16 ޖޫން 2022 - 07:48
8 comments
"ރާއްޖެ ޓްރާންސްޕޯޓް ލިންކް" (އާރުޓީއެލް) ގެ ނަމުގައި ފެށި، ހުޅުމާލޭގެ ދެވަނަ ފިޔަވަހީގެ ބަސް ދަތުރުތަކުގެ ސަބަބުން ކޮންމެ 15 މިނިޓަކުން ދަތުރު ކުރެވޭނެ ކަމަށް އެމްޓީސީސީން ރޭ ބުނެފި އެވެ.
އެ ކުންފުނިން އިތުރު 15 ބަސް ގެނެސް ހިދުމަތްތައް ދޭން ފެށުމަށް ބޭއްވި ރަސްމިއްޔާތުގައި މެނޭޖިން ޑިރެކްޓަރު އާދަމް އާޒިމް ވިދާޅުވީ، ބަހުގެ ހިދުމަތް އިތުރަށް ރަނގަޅު ކުރަން މަސައްކަތް ފަށާފައިވާ ކަމަށެވެ. އެ މަސައްކަތުގެ ދަށުން އައްޑު އާއި ފުވައްމުލައް އަދި ލ. އަތޮޅުގެ ބަހުގެ ހިދުމަތް މިހާރަށް ވުރެ ރަނގަޅު ކުރަމުން އަންނަ ކަމަށް ވިދާޅުވި އެވެ.
އަދި އަންނަ މަހު އެ އަތޮޅުތަކަށް އާ ބަސްތައް ގެންނާނެ ކަމަށް ވެސް އޭނާ ވިދާޅުވި އެވެ.
އެމްޓީސީސީގެ އާރްޓީއެލް ބަހެއްގެ އެތެރެ. މިބަސްތަކާ އެކު ދެވަނަ ފިޔަވަހީގައި ސީދާ މާލެއަށް ކުރާ ދަތުރުތައް އިތުރުވާނެ--ފޮޓޯ:ފަޔާޒް މޫސާ/މިހާރު
"މާލޭގެ ރައްޔިތުން އެތައް ޒަމާނަކު އިންތިޒާރު ކުރަމުން އައި މިނީ ބަހުގެ ހިދުމަތް ވެސް އަންނަ ޖުލައި މަހުގެ ތެރޭގައި ފަށާނަން. ހާއްސަކޮށް މިނީ ބަހުގެ ހިދުމަތް އަންނަ ޖުލައި މަހު މާލޭގެ ރައްޔިތުންނަށް ލިބިގެންދާނެ ކަމުގެ ފުރިހަމަ ޔަގީންކަން އަރުވަން،" އާޒިމް ވިދާޅުވި އެވެ.
އޭނާ ވިދާޅުވިގޮތުގައި، ޕަބްލިކް ޓްރާންސްޕޯޓްގެ ހިދުމަތް ޒަމާނީ ކުރަމުން އަންނަ އިރު ކޭޝް ކާޑު ނުވަތަ މޮބައިލް ފޯނު ބޭނުންކޮށްގެން ބަހުގެ ޓިކެޓް ކެނޑޭނެ އިންތިޒާމުތައް މި އަހަރު ނިމުމުގެ ކުރިން ހަމަޖައްސާނެ އެވެ.
އެމްޓީސީސީން ގެނައި އާ ބަސްތަކުން ތިން މަންޒިލަކަށް ހުޅުމާލޭގެ ދެވަނަ ފިޔަވަހިން ސީދާ ދަތުރުތައް ކުރާނެ އެވެ. އެއީ މާލޭގެ ވެސްޓް ޕާކް ސަރަހައްދުގެ ބަސް ޓާމިނަލަށާއި ކާނިވާ ސަރަހައްދު އަދި ވެލާނާ އިންޓަނޭޝަނަލް އެއާޕޯޓެވެ. އެއާއެކު ކޮންމެ 10 މިނިޓަކާއި 15 މިނިޓެއްގެ ތެރޭގައި އެއިން ކޮންމެ ރޫޓަކަށް ވެސް ބަސް ދަތުރެއް ކުރެވޭނެ އެވެ.
