޕްރަދޭޝްގައި ކުރި މުޒާހަރާ ރޭވީ ޖާވިދު ކަމަށެވެ. އޭނާ ވަކި ތަނަކަށް މީހުން އެއްކުރީ ވަޓްސްއެޕުން މީހުންނަށް މެސެޖުކޮށްގެން ކަމަށާއި އެކަން އެނގުނީ މައްސަލާގައި ހައްޔަރުކުރި މީހުންގެ ފަރާތުން ކަމަށް ވެސް ބުންޏެވެ.

އިންޑިއާ ސަރުކާތާ ދެކޮޅު ޖާވިދު އަހުމަދުގެ ގެ ބުލްޑޯޒަރުން ތަޅައި ބިމާ ހަމަކޮށްލަނީ. -- ފޮޓޯ: ޕީޓީއައި

ޖާވިދާ ދެކޮޅަށް މި ތުހުމަތުތައް ކުރާއިރު އޭނާގެ ދަރިފުޅު އަފްރީން އަކީ ދިއްލީގެ ޖަވާހަރްލާލް ނެހްރޫ ޔުނިވަސިޓީގެ ދަރިވަރެކެވެ. އަދި އޭނާ އަކީ އަލީގަރް މުސްލިމުން ޔުނިވަސިޓީގެ ކުރީގެ ސްޓޫޑެންޓް ޔުނިއަންގެ ރައީސް އެވެ.

ގެ ތަޅާލި މައްސަލާގައި އުއްތަރް ޕްރަދޭޝްގެ އޮފިޝަލުން ވިދާޅުވެފައި ވަނީ މިއީ މުޒާހަރާ އާއި ހަމަނުޖެހުން ހިންގުމާ ގުޅިގެން ކުރި ކަމެއް ނޫން ކަމަށެވެ. ފުލުހުން ވެސް ބުނީ ގެ ތަޅާލި ތަނަށް ފުލުހުން ގޮސް ތިބީ ޕީޑީއޭ އިން އެދިގެން ކަމަށެވެ. އޮފިޝަލުން ވިދާޅުވެފައިވާ ގޮތުގައި ގޭގެ އެއްބައި ހަދާފައިވަނީ ހުއްދަ ނުހޯދަ އެވެ. އެހެންވެ ތަން ހުސްކުރަން މެއި މަހު އަންގައި އެކަމަށް ޖަވާބުދާރީވާން ވެސް ޖާވިދަށް ފުރުސަތު ދިން ކަމަށް ބުންޏެވެ. ގެ ތަޅާލީ ހަމަނުޖެހުން ހިންގައިގެން ނޫން ކަމަށާއި މިކަން ކުރީ މާކުރިން ނޯޓިސް ދީގެން ކަމަށް ބުންޏަސް ޖާވިދުގެ ވަކީލުން ވިދާޅުވީ ނޯޓިސް އައީ ޖާވިދަށް ކަމަށާއި އެކަމަކު އެއީ ޖާވިދުގެ އަނބިމީހާގެ ގެއެއް ކަމަށެވެ.

ގެ ތަޅާލީ ނޯޓިސް ކުރިން ދީފައި ކަމަށް ބުންޏަސް އެކަން ކުރީ އެކަށީގެންވާ ވަގުތު ނުދީ އަދި ބާތިލް ނޯޓިހެއް ދީފައި ކަމަށް ވަކީލުން ވިދާޅުވި އެވެ. އެހެންވެ ގޭގެ ބަދަލު ހޯދައި އަލުން ގެއެއް އަޅައިދޭން ޖެހޭނެ ކަމަށް ވެސް ވަނީ ވިދާޅުވެފަ އެވެ.

މުސްލިމެއްގެ ގެ ތަޅާލި މައްސަލާގައި ސަރަހައްދީ ސަރުކާރުން ދިފާއުގައި ވާހަކަ ދެއްކިޔަސް މިގޮތަށް މުސްލިމުންގެ އެތައް ގެއެއް ތަޅާލައި ހާލުގައި ޖައްސާފައިވެ އެވެ. ގެ ތަޅާލުމާ އެކު ސޯޝަލް މީޑިއާގައި އަންނަނީ އަފްރީނަށް ތާއީދުކޮށް ވާހަކަ ދައްކަމުންނެވެ.