މާލެ ސަރަހައްދުގައި މިހާރު ބަހުގެ ހިދުމަތް ދޭ ހަ ރޫޓުގެ ބަދަލުގައި އަށް ރޫޓަށް ހިދުމަތް ފުޅާ ކޮށްފައިވާ ކަމަށް އެމްޓީސީސީން ބުނެފައިވެ އެވެ. އާ 15 ބަހާއެކު މާލެ ސަރަހައްދުގައި އެ ކުންފުނިން ދުއްވާ ބަހުގެ އަދަދު 46 އަށް އިތުރުވީ އެވެ.
އެމްޓީސީސީން ބުނީ ބަސްތައް އިތުރުވުމުގެ ނަތީޖާއަކީ ހުޅުމާލޭގެ ދެވަނަ ފިޔަވަހީގައި ދިރިއުޅޭ މީހުންނަށް ބަހުގެ ހިދުމަތް އިތުރަށް އަވަސްވުން ކަމަށެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ޝަޖީ
16 June 2022
15 ރުފިޔާ އެންމެ ދަތުރަކަށް ބޮޑު، އެ ކުޑަ ކޮށްދީ ފިއްޔާ ރަނގަޅު.
ވަގުތު
16 June 2022
ހުޅުމާލޭގެ ދެވަނަ ފިޔަވައްސަށް އެކަނިތަ 15 މިނެޓުން. ފޭސްއެކެއްގަވެސް 15 މިނެޓަށް ބަދަލުކޮށްދީ. ހާދަވަގުތެގޭ ބަސްސްޓޮޕްގަ ހޭދަވަނީ. ރިލަޔަބަލް ޕަބްލިކް ޓްރާންސްޕޯޓަކަށްވާނީ ޕީކް ގަޑީގަ 10މިނެޓަށް ނުވަތަ އެއަށްވުރެވެސް އަވަސްކޮށްގެން.
ށަވިޔަނި
16 June 2022
ސައިޒް އޮޅިގެން ދިވެހިން އުޅެނީ. ކިތަންމެ ކަމެއްކުރިއަސް ޝަކުވާ.
ހަމް78
16 June 2022
މާލެ އެތެރޭގެ ބަސް މާ މަދު. މިނީ ބަސް ގެނެސް އެތެރޭ ބަސް އިތުރުކުރޭ. ކޮންމެ އަވަށަކު 2 ތިން ސްޓޮޕް ހުންނަ ގޮތައް.
ޙޙ2022
16 June 2022
މާލެ ވަށައިގެން ދަތުރުކޮށްލެވޭނެބާ؟ ބޮއިހަލަކޮ
މަގުހަލާކު
16 June 2022
ބޮއިހަލާކުނުވެ މާލެވަށާ ބަސްދަތުކުރާނަމަ އާންމުންނަށް ވަރަށް ފަސޭހަވާނެ
ޕިކްސް
16 June 2022
މާލޭގަ މިނީ ބަހުގެ ހިދުމަތް ފެށިދާނެ. އެކަމަކު މާލޭގެ ޕާކިން އަށާ މަގުބަންދު ކުރާ ގޮތަށް ބަދަލުތަކެއް ނުގެނެސް މިނީ ބަހުގެ ހިދުމަތް ދެމެހެއްޓެނިގޮތެއްގައެއް ނުދެވޭނެ.
ޕޭސް
16 June 2022
ފޭސް 2 ސީދާ ހައިވޭއަށް ހާއްސަ މަގެއް ހަދާލަން ރަނގަޅުދޯ. . ފޭސް 1 ގެ މަގައް ބާރުބޮޑު ނުވާނެ. ހާދަ ވަގުތެކޭ ގެއްލެނީ. ހައިވޭ ޓްރެފިކް ލައިޓްމޮޑިފައިކޮއް ނުލެވުން.